飞星赋（第一节）（被认为系风水秘籍）#

周流八卦，颠倒九畴，察来彰往，索隐探幽。

八卦即系元旦盘，乾、坎、艮、震、巽、离、坤、兑。 亦指八个方位，周流者，随住唔同的时间空间，将八个卦配在唔同的方位，九畴，即系现在用的九宫位，将八个卦根据唔同的时间分布在唔同的位置，就系唔同的地运的分布就会产生唔同的吉凶，察来彰往就系用以往的事推断未来的事，睇到人地睇唔到的野，索隐探幽就系推算D未知的野，其实就系用九宫八卦。

承旺承生，得之足喜，逢衰逢谢，失则堪忧。

玄空飞星讲究当运生旺，一间屋飞星系旺山旺向，加上巒头配合，就系一个生旺的屋，自然丁财两旺，未必会发逹，肯定的就系比一般人幸运，揾钱舒服D。 但系排到飞星系上山下水的话，又或者侄头掉转，即系山星见到水，向星见到山，就系衰同谢，未必系损丁破财，最起码都无其他人咁幸运，最明显的就系做野有临门一脚的情形出现。

人为天地之心，吉凶原堪自主，易有灾祥之变，趋避本可预谋。

人在天地之间，会受到周围的环境影响，一般人就话天地间的磁场，会影响人的情绪，但风水师将呢D野叫做气，分旺气同衰气，得旺气就吉，得衰气就凶，只要明白八卦配九宫的原理，就会预知吉凶，所以话原堪自主，越系了解得清楚，就越能及早趋吉避凶，预先筹谋，知道吉凶星的方位，就知道点做，例如2021年，流年星六白入中， 五黄凶星在东南位，就会在前一年将巽宫位修理好，唔会等到五黄到位先至修补。

小人昧理妄行，祸由己作，君子待时始动，褔自我求。

呢个世界名师多而明师少，小人只不过系无学识的人，祸由己作，古人认为呃人吓人系有报应的，但系经验告诉我们，呢个世界系无报应的。 杀人放火，同修桥补路的下塲系一样，君子，有学识的人，做野唔会勉强，亦都明白睇风水有时候唔可以之过急，地运未到或者流年未到，就点搅都无用，运未到就只有等，时机到就要更加勤力，褔自我求并唔系等运到，而系主动，例如今年的流年八字就话俾我地听点样做。

飞星赋（第二节）#

试看复壁堪身，壮途踬足。

呢篇文章借用咗好多六十四卦的卦名同卦象来引伸风水的効应，好似呢度的复，系地雷复，即系向星2，山星3，堪身者，即系幅墙倒下，压到自己，因为坤为墙壁，震为动，墙壁动就自然冧低，向2山3的星组系衰死退气，外面稍为有风吹草动就自然有野杀到埋身，现今之世点会有幅墙冧落来压倒。 七运午山子向西北位，因向星2山星3，地雷复卦，呢度唔关卦的解释，只系借用卦的比喻，西北方本身属金，有破损就有机会有不如意的事杀埋身，土生金，金尅木，多数都系官非。 壮就系雷天大壮，向星3，山星6，三碧卦象的身体类象系脚，六白为金，古时就话系马，人俾马撞伤脚，但现今之世好少人俾马撞伤的，代之而起的系俾车撞伤。 所以呢度系讲有交通意外。

雷天大壮卦向星3，山星6，八运坤山艮向正东位，东方属木，木强金弱，但系外面的树有枯乾就代表金有力制木，如果流年八入中之年变成金木交战，有枯树就自然易出现交通意外。 2021年最大机会，呢度只系取象于手脚之伤，呢D形格就系趋避本可预谋。

同人车马驰驱，小畜差徭劳碌。

同人就系火天同人卦，即系山星9，向星6，呢度系讲山星火压迫向星金，六白乾金卦象动态，俾火压迫就不得不劳动，亦未必系辛苦，而系无时停。 呢度的动系唔包括利益，所以意思系劳而无功。 八运坤山艮向正南位，正南本身属火，先天性火尅金，山星九紫火旺的流年就对向星六白造成压迫，例如面向的楼重修，由白色变红色，住呢个位的人就会马不停蹄，四处走动。

小畜系风天小畜，向星4山星6，山星尅向星，另一方面又合格，在玄空风水的法则，相尅就有斗争，相合就可以化解纷争，呢度的小畜差徭系向星4受尅，六白代表上司，命令，四绿代表女性，文书，引伸为上司同秘书的关系，或者系女文员，八运戌山辰向西南位，西南属土，土生金，金旺木弱，办公室的位置有咁的形格，就好容易有个恶上司，但系唔使惊，因为4同6相合化解凶煞之象，即系虽然要求好荷尅，但态度都不太差，如果流年相冲，就会产生关系变差，例如一白入中之年（2026），七赤年星飞入，就会有D无谓人介入而影响自己同上司的和洽，而致做野劳而无功。

