《易经》第二卦【地】坤为地#

坤即系地，大地系我地赖以生存的根基，万事万物的基础，坤唔系乾卦咁高高在上，但就俾人觉得佢好实在、好亲切。 坤卦涉及到人喺大地上的衣、食、住、行等等全部重要活动，正因为系咁样，人就一定要倚赖大地而生。 对天就会产生畏惧，因为天会打雷，闪电。 但系对土地我地就会产生一种亲切感，所以有以大地为母亲的赞颂。 人类由远古的狩猎生存方式，过渡到畜牧业，由畜牧业转形到农耕业，而一路到工业、商业，亦都系由漂泊、冒险，步向安居乐业，在呢个过程之中，人类对大地产生无尽的亲情。 乾代表天，天只有令人畏惧，令人敬畏，坤代表地，令人有亲切感，令人安居乐业，卦辞话：

坤：元、亨、利牝马之贞，君子有攸往，先迷，后得主，利西南得朋，东北丧朋，安贞、吉。

卦名的意思系地道、臣道，象征阴柔。 呢个阴柔系大地的美德，包容而唔占有，坤卦的卦爻与乾卦相反，由全阳变成全阴。 乾系阳，坤系阴，乾为君，坤为臣，坤卦讲的系包容同伟大。 天下万事万物都系顺住一个方向而行，干系天道，坤系地道，地道静止的时候，系极之柔顺的，但系动起上嚟就会变得刚强，亦都系代表左女人的性格，柔顺的时候乜都得，但系反起面上来亦系最劲。 卦辞用雌马来代表，因为雌马系永远唔会超越雄马的头。 坤系卦名，坤卦系象征地，亦都象征顺，所以坤系以顺，以柔为主。

元、亨，解法同乾卦差唔多，可以解为本体系亨通的。 利牝马之贞，贞系正，牝马系雌马，又柔顺，又能跑，引伸为女人又捱得，又无怨言，所以自古以来以坤作为有德行的女人，用坤来代表叻的女人，对男人有助力的女人就冠以坤德之名，又如皇后所住的地方就叫坤宁宫。 君子有攸往，先迷，后得主，利，呢几句话坤的好处在于柔顺，居于后面，要做成一件事一定让男人先。 先迷，如果抢先，一定迷失。 后得主，随后则有利，如果先，就迷而失道，所以话先迷，阴以阳为主，一定要以顺而后之就得利，所以话后得主，利。 自古以来坤系代表臣，乾系君，坤系代表妻，乾为夫，所以话超越就迷，跟进后面就利。 西南得朋，东北丧朋，周武王左西南方有好多友好的邦交部落，有庸、蜀、羌、弟、微、卢、彭，派等八个小部落，都系南方，所以西南方系自己友的地方，向西南方就得朋，朋亦可解为朋贝，即系钱咁解。 而周封地的东北就有个强敌叫鬼方，所以向东北唔单止无朋，重会有损失。 另外好多书都解释为西南方多同性，西为兑，南为离，而东北为艮，正北为坎，震为东，一边全为阴卦，一边全为阳卦，同性为朋比，唔同性为敌，呢度的得朋同丧朋系有同无咁解。 安贞，吉系总结左得朋，丧朋，经过咁多经历之后，坤的德行要以安顺守正为吉。 六十四卦以乾坤为开端系由周易开始，相传在夏朝系以艮卦为开始的连山易，究竟点解现在已经唔知，但系佢唔重视乾坤两卦，就话俾我地知夏朝唔识得有天地而后有万物的道理，到左夏商之间流行归藏易，以坤乾为六十四卦之首，反映当时已经将坤卦同乾卦嘅地位提高，但亦都充份了解万物生于天地的观念，但仍然系差D。 到左周易的出现，发展成乾卦第一坤卦为二，先至真正表现出有天地然后有万物的意义，点解要乾先坤后，睇吓个彖辞就明白。

彖曰：至哉坤元，万物资生，乃顺承天。 坤厚载物，德合无疆。 含弘光大，品物咸亨。 牝马地类，行地无疆，柔顺利贞。 君子攸行，先迷失道，后顺得常。 西南得朋，乃与类行; 东北丧朋，乃终有庆。 安贞之吉，应地无疆。

