癸卯年有新嘅希望，主观愿望当然系向好的一方面想，风水从业员系无特别嘢卖嘅，所卖者就系信心，正面讯息同埋希望，世界不断在变，所以每个人都要因应环境调节自己嘅心态，切忌死牛一边颈，否则好容易被淘汰而不自知（好多人衰而不自觉），要知道变成点，就要了解流年大势，用一句名言就可以概括今年嘅势态，就系（让一部份人富起来），即系大部分人不会富起来，引伸为一般人都无乜好日子过，因为流年格局系水弱，强木生火，土星隐藏金极弱，演绎出嚟就系钟意吹水，未做已经大吹大擂，惊死无人知，但系埋单计数（年尾赛后检讨），原来乜都无做成功，点解有呢种结果呢？ 因为样样都揸唔到主意，每一件事的结果都出乎自己意料之外（自己弱就自然被动）。

今年嘅动象好大，无论大至政府，小至卖咸脆花生都好似好忙碌，实际上系见身郁唔见米白。 对男性来讲，系一个劲旺既桃花年，亦都系搵钱年份（系搵钱，唔系剩钱），因为今年桃花旺财亦旺，但系桃花与财只可以任择其一，两者兼得的人百中无一，所以专注于财的人桃花自然弱，专注于桃花的人财肯定弱（唔使算命都知），无论钟意那一样，只要开心就得。

而女性方面，今年有旺火生土，所以以前嫁未出嘅女性今年都有机会上花轿，同时有一个好好既借口，双春兼闰月，有得嫁就好快嫁喇。

今年亦有一个特点，每一个人命中所无嘅都可以喺今年里面碰到（唔系每个人都可以掌握得到，视个人嘅能力而定），纯木，纯火，纯土，纯金嘅月份都有，各取所需。 呢种格局要12年之后先至会再出现，到时己经系戊申年，大前题已经唔同晒啦。

风水方面，本地近十年来都系缺点多于优点，但系有一个优点就系司法独立，当这个地方司法不能独立存在的时候，己经再无留低既价值。

本年的大趋势系让一部分人富起来，原因系衰星进驻乾宫，会有滥权情况出现，由小生意至大生意（管理香港都系一盘生意），都有利用职权做少少对自己有益嘅事。 另一方面就系权力越高嘅人越容易有意外出现（包括意料之外嘅病，乜嘢病自然系因人而异），凡事都有正反两面。

另一个就系病星进入震宫，长子痴迷，唔系讲笑，会做埋啲令人唔认同嘅事，最主要系长辈唔认同，可以预见宅男越来越多。

一般人所认识嘅财星进驻离宫，火炎土燥，大家财运都唔慌好得去边，最快都要去到农历七月先至有转机，因为前面六个月都系木火土嘅五行，只有令到财星无生气，所以大部分人都有求财困难嘅情况出现（本年嘅财星系众人嘅财）。

一白吉星进入坤宫，同命格流年一样，有得嫁就要快啲，请勿犹疑，同埋唔好摆款，甩咗就恨错难返呀。 七赤衰星进驻艮宫，就会出现好多三只手事件，真系搅唔明白，本地已经系一个天下无贼嘅社会，点解仲会有三只手嘅男仔出现呢？ 正是无人知道天机（过后就知）（马后炮个个都识放）。

六白吉星去到兑宫，六七同宫多争拗，争相出风头，自然多是非，无乜大问题嘅，因为只系口角之争，但会好嘈吵（声音属金，阴阳金相格，自然好多噪音）。

三碧木星入巽宫，又系争拗嘅源头，今年无可避免大有大争，小有小吵，因为出现震巽同宫，乾兑同宫，天机真唔系咁容易明白，本地已经无晒反对声音啦，仲有乜嘢好争啫，但系 风水预示话畀我哋知，金木相对必分胜负，一般人最好保住睇戏嘅心情，切勿参与，否则死咗都唔知乜事（风水无讲大话嘅，问题系我哋对风水认识有几多啫）。

文昌星困处中宫，从正面嘅方向睇，今年状元一定比往年多，值得开心。 从负面方面睇，状元嘅出路好小，向东走遇斗牛煞，向西走见交剑煞，东西方都不利年青人，向北方走见水火未济，好难适应，亦都唔系咁受欢迎。 向南走见八逢九紫，最利年青男女，值得考虑。

本年由命理或风水判断，都有正面或负面现象，可凭个人环境能力作出取舍，适合A君未必啱B君，吉凶都因人而异。