《易经》第三十八卦【睽】火泽睽#

火泽睽同风火家人彼此相反，家人系夫妇通力合作，睽系离异，乖离的意思，家和万事兴，不和就一切都背道而驰，所以话家道穷必乘，屋企人唔再合作就一定背离，睽卦的卦形由火同水所组合而成，火往上燃烧，泽之水往下流，水火本不兼容，互相背离，大家反向而行，成睽违之局，睽字的解释系（目不相视），大家猜疑对立，呢一卦最初系一个旅行卦， 呢一卦的画面系旅行之前占的卦，古人好重视出远门，呢一卦系话一个人佢出远门之前占到个凶卦，心里面好唔舒服，果然行左无几耐，只马走左，追唔番，不过谂下都唔紧要，只马养到熟，同自己有左感情，都唔会走得好远，果然只马自动走番来，行到半路遇到一个凶神恶杀的人，以为死梗，遇到强盗，对果个人处处防范，但系后来知道佢系一个面恶心善的人， 在现实生活之中，个个猜疑，互相唔敢信任，只有排斥，都好辛苦，明知咁样系唔岩的，但系由于偏见，无量度，亦唔肯主动去寛大包容，根本唔肯去睇清楚个件事的真相，时时刻刻都处在防范的紧张态度，对一切的事物，人事，人与人之间都唔知互相信任为何物，根本唔知道可以和而不同，可以求同存异，彼此可以信任，帮助，但系我地通常见到的系歌颂之声， 同埋听D钟意听的说话，唔使讲都可以知道真心，诚意有几多，在暌违相背都认为好正常的社会，好多时候都系难以如意，但系应该坚持自己的原刚，顺应大势，在异中求同. 既不同流合污，亦都不急于求同，更加唔使处处排斥，要懂得变通，因为处在睽呢种环境中，应该立定主意，坚守正道，见到不屑一顾的人，唔使立刻反对人地，但又唔可以俾佢同化，用和而不同的态度应付处在睽的环境就最适合，基本上呢个系一个求同存异的卦，唔放弃大原则，小事可以偏离正轨.

睽：小事吉. 睽：系违背，唔岩牙.

小事吉，即系大事凶，大事即系中心思想，大事即系共同目标，偏离左共同目标就凶，小事系只要你唔偏离目标，中途就算有D小动作都无所谓，大方向唔变原则无变，小小偏离无所谓. 吉并唔系真吉，只不过系唔凶啫. 睽，系（拗撬）做一件事的时候，你话你的好方法，我话依我的经验应该咁样做，搅到好唔愉快，其实目的都系只有一个，而且系一个共同的目标，就系大家都想将个一件事做好，所以小事吉，小小争拗无问题. 在小事上有D唔岩牙都可以容忍，唔系真吉.

彖曰：睽，火动而上，泽动而下，二女同居，其志不同行.

说而丽乎明，柔进而上行，得中而应乎刚，是以小事吉，天地睽而其事同也，男女睽而其志通也，万物睽而其事类也，睽之时用大矣哉.

睽，火动而上，泽卦而下，二女同居，其志不同行. 系解释卦名点解叫做睽. 睽卦上卦系离，下卦系兑，火向上而泽向下，虽然在同一卦中而性质唔同，离为中女，兑为少女，两个女仔住埋一齐都系想住同一样野，都系想住要嫁，但系对象各有不同，要求亦都唔同，呢两个女仔有相同的一面，都系想住去嫁，同时亦有唔同的一面，所唔同的一面系好明显的，呢种就系睽. 睽违的事物必须有一个大前提系相同的，其他的枝节可以唔同，如果两样野完全唔相干的就根本无所谓睽。 说而丽乎明，柔进而上行，得中而应乎刚，是以小事吉. 由卦形睇，火向上，水向下，两个女仔在埋一齐，讲的系事物动而相睽违的一面，呢一段讲的系事物有睽必有合的一面. 说系指兑卦，丽，明都系指离卦，柔进而上行指下卦系阴，上卦又系阴，由下至上都系柔，所以话柔进而上行得中而应乎刚，是以小事吉。 得中系柔爻之六五，应乎刚系九二，二五相应，唔系正位，所以小事唔岩牙都无乜问题，因为有阴阳相应的关系.