至哉坤元，万物资生，乃顺承天，呢段解释“坤元”，坤卦讲至哉坤元，而乾卦讲“大哉乾元”，乾为大，坤为至，一个大，一个至，大同至系有分别的。 干的象系天，天大而无疆，疆系边界，因为无边界，所以就无所不包。 坤象地，地系有疆界的，必有尽头的，所以坤体不如乾体之大，在公元前二千几年就已经知天无界地有界，所以乾叫做大，坤叫做至，至系有极限。

万物资生，乾卦话万物资始，一个始，一个生，其实就系天地相合共生万物，生成万物方面，天地不可缺一，亦即系阴阳不可缺一，既然系无左边个都唔得，点解唔两个都系生或两个都系始呢，原来有分别，就系阳代表气质，阴代表形体。 例如人的父亲处得到气质再在母亲处得到形体，就系始，同生的分别。 乃顺承天呢个天就系乾，坤的性质系顺应干，以乾为主，而自己系配，呢度引伸到女人同家庭的关系，无论一个女人叻到乜野程度，最终都系要以家庭为最重要，绝对唔会凌驾家庭之上，有出风头的场合，一定俾个老公去威，有机会有前途的事一定会为自己的仔女争取，呢D乃顺应天的特性。

坤厚载物，德合无疆，含弘光大，品物咸亨。 呢几句主要都重系讲乾坤，主从的关系，干系天，天系运行不息，系动; 坤系地，地系厚系静; 载系胸怀，地生万物，佢生出来的，乜野都可容纳，无论在地面试爆核子弹，或者系裁种兰花，一样容纳。 不论系九优一良抑或系廋文翰，一样系如珠如宝，不离不弃，就系德合无疆，无疆即系无尽，引伸出母爱的伟大。 至于含弘光大，如果遂个字解，含系无所不包，样样都可以容纳; 弘系无所不有，本来已经有的，呢个系讲地下资源，古人并唔知道地下有咁多可用的野，只系知道放乜野种子，就生乜野，只系知道造屋系用地下的泥土，因为已经过左三皇的阶段。 三皇就系伏羲、女娲、神农，已经有五谷同埋草药。 光系无所不照，大系极目穷望都未到尽头。 在易经里面，光有两个解释，一种系光明照耀，一种系广大，呢度应作广大解，呢句应该解释为胸怀广大，有包容而无怨恨，有柔顺的特性而无阴险。 品物咸亨，品物系解万物，咸系环境，万物在咁有爱心的环境下生长当然柔顺亨通。 牝马地类，行地无疆，柔顺利贞，君子攸行。 地类即阴类，阴类即系坤，以柔顺的雌马代表坤的德行。 行地无疆，去边都得。 柔顺利贞，唔好超越就好，有料都唔好企前面，好似跑马咁，一出闸守住二三位。 君子攸行即系坤之道，君子系应该效法，最好的例子就系周恩来。 「先迷失道，后顺得常，西南得朋，乃与类行，东北丧朋，乃终有庆」，先迷失道，后顺得常，唔居功，知道自己有几多料，企番自己应该企的位置。 西南得朋，乃与类行，西南系自己的地头，唔离开自己的地头，因为有自己的同类。 东北丧朋，乃终有庆，东北方并无自己的同类，原来，早己经知道，有庆，无问题。

安貞之吉，應地無疆，呢度的安貞主要係人事，有器量，有容人之量。應地係指坤，無疆係無界限。呢一段彖辭裏面有三個無疆，第一個合德無疆係講犧牲自己，好似上面所講的母愛，成全他人。第二個行地無疆係容忍他人，有量度無仇恨，採取和而不同的態度，就邊度都可以去。第三個應地無疆好似地咁樣可以包容萬物，有時明知係蝕底，都唔會斤斤計較，好似現在Ｄ人，做左好多對大地不利的野，但係大地都無發嬲。