飞星赋（第三节）#

乙辛兮家室分离，辰酉兮闺帏不睦。

乙辛系3同7，相合同相尅的组合，3.7合十，相尅系金同木，但有一个条件，就系第三山，重要长男配少女，3.7的宫位好多，如果每个3.7的 宫位都会家室分离就太笑话，呢度的分离之象，就一就系金木相合，然后相尅，第二就系大的男人配细的女人，重有就系第三山的宫位，六运辛山乙向东南方，坐西向东，开东南门， 如果门前有尖角冲尅，就先天性有潜伏性的婚姻危机，东南系巽宫，巽为木，木旺金弱，4入中之年2023年就有危机。

辰酉系四绿木同七赤金，巽4系长女，酉7系少女，兑巽相尅，两女相处就会有争拗，呢度唔系讲两姐妹，而系两姑嫂（四绿系嫁咗，七赤系未嫁，所以系两姑嫂），宫位系7.4同宫，向星7，山星4，六运丑山未向，正南宫位，正南离系火的宫位，木火同一阵线，尅住七赤，如果呢个位系大门，而又有呢种身份的人入住，即系个妹同兄嫂一齐住，就容易产生家室纠纷，因为呢种组合先天性不和的，如果流年有火星飞入，五黄入中之年（2022），就会由呢个亚嫂所引起好多纷争， 应该由好少的事而引发出大件事，例如大门口有块磁砖剥落，就会应有事发生。

寅申触巳，曾闻虎噬家人。

呢度借用咗命理的寅申巳三刑，首先寅的十二生肖系虎，坤系二克，代表群众，或者系女人，多数都系指屋企里面的人，巳系巽，亦都代表女性， 成个格局就系2.8的宫位，即系土的宫位，再见木星，八运丑山未向，东北位，东北系土，2.8又系土，连最唔受重视的运星都系2克土，一片土气，呢个系坐山的位置，山星8见山，本来系人丁与旺的格局，但系如果有破坏土气的星组出现，就会有意外，例如山泥倾泻，咁啱又有年星4绿飞到，就有突发的事，最容易出现的就系俾猫抓伤。 大D的就系俾车撞伤，因为现在好少可能俾老虎咬伤，代之而起的系市虎撞伤的机会大得多。

壬甲排庚，最异龙摧屋角。 或被犬伤，或逢蛇毒。

壬系一白，甲系三碧，庚系七赤，呢度话原本宫位系1同3，山星1白水生向星3碧木，水木相生，有七赤金星飞到，点解会搅到有龙，又推冧间屋呢，原本系卦象上面的玩野 ，震为龙，一白坎为云，为雨水，相传水跟住龙出现，庚为兑，兑为泽，兑震相尅，就有大水之象，例如大雨，山洪突发，但系现在呢D野都唔会出现，代之而起的系有异物入屋，并唔系鬼怪而系陌生人，即系贼，八运辰戌东北宫位，外面有高速的水流动，即系高速公路，大部份的高速公路都可以列为煞气，如果有七赤飞到，7.1金生水，水生三碧木，而外面高速流动的水变为煞气，所以三碧亦变成贼星，所以就有贼入屋。 4入中之年（2023）就要小心门户。 跟住话被犬伤或逢蛇毒，都好少事，点及得有贼入屋咁大件事呢。

青楼染疾，只因七弼同黄。

七系七赤金，弼系右弼，九紫火，黄系五黄，呢度所取的象理全部都系负面的野，先决条件就系外面的景物无一可取，例如开山，或者一大片回收伤，间中就发生火警，呢种的形格，就算几叻的大师都觉得无能为力，只有等外面呢D野搬走，或者建有新屋阻挡开山的位置，风水师所做的野先至会应验。 呢度所取象的7赤系妓女，九紫火为离，离系美丽，即系7同9系一个好靓的妓女，五黄系代表有毒，成个宫位系山星7，向星9，面向回收伤或开山的山壁，甚至乎系火烧过的山，再有五黄飞到，就切忌上青楼，因为原本9.7的宫位，一早就已经知道，亦知道几时有五黄凶星飞到，更加可以知道月星五黄几时飞到，有咁多资料，就吉凶本可预谋， 如果咁样都重要钟埋去，就真系抵死。 七运辰山戌向，东南位，2021年九月最有机会中奖。

