《易经》第一卦【天】干为天#

呢一卦系六十四卦中的第一卦，易经系中国的第一本占卜书，在出土的甲骨文中，都证明了爻辞系占卜为用。 不过以前专供部落酋长或者君主遇到重大疑难的时候，作为决策的参考. 因此亦可以话易经最初系领导人专用的参考书。 后来越来越多人将易经神化，将佢同数学、物理学、生物化学、医学、心理学、教育，甚至太空科学等等拉上关系，跟住就出了一大堆以易经为名目的医书，研究太空，研究数学等等。 凡一样事一经神化，就自然变质，易经亦唔例外。 我们绝对唔会将一本占卜的书神化，会企在一个客观的立埸来睇易经。

易经以乾为第一卦，卦形的结构系上乾下干，上下都系乾卦，六爻都系阳爻。 阳系健，健系勇猛、奋勇、奋发、前进同埋开创，所以乾卦系一个代表创新同埋开拓的精神。 1972年湖南长沙马王堆汉墓出土的汉帛书系写呢个「键」字，亦即系现在的「健」字，健亦有领导的意思，所以呢个亦都系领袖卦。

干：元，亨，利，贞。 易经第一组出现的文字，古人对呢四个字有好详尽解释，可以写一本书，现在就字义作一个简单咁解一下。 元即系开始，所谓元者始也，代表创造性，或者开能力。 亨代表通，亨者通也，系通达、清除障碍嘅意思。 利系可以利和也，呢个利最初嘅解释唔系自己的私利，而系有利于群体，人或者物都以发挥佢嘅利群性质，但系现在多数都解为对自己有益或者利于做乜做物。 贞代表企硬，贞者正也，系对自己自身嘅理想信念嘅坚持，即系贞忠不二，坚持到底亦即系毅力嘅持久性。

总结元亨利贞，元系开始有理想，想改变现状，亨系想办法打通障碍，利系可以进行，但系呢个利并唔系咁一帆风顺，所以跟住就有个贞字。 贞就系呢件事无咁顺利，为了最初嘅理想信念，要坚持坚忍到底，所以呢个元亨利贞系正面的。 呢个卦的历史背景系周文王姬昌开始部署向纣王个老豆帝乙造反，但系非常唔好彩，遇到旱灾，旱灾的原因系有一条龙吸干晒河水，呢条龙好可能系现在的鳄鱼，后来有一个异人教佢用呢条鳄鱼祭天，个天受了贿赂之后就叫条龙吐番哂河水出来。

彖曰：大哉乾元，万物资始，乃统天。 云行雨施，品物流形。 大明始终，六位时成，时乘六龙以御天。 干道变化，各正性命，保合大和，乃利贞。 首出庶物，万国咸宁。

大哉就系赞叹：真伟大呀。 乾卦的意义系好伟大的，伟大到什么程度呢？ 话天系万物资生的始源，通过天的自然变化，就资生万物，万物都系靠佢来生发，系一切的根源，所以就系统率天下万物的根本。 唔单止咁，重掌握住天下万物的生死，点解呢？ 因为有能力行云施雨，同埋大明始终，即系水同埋火佢都控制晒。 六位就系由初九至上九，六个爻位的程序，六龙亦都系讲六爻的变化。 御天即系控制，由古至今都系用睇生物有无呼吸来决定生命存在与否。 干道变化即系天道变化，因为干系最高层次，亦可解释为领导人的变换。 各正性命系领导人转换，以前好得势，现在唔知点，充份显示出人治的社会，中国人的生命系无保障的。 唔止系天道变化，人命无保障，领导人改变或者执位，都会令到人民百姓的性命无保障。 保合大和乃利贞，利者和也，贞者坚持也，大和就系大家共处，能够一齐共处，就一定要对大家都有益而且可以坚持。 首出庶物，万国咸宁，庶物就系天下万物，首出即系取用、利用。 可以取天下万物为用的唔使讲就一定系领袖或者系国君，先至有这样的能力。 万国咸宁，一个国君系咁样，其他的国君都会效法，唔好执输。