象曰：地勢坤，君子以厚德載物。載＝承托

乾卦講天行健，坤卦講地勢坤，呢兩句係相對性的。天道係動的，地勢係靜的，地勢坤即係地勢順，即係順勢。君子以厚德載物，君子，有能力的人，有寬厚的胸懷，包容天下萬物。成段卦辭借坤來形容大地，一方面取其柔順，一方面取其深厚，包容。坤唔一定係女性，而係指企在後面，成全他人，而又肯去承担的人，好似登上喜瑪拉雅山的鐘健民，佢唔係最叻，功勞係佢背後嗰班人，但係佢背後嗰班人並無要求影相。乾坤兩卦，乾卦係好多缺點，而乾的缺點由坤填補晒，所以在六十四卦之中，無邊一卦好得過坤卦。

占到呢一卦問前程，表示來問卦的人一定要有容人之量，亦都要較為低調，因為呢一卦係講要知自己的事位置，唔好過龍，所謀的事事未有咁快可以成功。

問婚姻係一段好實際的婚姻，唔會好浪漫，問結婚就好，問離婚就唔符合卦義，因為呢一卦主旨係以順從為主，如果離婚就必有一方唔肯順從。

問事業：讚成創業，亦都主張合作，打工就唔主張跳槽。

初六：履霜，坚冰至。 履=踩到 坚冰=已经积咗好耐的嘢

出门口踩到霜，知道就来落雪，呢一爻的事意思系阴气初初开始。 阴代表左唔好的事，亦都代表左麻烦的事，因为坚冰至。 所以呢的麻烦初初好细，但系好快排山倒海咁来。 呢一爻话好多大麻烦都系由小麻烦而引起，所以一发觉有小小唔妥就要即刻处理，唔好等到变大麻烦就难搅。

象曰：履霜坚冰，阴始凝也，驯至其道，至坚冰也。

驯=开始 至=极

呢度的履霜坚冰可能系错的，因为霜同坚冰唔可能同时出现，应该系见到霜，就快有冰出现，因为孔子系最重名份同埋名次。 所谓名不正，言不顺，呢度既然已经有霜，唔使几耐就会有大冰雪。 驯至其道，系小人之道，小人之道开始的时候需然系好微小，无乜伤害，但系如果唔理佢，唔防范佢就会越整越大，初初可能偷个公文袋，如果唔及时制止可能成部电脑都偷埋。 至坚冰呢一爻系讲人事的处理手段，用四个字「杜渐防微」，呢一爻阴居阳位，所以佢唔系好人，一开始就要提防，点解呢？ 因为易经成书的年代系商周之间，在呢个年代之前由母系社会转为父系社会无几耐，讲究阴阳合德，另一方面又强调阳和阴应。 阳系光明，阴系邪恶，将崇高，善良，正确都归俾阳的一边，将卑微，丑恶，的都归纳去阴的一边，采取扶阳，压抑阴的态度。

占到呢一爻问前程：所谋的事开始有D成绩，就来会有大发展，就快有收获，呢度绝对唔会理会所谋的系好事定系坏事，因为一件事根本就无好坏之分。

问婚姻：呢段唔系一段好的姻缘，常因小小野就吵大镬，问结婚就唔赞成，问离婚就好快趣。

问事业：唔主张创业，亦唔主张合作，因为初初就几好，整整下就衰，打工就主张转工。

六二：直方大，不习无不利。 直=向前伸延

卦主，六十四卦每一卦都有一爻作为卦主，乾卦以九五为卦主，坤卦以六二为卦主，因为六二最纯正。 六五虽然系尊位，但系五爻系阳位，变成阴居阳位。 六四阴爻，阴居阴位，但位啱而唔够中正。 三爻阴居阳位，不中又不正，只有六二柔顺中正，四样都齐，而且居君臣的臣位，又系地的象征。 直方大，方系讲坤，因为天圆地方，所以五行土的形系以方作为代表，呢度的方就系坤地的代表，呢度讲直方大，系无机心，因为圆者动，方者静，广大而闲静，心胸广阔，系唔使学的，所谓地德，心地正直，行为端正，系无得学的，系学唔到的。 不习无不利，唔使<专登>去学的，只要将呢种本性伸延出去就得嘞。