天地睽而其事同也，男女睽而其事通也，万物睽而其事类也，睽之时用大矣哉. 孔子在呢度进一步解释睽的普遍意义，同埋应用价值，佢话睽呢种态度好似唔系点好，而实际上任何一件事无睽系唔得的，即系无反对意见系唔得的，无论在朋友平辈之间，一个家庭，一个集团，甚至乎一个国家，如果只得一个人讲野，一个人话事或者系只得一边的人讲野，完全无不同的意见，咁样无论系一班朋友，一个家庭，一个集团甚至乎一个国家都唔使慌会进步. 由此可知睽并唔系完全负面的，最低限度睽呢样野有一种推动的作用，例如天地睽而其事同表示天同地的分别系无限大，但系长养万物的目的系相同的，男女睽而其事通，男同女的分别无论体形同性格都好唔同，但系生养下一代的目的都系一样的，爱心亦都系一样咁爆棚的. 万物睽而其事类. 天下万物原则上都无相同的，但系每一样对象都有佢的用处，各有各的用处，其实就系分工，分工的目的就系为左合作，睽之时用大矣哉，表面上的唔同，实际上的目的都系一样，所以睽系有好大的作用的，无睽家庭，无睽的集团，无睽的国家，唔系越来越衰就系就快玩完，或者系一穷二白，好似香港的公务员体制，可以搅得咁好就系上司同下属之间有睽呢样野存在. 所以睽的用处真系好大，直头大矣哉。

象曰：上火下泽，睽，君子以同而异.

兑同离都系阴卦，离火在上向上，泽水在下而又向下，就系睽违之象，君子认为睽系表面唔同，原则系一样的，因为大家都系阴卦，可以同又可以唔同，可以同系本体，可以唔同的系表面，可以同，未到底线就即管同，但系过底线就绝对唔可以同，就系以同而异. 占到呢一卦问前程：表示来问卦的人现要选择埋堆，究境边堆好呢，就一定要选择一个可以接纳唔同意见的组合，睽违系中心思想一样，而处事的方法唔同，所以一定要好好选择。

問婚姻：表示唔係一段好的姻緣，最忌鬥氣．相啀唔好口．問離婚就岩，問結婚就未係時候．

問事業：創業就好艱難，好多時都會事與願違，合作亦好多意見，打工就搵定新工都差唔多，因為人緣不合，同周圍的人合唔來，留低都無意思．

初九：悔亡，喪馬勿逐，自後，見惡人，無咎．

喪馬：隻馬走失左．悔亡，有突發的事，但係唔使驚，嚇到隻馬走左，好想去追，人追馬梗係追唔到啦，諗諗下點解咁蠢呢？呢隻係識途老馬，佢自己會返來既，過左無耐，隻馬真係走返來，因為養慣養熟的馬係唔識出去搵食的，所以一定會番來的，呢段悔亡，喪馬勿逐，自復。係講對一件事唔好太緊張，越緊張越衰，尤其是對自己有直接關係的事，例如仔女讀書的成績，一般人都係好緊張，甚至將入唔入到名校列為人生第一大事，呢Ｄ就係過於緊張。見惡人，面目猙獰同自己完全唔岩牙的人，有呢Ｄ人在自己的生活圈子裏面，無咎，有呢Ｄ人，唔使採取敵對的態度，就無問題，見到惡人，唔使避開，即係話有唔理想的事，有同自己意見敵對的人唔使當佢係仇人，重要主動解決問題或者主動去接觸Ｄ唔同意見的人，唔使裝晒（降）更加唔使拒人千里。

象曰：見惡人，以辟咎也．

辟：即係避

孔子话个D衰人，唔使避开佢，重要主动去见佢，直接解决问题，佢话见恶人，以辟咎要主动去搵佢，将D问题解决，唔系避见恶人，呢D情况最常见的就系一间公司的股东争夺战，差小小票数就可以通过自己的提议，就要周围搵D唔同自己意见的人靠埋自己呢边，以增加自己的票数，通过自己所提的动议，就无咎.

占到呢一爻问前程：表示对身外物唔使紧张，但系对理想就要争取，唔好因为周围环境唔理想就谂住放弃.

问婚姻：女人问卦就唔好将对方睇得太重要，唔好太过紧张对方，如果男人问卦就要积极D，因为有对手，问结婚就好，因为系解决问题. 问离婚就唔赞成.

问事业：创业同合作好辛苦，因为会有损失，同埋唔系咁齐心，打工就可以转工.

九二：遇主于巷，无咎.

遇：礼仪简单的相见叫遇。 礼法齐全的相见叫会。

主：系指高级过自己。

巷：系随便的埸合，唔系隆重的场合.