**彖曰：天行健，君子以自强不息。 **象传同彖传嘅分别就系彖传系孔子用来解释卦词之用，象传系用来解释每一爻的爻词，系以前写成彖传曰，或者象传曰，现在就变成了彖曰、象曰。 呢个彖词同象词系出自十翼，十翼的次序：一上彖，二下彖，三上象，四下象，五上系，六下系，七文言，八说卦，九序卦，十杂卦，所以易经就有十二篇。 讲番呢个象词，健系运行不息的意思，天道运行，四时交替，昼夜转换，自然界运动永远唔停，永无差错，就叫天行健。 君子以自强不息，呢个以系学习咁解，君子即系领导人，作为一个领导人应该自强不息。 以前天系最大的，样样都以天为榜样，因为天系唔会芔出错，只会发恶，只会喜怒无常，所以后来的王帝索性将自己当系天既仔-天子。 由君子变成了天子，就更加肆无忌惮，骑在人民头上，做什么人民都唔敢出声，因为佢傚法个天，天系唔会出错，俾自己一个好好的籍口。

占到呢一卦问前程，乾卦六爻皆阳，阳为刚健，刚阳过头，讲事就未必咁顺利，好容易会有突然间出现了波折，或者意料之外之事，同时刚阳过头代表处事唔会探纳其他人的意见，容易俾自己的性格所累。

问婚姻未结婚就要考虑清楚，如果结了婚就要坚忍。 呢一卦唔主张离婚，因为元亨利贞，讲究坚忍正道，同时亦都充份表示大男人主义，所以要坚忍的系女人。

问事业，如果做生意就主张独资，因为干系唯我独尊，独断独行，所以无合作可能，打工就主有升职机会，唔主张转工。

**初九：潜龙勿用。 **第一爻，亦即系最下一爻，在中国龙系被视为神秘的吉祥物，亦都代表一种吉祥之气。 用现在的眼光来睇，龙系一种海陆空三栖动物，系无所不能的，系好伟大的，所以由商朝开始就已经将领袖套了落去龙的层面上。 但系现在呢个龙，即使系领袖最多都系一个未来的领袖而已，完全唔敢显露自己，亦都表示有自知之明，知道自己能力未足，太早表现自己就只有招人嫉忌，好似初初进入一间公司，发觉你上司的工作能力原来差你好多，自然就想取而代之，但系在这个时候你都要隐藏实力，唔好表露你的意图，因为时机未到。

**象曰：潜龙勿用，阳在下也。 **龙系一种飞腾活跃，好有志气的物体，系唔钟意被困住，但系现在都要匿埋。 潜即系匿埋，勿用即系唔好发挥住，要忍。 点解龙都要忍，就系因为阳在下也，因为未到你，引伸到现在就系运未到。 潜藏有积聚的意思，运未到就千祈唔好自暴自弃，要傚法潜藏的意思，等待时机。

占到呢一爻问前程，表示来问卦的人重未行运，唔单止未行运，重可系处在衰运之中，要对佢加以鼓励，劝佢积聚实力，以待时机，成个卦系刚阳过度，所以问题一定系出于人事上面，所以要解决问题就一定要从人事上着手。

问婚姻表示未到时候，结婚实力未够，离婚怨气又未够，等下先啦！

问事业要创业就重未系时候，打工就宜静不宜动。

**九二：见龙在田，利见大人。 **见龙=现龙。 九二系阳爻在中位，叫做刚中，亦即系初初咁解，龙系大人物，初初俾人赏识佢嘅才干，时机开始成熟，唔使再匿埋。 但系距离吐气扬眉的日子重远，点解？ 因为利见大人系指上司或者君王天子无嫉忌你，无对你加以扼杀。 所谓利见个主动权不在自己呢度，主要系自己处于二爻位置，只系刚中，唔系刚中正，所以只不过系刚刚露出头来，初初有机会表现自己的才华，你的上司或者君主无忌你的才干，俾机会你继续发展，所以呢一爻系好的。

