今年六白入中宫，六白系武曲星，六白系代表学校以外的考试，包括咗升职，辛丑年一般的打工仔想升职系一件困难事，命格缺金的人更加谂都唔使谂。 唯一可以试试的就系令到中宫同正西位无野阻隔（做成六八同宫，九贵人出现），想升职仲有少少机会，否则叠埋心水等明年。

西北方在辛丑年系官非位，一般人都好惊有官非，又惊有是非，因为大多数人将是非同官非混为一堆，其实要惹官非唔系咁容易（唔系抄牌，垃圾虫咁简单就叫做官非），官非分主动惹返嚟同被动惹嘅，黄之锋嘅就系叫做主动惹官非，连城诀里面个傻仔就系被动惹官非。 要化解主动既官非最好容易，只要喺露台种几棵黑豆，就可以将主动惹官非嘅心态化解于无形。 至于被动埋身嘅官非真系防不胜防，除咗恒常态之外，见到有异常态，就要用水养多根植物化解，但系呢啲官非大部份都系同大过自己既人争执而来的，所以免得过都唔好同啲老野争执，实蚀底既。 呢个位系针对年纪细嘅人，或者一家最受宠爱的年青人，惹祸既机会最大，亦都唔容易化解，都好难分主动定被动。

正西方系辛丑年嘅财位，无人以财为忌嘅，更加唔会有人去化解财星嘅，只有端端度度去增旺财位，其实财位唔使加旺，只要正西为唔系厕所，或者缺角，就表示未来一年财源多数稳定，如果系厕所嘅话，就要保持干爽通气，最好常开抽气扇，如果系缺角位，要补救仲容易，只要勤力勤力再加勤力就得啦。

正东方系一般人所讲嘅三煞位，通常都容易有意外之事，最大机会就系脚伤。 亦都会喺职位上面出现问题，最好就系唔好转工（所转嘅必定系三煞位），上司同下属都对你有意见，如果所转嘅系最低层嘅职位就冇事，因为唔会有人笃你背脊。

如果家中有学生，呢个位置就系最为人所道既文昌位，要催旺文昌就话都无咁易，只要外面环境无冲克就肯定得，见水就用木，见木就用水，但系有先决条件就系有人钟意读书，如果真系唔得就只有其诸下一年，因为壬寅年文昌归位。

一提起五黄位，就俾一般大师钉死咗佢系十恶不赦嘅衰位，郁亲佢一定死人冧楼，一个单位嘅东南方如果有人掘地，在墙壁打一口钉，都会一身蚁，如果有地盘打桩就一定死得人多，总之唔吓死人唔收口，如果呢个位置真系有咁嘅威力就真系天下太平喇，东南方位最怕有突发情况，即系异常态，见到有平时唔同嘅景象，要用个铃铃摇几下就得，完全唔使紧张， 预先摆个上链公仔每日郁动一下即可。 如果系冷气机位，抽风机位，大门口位（恒常态），完全唔使惊，只要保持清洁整齐即可。

东北方系喜庆位，需要有火才可产生作用，但东北方系太阳最弱嘅位置，就只有用人做火来催旺，方法有好多，但系先决条件就要有后生一齐住，就可以将喜庆位作用引出，如果净系得老人家，就只系得平安两只字，即系平安是福。 呢个系女性位，所以有后生同住就有喜庆事出现，唔需要做任何嘢只要唔缺角就得。

正南系一般公用嘅桃花位，亦都系人缘位，桃花旺唔代表人缘好，但系人缘好者多数都会带旺桃花。 风水嘅作用主要就系健康，之后就系和洽，呢两样嘢都可以喺正南位求得，但辛丑年大部分人都无什么人缘，人与人之间嘅疏离感越嚟越强烈，要催旺桃花实在唔容易，如果发觉有好多人针对自己，就可以用一个铜盘或者铜香炉养浮萍，或者将观音竹剪成六吋长，放喺盆里面用水养，可令自己圆滑一啲，亦都容易接触到或者容易认识异性朋友。

正北系病位，同流年对着干，同方位对冲，所以双重冲克之下，今年疾病特别多，唔单止病嘅人多，疾病的种类亦都多，化解方法好有限，如果正北方外面有动土迹象（未到真正动土），就要开始化解，只有用最老土嘅方法，最有效就系用铜锣，佢每日未时敲打六下，保证平安大吉，如果呢个方位系一幅墙，密封无窗，就只要整齐清洁即可， 唔使搞任何动作，无嘢唔好搞嘢。

西南位系大是非位，亦都系盗贼位，亦都容易应在女人身上，如果呢个位封尘，就会令女人产生贪念，引申为有官非，如果系杂乱无章，就会俾人笃背脊，笃死为止，如果系清洁整齐就表示你好叻，招人妒忌，无需化解，不招人忌是庸才，所以唔使花时间去化解。

总结今年并不睇好，因为二克，三碧，五黄所座落的位置，都系与原局对冲的，加上今年系辛丑，十二个月之中占咗八个月都系天地不和，无论健康与财富都同风水原意背道而驰，流年方位好少今年咁明显，唔似得庚子年的在迷雾之中，所以判断吉凶并不因难。

如果睇得明白就唔使要学理版