遇主，一般都解成遇到王帝，君主，诸侯等等，其实使乜咁样呢，只系要将佢解成遇到高级过自己的人就可以. 遇主于巷，在一个完全无刻意安排的情形之下见到老细，呢个系一个好老细，因为佢无排场，无摆款. 遇主系遇到明主，所以无咎.

象曰：遇主于巷，未失道也.

在无拘无束的情形之下相见，表示大家都好坦诚，孔子话未失道也. 阳居阴位，本来系唔好的，老细唔在老细个位，但系唔紧要，因为大家都有诚意，所以唔使计较D枝叶的问题，虽然无排场，唔系在隆重的场合，只要宾主大家有诚意，其他野唔使斤斤计较，所以系未失道也，呢个未失道也系指个主未失道. 虽然佢去左D唔系佢去的地方，但系无影响佢的身份，后世有一个名词，叫做微服出巡，现在的香港高官常用的，有无诚意就唔知，但系未失道就肯定的.

占到呢一爻问前程：表示会有贵人的助力，人缘好，要做乜野事都好顺利.

问婚姻：问结婚就系一个好的开始，因为有长辈的助力。 问离婚就唔符合爻义，因为呢一爻系讲大家都有一种诚意去合作，所以应该唔会离婚。

问事业：创业同合作都系好的，打工就有转工的机会.

六三：见舆曳，其牛掣，其人天且刽，无初有终。

舆：车厢，多数都解车。

曳：系拉，牵引，在前面拉。

掣：系拉，在后面拉住。

天：系额头刺左D字，即系后世的刺青。 且：更加，重有。

刽：义音，刑罚，即系割鼻，引伸为削弱。

呢度讲架车行紧，前面拉车都己经拉得好辛苦，但系后面有人拉住，唔俾佢行，重整到个样好衰，后来无问题。 照字面来解都好少人可以明白，呢一爻话唔合作，互不合作或者系自己的宗旨摇摆不定，在做一件事的时候，内部不和，会大量消耗力量，一事无成，发觉有呢种情况，即刻醒觉，以前有问题，改左就好勒。

象曰：见舆曳，位不当也，无初有终，遇刚也.

呢件事进行得唔顺利，因为唔能够坚持到底，位不当，自己同合作伙伴都唔可以贯彻到底. 无初有终，点解初初唔好，后来又可以解决问题呢？ 遇刚也，见到有力人士调解. 所以最初的时候，你要做乜野我都掹住你后脚，完全唔合作，重摆出个恶形恶相，所以全靠遇刚也，有人调解。

占到呢一爻问前程：对身边的人唔好采取敌对的态度，要同身边的人打好关系，就会有贵人出现，呢度系要大家同一方向就会成功。 问婚姻：一定有好多心理的障碍，自己认为好的对象就唔使理人地点样讲. 问结婚虽然有阻，但系都会成功. 问离婚唔赞成。

问事业：创业就艰，合作就无乜可能，打工就表示人缘唔系咁好转工好过。 九四：睽孤，遇元夫，交孚，厉无咎。 孤：孤单。 元：系大。

夫：系成年男子。 交：系互相。

睽孤举目无亲. 在失意的时候，一沉百踩，搵个人帮吓你都难，但系好彩遇元夫，遇到一个叻人，呢个人唔止叻，重好好心，点解好心呀，交孚，因为对一个失意的人都肯用诚信去同佢交往. 励无咎虽然在咁恶劣的环境，但系都唔使气馁.

象曰：交孚无咎，志行也.

点解人地在你最失意的时候都肯同你以诚信来交往呢？ 因为你个人不“嬲”都咁好. 志行也，虽然在咁低沉的环境，但系暂无改变自己的宗旨. 所以D叻人，有能力的人，仍然睇起你，认为你重有机会。

占到呢一爻问前程：表示来问卦的人遭到D突发性的损失，令到佢好失意，但系唔使惊，一定柳暗花明又一村。

问婚姻：如果未结婚的而想结婚，表示大多数人都唔同意，但系主张坚持到底，所以问结婚表示有阻力。 问离婚就唔成功，因为爻义表示好唔开心，闹到好僵，但系忍耐一段时间就会平息。

问事业：创业就好多阻滞，合作亦好难，打工就唔主张转工.