飞星赋（第四节）#

寒户遭瘟，缘自三廉夹绿。

寒户系伶仃屋，例如周围的屋好低，自己独高，或者周围都好高，夹住自己间屋好低，或者周围都系新屋，自己一间系旧屋，而且系破落的，即系甩甩漏漏，遭瘟即系有病，点解呢，因为第一系寒户，第二系三廉夹绿，三廉同夹绿，三系三碧，廉系廉贞即系五黄，绿系四，成个组合系向星3，山星5，再有4绿飞入， 成3.4.5的组合，卦象所取的系正面或者负面就要睇外面的环境，呢度的向星3，山星5宫位，望到的一定系枯木一片，最有机会的系一片蕉林，当蕉农斩咗蕉之后，必定将蕉树栏腰斩断，呢段时间系呢一片蕉林最核突的时间，如果呢间屋面向呢种环境，咁啱又有四绿木飞到，就有机会染到特别的病，呢度有机会唔止一间屋，而系成条村都有可能患传染病。 七运辰戌，东北位，向星3，山星5，自己系伶仃屋，外面有一两棵枯木，或新近火烧山，而有4绿飞入，1白入中，2026年七月最大机会，有特别的病，除非唔病，病亲就唔系人咁品，所以首先外面的环境系最重要，如果外面的景物平常，就算有凶星都唔系咁大件事。

赤紫兮，致災有數，黑黄兮釀疾堪傷。

呢度係牽涉到先天數同後天數，後天數即係河洛五行，在羅盤的第二層就好清楚，即係一般常用的五行，而先天數亦都係在第二層睇到，1.6係水，2.7係火，3.8係木，4.9係金，5.10係土，呢度的赤紫係包括咗先天7火，後天9火，即係7.9同宫，主犯火災，紫白訣有講︰(七九合轍，常遭回祿之災)，山星7，向星9，因為先天係引致，後天係發生，所以向星係九紫，7.9同宫表示有機會發生火災，而要有火災出現，2克5黄出現就有可能火燒之事，另一個可能就係3碧4綠出現都大機會。八運甲庚，東南位，呢個位好大機會係睡房，有3碧到東南位，2023年就要小心。

黑黄兮釀疾堪傷，即係2.5同宫，代表容易有病，呢種唔係普通的病，山星2，向星5，玄空飛星講究當令同失令，2同5在八運唔使講都係失運，啱啱八運樓最多2.5同宫的屋，所以在八運最好的行業就係醫藥同殯儀業，凡2.5同宫係睡房，都要小心健康，房內佈置要少用紅色。最好用鐡床，床底要保持乾淨，床中間的天花唔好有燈，就可以減低凶象，遇到三碧木星或九紫火星入房，就要特別小心，只要平時飲食小心，就唔使擔心。但係房外面有廟宇，或教堂的尖頂，就要用物件化解，例如用金屬的機械鐘，或者用銅盆栽水植物都可化解。

飛星賦（第五節）#

交至乾坤，吝心不足。

乾坤即係6白同2克，交至即係6白見2克或2克見6白，跟住話吝心不足，就一定係山星的事，乾坤各有所主，呢度話吝心即係孤寒，所以一定同錢有關，既然講錢，乾就代表貴重物品，金錢或者珠寶之類，坤就代表多或少，因為土係生金的，孤寒係性格，就係2克的事，如果2克土受到制肘，就生金無力，性格就變成吝嗇，貪錢，而咁多組星之中2克土星係最容易受尅泄的，所以呢度唔講五黄，8白而專講2克，就係咁的原因，凡6白所到的位置有2克土星飛到就叫做交，如果外面的景物無沖又無尅，表示性格開朗，疏爽，但如果有反弓水，山石巖巉，就自然變得吝嗇小器，掉番轉頭山星2克，有6白飛入，就表示會有横財，如果外面有尅制6白的野就主破財，都係可以預知的。

同來震巽，昧事無常。

震巽即係3.4同宫，昧事無常即係做野不分輕重，遇事猶豫不訣，或者因循苟且，在六.七運裡面都無3.4同宫，只有在流年星飛入先至會出現，3.4即係陰陽木，通常見到4綠木主聰明，亦代表文昌，再見3碧加强木的力，應該係更加聰明先啱，但係跟住又話昧事無常，故名思義，外面的環境一定好差，最差的莫過於反弓水，第二係尖角沖射。八運酉山卯向西南位，呢度通常都係睡房的位置，如果見圓形的山，有適當的樹木，就代表人聰明，處事爽快，如果見泥唔見樹，或者有反弓水，就自然做野進退失據，遇事猶豫。

戌未僧尼，自我有緣何益。

古人寫野飄吓飄吓，啱啱先至講緊用八卦代表九宫的星組，即刻就來一句用廿四山來代表九宫的星組，戌未係6白同2克，戌係乾宫，未係坤宫，有緣係指乾坤相生，自然係富貴的組合，如果環境唔配合，就變成(交至乾坤，吝心不足)。呢度的為憎為尼，唔係真係做尼姑，和尚，而係話呢度的人會迷信，跟唔上呢個世界的步伐，性格亦都保守。七運酉山卯向，東北位，山星6，向星2，如果係大門，就需要有一定的條件，就係要有明堂位，外面無廣闊的明堂，裡面都要有番十尺八尺先至似樣，重有最重要的就係要够光猛，如果大門陰暗，2.6宫位的大門就一定迷信思想落後。唯一的好處就係有誠心的宗教信仰。