**象曰：见龙在田，德施普也。 **见=现，田=土地，施=影响力。 叻的人已经出现了，在田即系已经见到，唔使再匿埋，虽然重未到会飞会「未」的地步，但系已经开始发挥他的影响力。 德施普也，佢所做的事开始对其他人有影响力。

占到呢一爻问前程，有发展机会，同时亦有贵人出现，做生意以前好困难，现在就开始顺利嘞。

问婚姻表示接近成功阶段，如果要真正成功就要有个长辈帮助就实得。 呢一爻唔主张离婚，如果来问卦，对方想离婚，而自己唔想离婚就要拖，因为会有其他的人或事影响对方打消离婚之意。 如果自己想离婚，就自然有一个有力人士出来影响你，令你唔会离婚，因为系德施普也。 德系正面的，德施系一种正面的影响力。

问事业可以同人合作，呢一爻系未到自己拿主意的时候，所以就算合作都可能系占细份的，打工就表示会有升职机会。

**九三：君子终日干干，夕惕若，厉无咎。 **干干可以读成健健，惕系担忧，挂住，若系助语词。 健系动，九三系下卦的极位，表示初初升到高位，未曾稳固，好多事做，好忙，忙到点呢，唔止终日，仲要夜晚都无得停。 唔止咁样，如果系忙，就只不过系健健而已，现在唔系系劳动，重系夜晚都要担忧埋。 呢一爻话君子即系领导人个位唔易坐，唔好睇见九三阳爻居阳位，就认为都顺利，原来唔系，呢度话越高级原来系越辛苦，但系厉无咎，虽然辛苦，但系都无过失。

**象曰：终日干干，反复道也。 **终日干干，至到夕都重要惕，即系根本无一刻可以松懈，就系反复道，在易经里面系讲究变化之道，但绝对唔系任意变化，系要跟住一个轨迹来变化，呢个执就系反复，九三系在下卦的高位，再上就系上卦的低位，呢一爻可以进而上高位，亦可以退而下低位，由上向下叫反，由下向上叫复，反反复复都系在同一条路上，同一个执迹上，呢一爻话你好勤力，好谨慎， 好诚惶诚恐，但系都无乜进展。

占到呢一爻问前程，事情已经开始了，开始达到目的，但系千祈唔好松懈，重要更加勤力才可。

问婚姻，呢段婚姻就唔会太开心，但系都唔主张离婚，反复道，嗌完交又会好番。

问事业表示无论合作的人有几多，所辛苦的都系自己，因为怕有过失，成日自己反省，所以自己辛苦，打工的就表示来问卦的人系一个好尽责任的人，得到老板器重，唔主张变动。

**九四：或跃在渊，无咎。 **或：表示疑虑或者进退维谷，跃：表示脚已经离开地面，但系末曾飞起，渊：望到天空的一个好深穴洞，唔知有几深。 呢一爻话飞定唔都仲未定，拿唔定主意，个环境系表示冲过去系好，但系心里面有所犹疑，因为九四系阳爻阴位，再上就系九五，去到九五就你好啦，但系自己未有咁既勇气，呢度既无咎系话即使系犹疑都无问题，并唔系话处事犹疑系好，而系话仲有时间俾你犹疑，仲有个空间俾你谂下，所以无咎。

**象曰：或跃在渊，进无咎也。 **呢个象词就要加强信心，跃就出渊，不跃就在渊。 进无咎，主张唔好犹疑，呢一个卦每一爻都系讲个领导点样做野。 呢一爻系要当机立断，一般的书上解释为进退皆可，其实系唔明白易经成书时候的社会背境。 商周时代都仲系部落制，酋长制，各族之间为了争夺水源同草地，不断互相侵并，只有去吞并别人，自己先至会壮大，所以绝对唔系其他书所讲的进又得退又得，系只有进，无得退，退就俾人吞埋，所以无得退缩。 最后话进无咎也，唔逃避就无咎。