六五：悔亡，厥宗噬，往何咎。

厥：音决，晕低。

宗：亲族。

噬：咬。 肤：皮肤，又解肤浅。

好后悔，全世界人都唔岩，众人皆醉我独醒的态度原来系唔岩的，即刻拿拿声埋番堆. 厥宗自己威的时候就唔会同D亲戚来住，但系有难的时候，就走番去认亲认戚，呢种咁样的态度虽然系衰D，噬肤，俾人觉得好肤浅，呢D咁的衰仔，发达就唔识人，现在落难勒，就走番来投靠亲戚，虽然俾人睇唔起，但系咁样做无衰的，往何咎咁样做事实又系无乜唔妥.

象曰：厥宗噬肤，往有庆也.

庆：系好事。

发觉唔妥的时候，千祈唔好死牛一便颈，要即刻转軚，咁样系好事来的，往有庆. 照咁样做法系岩的。

占到呢一爻问前程：做野要以联络感情为主，太过原则性系唔得的，要做成功一件事要靠成班人支持，所以唔可以太坚持自己的立场。

问婚姻：大家的志趣系唔相投，所以一定要其中一方肯迁就，呢段姻缘就可以成功。 问结婚就阻滞. 问离婚就唔成功，因为爻义系发觉唔妥就要转辕，所以离婚无乜可能。

问事业：创业就有阻滞，合作的对象亦都太蛊惑，所以两样都唔系咁好，打工就要转工。

上九：睽孤，见豕负涂，载鬼一车，先张之弧，

后说之弧，匪寇婚沟，往遇雨则吉.

豕：音始，系猪。

负：蒙受，遭受。

塗：途，泥。

載：裝住。

張：係拉開。

弧：係木做的弓。

說：係脫。

匪：係非。

寇：係盜賊。

媾：係結婚，講和，在未結婚之前的追求就叫媾女。

睽孤同九四一樣舉目無親，但係九四的舉目無親係無乜驚險，上九的睽孤就唔同，見到一隻隻野，在架車上面，以為係乜野妖怪，拉弓想射佢，但係唔好咁沖動，睇清楚先，見豕負塗，載鬼一車成車唔知係乜，唔通係鬼，先張之弧，後脫之弧，有理無理，快Ｄ（立傢撐）張弓撘箭嚴陣以待，睇清楚，原來係戴住面具的搶婚隊伍，但係佢都唔相信，點知即刻落左場雨，將個一班人的偽裝沖擦乾淨，可以俾佢睇清楚，就係匪寇婚媾遇雨則吉。

象曰：遇雨之吉，群疑亡也．

經過一件事的考驗，雨唔係真係落雨，雨只不過係象徵一件事，經過一件事的考驗，就表示露出一個人的真面目，遇雨之吉．經過考驗之後，所暴露的未必係好事，但係爆左出來都係好的，群疑亡也，唔使再疑神疑鬼，呢一爻係講大家都互相唔信任，疑心大，唔可以坦誠相對，呢一爻係講猜疑的可怕。任何人都唔信任，警惕性高，本來係好的，但係過份猜疑亦都容易犯錯，成日諗住人會害自己，都好辛苦啫，化友為敵唔係處世之道，呢度陽爻去到盡的位，睽違到極，唔能夠用求同存異的寬容態度去對人，在現實生活裡面越係孤獨的人就越多疑。

占到呢一爻问前程：要对个D同自己唔岩KEY的人加以容忍，唔好将身边的人当敌人，亦都表示来问卦的人无几多个朋友。

问婚姻：呢个系女性的卦，呢一爻上到极位如果系女性问卦，就唔好对所有男人都睇唔在眼内，好容易嫁唔出，如果系男人问就好快成功，呢一爻系怕孤独的，所以离婚就唔岩。

问事业：就好辛苦，因为无人可以帮，合资同创业亦唔好得去边，因为互不信任，所以最终都搅唔成，打工就主张转工。

睇晒成个睽卦，从卦形来睇，互相睽违，水火不相向，大家背向，表面上睇并唔系一个好的卦，但系睇晒六爻，无一爻系凶的，每一爻都由睽而变成合，即系话呢个世界无野系唔可以解决的。 初九，有所失，亦有所得。 九二，有失意的时候，亦有人赏识。 六三，自己同自己斗气，但系谂通左就无事。 九四，孤单走我路，但系只要放开怀抱，用积极的态度去面对失意的环境，就自然有天助自助者。 六五在落难的时候都重有得倚靠。 去到上九，好似非常唔好，只要唔疑神疑鬼，就自然一天都光晒。 所以睽卦其实系一积极性的卦。