象曰：六二之动，直以方也，不习无不利，地道光也。 以作而字解，直以方即系又直又方咁解，坤本来系静的，点解呢度话六二之动呢？ 因为直以方也，动起上来同乾卦一样，地不动尤自可，一动起来非同小可。 不习无不利，地道光也。 孔子话，心性的自然流露系直，方系端正，不扭曲，大系宽大，习系修饰，系唔需要有心计的，唔需要做作出嚟，本来就系咁好。 地道光也，知道自己的本份。

占到呢一爻问前程：所谋的事一定会有变卦，随时会有相反的情形出现，因为呢一爻由静突然变动，所以有变动。

问婚姻：问结婚就好，唔主张离婚，因为卦主系显露坤的德行，但系如果女人问离婚就一定离得成，因为六二之动直以方也，无得反对。

问事业：主张创业，亦主张合作，打工宜静不宜动。 但系如果动紧的就主张动，所以可以创业，有工做紧的唔主张郁。

六三：含章可贞，或从王事，无成有终。 章=文采，含=内在阴居阳位，含章可贞：将自己的好野收埋，唔俾个老细知道自己叻过佢。 或从王事，或系谨慎，要好小心，唔好过头。 无成有终，无成唔系无成就，而系成功而不居功，将所有的威水野俾晒老细，咁就好勒。

象曰：含章可贞，以时发也，或从王事，知光大也。 知=智，自己好叻，但系好唔够运，搵唔到个好老细，自己的位置唔啱，明明好叻都唔敢表露出来。 以时发也，等待时机。 或从王事，智光大也，呢度唔可以发挥所长，就要等待时机搵过第二个老细，呢度或从王事同上面的或从王事唔同，上面系诚惶诚恐，要好小心唔好叻过佢，呢度系我等紧机会，或从王事唔同你打工。 智光大也，在未有机会的时候，就忍住先，忍得到，系智者所为，智光大，唔系普通人得的。

占到呢一爻问前程：暂时未有发展的机会，都要等吓先。

问婚姻：一定唔好叻过对方，呢个对方系讲老公，如果样样要叻过老公，呢段婚姻就有问题。 问结婚就好，问离婚就唔符合爻义，因为呢一爻系讲究迁就忍受，所以唔主张离婚，女人问就唔会成功，因为要忍的系女人。

问事业：唔主张创业，因为创业就要充分表现自己的才能，所以唔符合爻义。 主张合作，系唔需要自己出主意嘅就可以放心投资，例如买基金。 打工就要等机会跳槽，因为再留低都无乜发展机会。

六四：括囊，无咎，无誉。 括囊=索紧个袋口。

六四已经去到较高的位置，但系都未系发挥自己所长的时候，唔好以为阴爻阴位就好，因为系未曾得中。 括囊呢度解合埋个口，唔好讲好「桥」出来，因为未遇到一个有量度的老细，唔好表露自己的才能，呢D系中国的处世哲学。 孔子认为系超越上司就唔好，初初就以谦虚为出发点，后来就演变成虚伪。 无咎，无誉，无受赞赏，亦无祸。

象曰：括囊无咎，慎不害也。 虽然好低调，但系都要小心，唔好俾人笃背脊。 呢度讲虽然已经好低调，但系都随时有人害你，所以要小心。 慎不害，呢个害系把柄，唔好俾人有机会执到籍口攻击自己。

占到呢一爻问前程：问卦者现在未行运，千祈唔好争住出主意，因为未到出位的时机，最好就唔出声，要搅嘢暂时都未有发展机会。

问婚姻：如果未结婚就表示会有人破坏，问结婚就好，问离婚就唔成功，因为呢一爻系唔主张变动，亦都唔主张有人出主意，离婚即系有唔同的意见，提出唔同的意见就更加唔啱，所以唔主张离婚。