乾坤神鬼，與他相尅非祥。

呢度仍然接住上面一句，都係山星6，向星2的組合，所謂鬼神者，唔係宗教的神鬼，而係卦象上的表示，乾為天為神，坤為地為鬼，相尅係指外面的環境，非常惡劣，就會令人覺得鬼跟尾，令人覺得有幻覺，做就咗一部份拜神的風水師，可以搵好多錢，其實八卦所顯示的表象，並無涉及陰邪鬼怪之事，而呢度話神鬼相尅，只不過係話外邊的環境太差，就乜野星組都係多餘的。

飛星賦（第六節）#

當知四蕩一淫，淫蕩者扶之歸正。

1.4為文昌組合，甚麼木入坎宫，貪狼星入巽宫，坎元生氣入巽木等等，都係講1同4的好處﹐俾人覺得1.4同宫無樣差的，而呢度竟講到咁衰。因為凡卦象都有正面同負面的表示，坎為水，水性飄浮而虛蕩，水勢過大，必然無制，巽為風，風亦為飄蕩不定，巽為女性，坎為男子，水過大令木勢無根，亦都係女性俾男性影響咗，用詞就係迷失自我，因為五術書籍係男人寫的，所以呢度的四蕩係話女性不守婦道，係被動，即係有人引誘，一淫係話主動去勾引男人。任何宫位水勢過大都係差D，而1.4同宫都唔例外，水過大會令到人無主意，而要真係有文昌的得用就要有先訣條件，就係還宫復位，即係四綠去返巽位，就係最有効的文昌位，例如六運坤艮，七運子午，八運艮坤，有呢D宫位重要有水同木，先至應得到正面野。如果水過多，就隨便，如果木過多就刻板，兩樣都唔係真正好，有D宫位只得一樣野，例如只有一白水星或只有四綠木星，就要後天加以補足，亦不失為一個有用的文昌位。

須知七剛三毅，剛毅者制則生殃。

七就系七赤，三就系三碧，七赤系破军星，有肃杀剑锋之象，三碧另一个名叫蚩尤，即系黄帝的对手（古人写书实在得意），三碧所到之处，都会产生斗争。 3.7的组合亦都系一个刚阳的格局，如果外面的景物唔配合，例如有火形尖角，三义去水口，就做成穿心杀的効应，由于金木相尅的关系，所以大部分3.7的宫位，有问题都会出在长男身上，呢度话须识七刚三毅，刚同毅即系好强硬，有呢个星组配合外面环境所做成的杀气系好劲的，唔容易化解， 跟住话制则生殃，即系只可以化杀，唔可以制杀，六、七运的东西向每个山向都有3.7的宫位，七运酉山卯向，正西位，山星7，向星3，先天性系金的位置，自然对三碧做成尅制，加上山星尅向星，呢度三碧就双重受尅，运星9紫，又泄三碧的气，背后眼平线对正有人装修，有竹棚尖角冲射，铝窗已拆卸，但未装新窗， 做成一个破洞，流年星5入中，七赤到西位，五月七入中，九紫到西位，咁多样都对三碧不利，尤其是系做流动性工作，在呢段时间容易有意外，最容易出现的就系脚伤，有机会俾车撞到而伤脚，但系伤到乜野程度就好难判断。 基于吉凶本可预谋的原则，化解之法只可用泄金之气而唔可以用斗杀之法，可用动水泄金生木之法，例如摆一个鱼缸，放鱼三条，加少量水草，可泄金及动土之杀气。

碧绿风魔，他处廉贞莫见。

又系三碧同四绿的宫位，上面讲过三廉夹绿，同来震巽等等，呢度话碧绿风魔，就明显系精神的问题，3.4同宫在六七运系唔会有的，只在八运的东西，南北向先至有，所以在八运的屋多数都系原宫位有3或4，跟住在流年星再有3或4相应（ 飞入），就会产生吉凶的効应，最大的问题都系见到五黄，但呢度的重点系他处，呢个他处并唔系求其一处，而系3或4的本位，先决条件就系三碧或者四绿的宫位有杀气，但系未必会爆发出来，例如外面有尅煞，但系宫位有相合，就系相尅而又有相合，但在本位有五黄到，就会引发情绪病，严重者会有精神病，要睇外面环境衰到乜野程度。 八运乾山巽向，东北位，4.6同宫，原本格局系旺山旺向，但呢个宫巽木被乾金所尅，外面又系金的形格，2021年6白入中，五黄到巽宫，就会影响到东北位的四绿，即系长女在外面做野会好受气。