占到呢一爻问前程，就表示面临一个重大的决定，问卦者正在犹疑，爻象显示一定唔可以退缩。

问婚姻唔好谂，「拿拿林」拉埋天窗就好，如果问离婚就一定离得成，因为一心要离开呢个环境，所以一定离得成嘅。

问事业就唔主张合作，因为呢一爻讲大事要自己决定，打工就跳槽好过留低。

**九五：飞龙在天，利见大人。 **飞龙系事业的代名词，在天系去到最高，自己去到最高嘅位置。 利见大人，这里的利见大人同九二的利见大人唔同，九二系自己仲未蒲头，重要靠人撑住，呢个大人就系撑住自己的。 呢爻九五的利见大人就系自己经达到最高位，去到最高峰，大人就变成了自己，利见变成了你来见到我就好了。 呢度系讲个立场唔同，我现在已经高高在上，你到我系你有益，同九二的利见大人系相反的意思，呢一爻有一个托大脚的经典故事：宋太祖老赵问佢个国师，乾卦的九五爻飞龙在天，利见大人，点解平民百姓都可以占到呢一爻架，国师答佢话：「占到呢一爻就系皇上系飞龙在天，而我地就利见大人。」以后的读书人就好推崇呢个讲法，认为呢个国师的应变能力非常好。

**象曰：飞龙在天，大人造也。 **大人即系龙，造即系达到，大人造即系飞龙在天，己经达到目的。 呢一卦系领导人专用的卦爻，九五爻系表示龙去到最高位，所以有九五至尊呢个名词，本来系好好，因为龙系吉祥物，所以应该系有益天下的，但系由初爻一路上到呢度都系阳爻，一直都无阻滞，无反对，形成呢个九五爻好自大，好自满，就形成了有上爻的情形出现。

占到呢一爻问前程，谋事成功的机会好大，同时要检讨自己的性格会唔会过桥抽板，因为呢一爻系讲成功了之后个立场掉转咗，由要靠人帮变成手握大权，立场改变自然性格亦都会变埋，俗语谓做咗鬼就会迷人。

问婚姻就系一个好的卦爻，经过好多事之后卒之成功了，呢一爻系表示会成功。

问离婚系唔好啦，唔系表示离婚都算成功，其实系误解，因为离婚系失败的婚姻，所以唔符合呢个爻义。

问事业唔主张合作，因为九五之尊系无人可以同佢平起平坐的，所以合作根本唔使提。

**上九：亢龙有悔。 **亢：高的意思，又系盈满的意思。 易经的变化规律，讲究中和，物极就一定反，乾卦由开始已经系阳爻，刚健太过，并无一个平衡点，到上九更加系刚中之刚，九五已经系阳的尊位，到上九更加去到极端。 九五系君，上九就系暴君，只系识得进，不断进攻，唔识得休养生息，成功了之后就趾高气扬，不可一世，目空一切，就系上九的写照，一个人成功到达自己好满意的时候，性格就会出现刚愊自用，再唔会听取其他人意见，更加唔可以容纳唔同的意见，呢种就系亢。 跟住变成一个顽固的自我封闭者，因为身处上爻，再无得应，所以就孤立，就产生悔，就系有悔，但系太迟了，因为唔可以再番转头。

**象曰：亢龙有悔，盈不可久也。 **由初九至九五，一爻好过一爻，到了上九已经到达极，再无「比」，即系话六爻之上再无位上，再无人可以盖过佢，就系盈，但不可久也，呢种情形唔会维持得好耐，因为阳系唔会静止的，但系去到尽头则动有问题，所以注定会有问题。

占到呢一爻问前程，表示来问卦的人好唔满足，不断追求，亦无停止的一日，呢种人天生系一个劳碌不休，同时亦系一个孤独的人。

问婚姻好难得美满，因为不断追求完美，可能千拣万拣，拣个烂灯盏。 占到呢一爻问离婚就好，因为再无转弯的余地。

问事业最忌扩张，呢一爻系讲知进不知退，所以占到呢一爻问扩展而话俾佢听不宜发展，系听唔入耳的，因为知进又知退系只有圣人先至做得到，但系世上圣人有几多呢，所以有时只有睇住佢衰，唔可以救佢。 打工的唔系跳槽而系俾人炒，因为无论你做得点好都无用，客观环境要令你改变，唔系自愿，所以被炒的机会多。

呢一卦的历史背境系周文王被纣王困在由里呢个地方，但系纣王无锁实佢，只不过系唔俾佢出城而已，老周就系趁百无寥赖的时候写成呢一本流传了四千几年的占卜书，如果将呢本书同生物学、化学、数学、物理学、太空科学拉得上关系的话，除非老周系外星人。