问事业：就唔主张合作，亦唔好创业，打工亦唔主张跳槽，小心D保住份工先至系真既。

**六五：黄裳，元吉。 **黄=土的颜色，裳系裙，而家变成裤，想知道当时的服装，睇吓韩国的民族舞服就知道商周年代既衫系点，男男女女都着裙盖住条裤。 黄色的衫唔系人人都着得，你立左功，有功劳就俾件黄色的衫你着，所以跟住话元吉，着住件黄色既衫去到度度都有人俾面，呢个习惯一直沿用落来，以前少林寺D俗家弟子，只要由木人巷打出去的，都会俾个黄色的袍服佢着住，王室对D有功劳嘅奴才亦会俾件王马挂佢着，着住件王马挂可以打横行，好似年羹尧咁。

象曰：黄裳元吉，文在中也。

着住件黄衫，虽然系好威，但系睇清楚原来系黄裳，即系下裳。 文在中唔好炫耀呀，以前下裳一定系俾件上衣盖住，绝对唔系而家咁束入条裤或者条裙里面，呢度的意思系虽然好叻，但系都要低调。 在中即系收埋自己，孔子教人话有麝自然香，唔使扬出来的，重要讲究善欲人见，不是真善，美德系唔俾人知的，唔会自我炫耀，讲究中和谦卑，但系现在就讲自我吹嘘，宣传。

占到呢一爻问前程：表示才干有机会发挥，但系都唔好太过扬，

最好就系将D功劳俾晒人。

问婚姻：未结婚就好快成功，赞成结婚，唔主张离婚。

问事业：可以创业，亦都赞成合作，打工就唔主张转工。

上六：战龙于野，其血玄黄。

一路忍，忍到呢度就忍无可忍，样样都俾佢叻晒。 战龙于野，龙系干，系天，系上司，系男人，一于同佢挥过，但系最后两败俱伤，龙的血系黑色既。

象曰：战龙于野，其道穷也。 道=容忍。 上到来呢度讲坤卦的成长过程，认为一路忍唔系办法，一定要展示自己既实力，有能力将乾撼低，血流大地。 但系孔子唔赞成，佢话其道穷，话佢走投无路。

占到呢一爻问前程：有大发展的机会，但系又斗争得好剧烈，话唔定要同以前的朋友拍挡反面，但系呢度主张一路做落去，唔退缩。

问婚姻：唔系一段好婚姻，问结婚唔好，离婚就好，因为敢于反抗。

问事业：就唔好合作，可以创业，打工就预备转工。

呢一卦的意义系讲下级对上级要柔顺，要忍让，由母系社会转上去父系社会，完全一面倒的女子无才便是德。 D女人稍为有小小成就，孔子即刻唔抵得，好似六五话黄裳元吉，受到夸奖，系好好的，但系孔子即刻在个象辞度加多一句文在中也，要你将D好野收埋，将D功劳让番出来，到左上六就更离谱，反抗少少，孔子即刻话其道穷也，佢的意思系世界没日，所以由始至终呢个世界未平等过。

不过我地唔使理佢讲乜，只要明白呢一卦的真正意义，系讲一个成功的领导人，或者一家之主，一定要有一种见微知着的能力，即系见到少少风吹草动，即刻预测到个结果，最低限度都预测到呢件事的趋势。

呢一卦有一个出名的占卜记载，话说曹接收左汉朝的江山，遇到黄河泛滥成灾，地点在河南省，佢想知道实际灾情，搵曹柸问吓，但系曹柸懵懵闭，唯有搵佢门下一个食客<司马 懿>询问，一问之下发觉呢个司马仔对答如流，顺便问下其他的设施，都系了如指掌，曹系一个疑心好大的人，有个咁叻的人在自己个仔身边，觉得好唔妥，搵个幕僚占一卦问吉凶，得到坤卦二爻，爻词话：履霜，坚冰至. 个幕僚解释为凶象开始形成，如果唔压制佢，就会发展成大凶之事。 曹操就本住有杀错旡放过的宗旨，布局杀呢个司马懿，但系几次都俾佢睇穿而走甩左，所以到曹操死的时候而呢个司马懿未死，搅到佢死都唔眼闭。