太岁每年都存在的，一般人对太岁都有一种莫名的畏惧，最主要都系受咗坊间的书籍，同埋一般的术数家的信口雌黄，将太岁呢种东西讲到有咁可怕得咁可怕，究竟太岁系唔系咁得人惊呢，现在来了解吓太岁的真实情况，太岁每十二年就会轮转一次，而天上行星之中，木星同地球每十二年就相遇一次，而十二年之中每一年都在地球的不同方位，而古人就将木星每年所经的方位作为太岁位，累积咗好多年的经验，凡亲在太岁位有所动作，就一定引出咗不如意的事，小的就头晕身㷎，大至产生意外，以前的人只系知道累积经验，收集好多实际的例子，知道一定会衰，但系唔知道点解衰，或者也野衰。

近代就有人用科学的理论，来解释太岁所到的方位点解动亲就有问题，原来木星同太阳一样系有辐射产生的，但系一般人就唔会惊太阳，就会惊木星，因为太阳所产生的辐射系阳性，人身体受佢照射之后，会产生一种积极的情绪，唔单止人类，就算植物受太阳照射之后都会生长得欣欣向荣，因为太阳所放射的紫外线含有对万物有益的元素，例如A-Z等等等， 唔单止产生积极的情绪咁简单，重会吸收紫外线里面有益的物质，最少都有杀菌的功用，所以读得书多的人久不久就要晒吓肚皮，就唔使惊会生虫。

睇番吓木星，原来木星系一个己经死咗的太阳，己经无晒热量，但系辐射仍存在，而所产生辐射系阴性，会对人体产生一种负面的情绪，令人意志消沉，胆怯、遇事退缩，自卑的感觉加强，甚至乎血压唔正常，产生极端现象，例如情绪变化极大，自然容易发生啲不如意的事。

既然太岁会对我吔发放呢啲阴性而负面的辐射，我哋用什么方法可以唔受佢影响或者用什么方法避开佢呢。 我哋研究吓人的习惯，凡亲遇到狂风暴雨，兜口兜面咁打埋来的时侯，好自然的反应就系拧转面，用个背脊顶住，原来人的抵抗力系背强面弱，所以凡遇突发性的侵袭，多数都用背脊挡住，由此就可以引伸出对付太岁的方法，就系唔好向住佢，就唔会受佢的阴性负面的影响，就时常听到的（太岁宜坐不宜向），可以背太岁，唔可以向太岁，因为背太岁就系木星的负面嘢在背后而来，反而对我哋有一种推动性的作用，相反如果面向太岁就会接收太岁的负面嘢。

引伸到现在每一年的太岁位，即系木星每年所到的位置，例如今年庚子，木星所到的就系正北，如果在一间屋里面正北的位置故意或无意，动土或者钉钉搥搥，就唔多唔少都会发生啲不如意的事，小则头晕身热，大则吵吵闹闹，絶对唔会好似一般术数家所讲死人冧楼。

基于太岁宜坐不宜向的原则，如果在太岁方郁动，就等于在太岁头上动土，就算唔系太岁方动土，坐在太岁的对面都系唔妥的，因为向太岁，向住太岁即系同佢对着干，亦即系犯太岁，一定俾太岁的负面嘢影响到，例如坐在正南位，面向正北位，就摆明向太岁，就系一般术数家所讲的太岁当头坐，无灾必有祸。

太岁既然郁又唔得，向又唔得，系唔系每年太岁所到的方位，我哋都要走夹唔抖呢。 经过好多年的经验，原来系唔使咁惊的，只要太岁位系恒常方就什么问题都无，例如今年太岁位在正北，一般的术数师都会警告你千万唔好郁动，郁亲就有大祸，最少都会手指痛，但系原来只要呢个位一直都系郁紧的（恒常方），就什么事都无，即系旧年有机器在呢度郁紧，今年一样照郁，就唔会有事，因为系恒常方，太岁未到己经动紧的，就唔构成太岁头上动土。 又例如我的坐位，一直都系坐北向南的，今年亦都唔构成太岁当头坐，所以亦都唔会有灾祸，但系如果明知太岁在正北方而故意搅嘢，就必定有问题，所以各位今年的工作位无移动，就唔使惊今年会犯太岁，但系如果今年工作位或者家居家具有移动的话，就要留意有无移到坐南向北， 如果有的就可以摆放一盆用水养的黄金葛化解，最好用铜盆（金生水，水生木），又或者放一个上炼的时钟，就可以将太岁的负面嘢化解，或者放一只黑色的木兔仔泄太岁的负面嘢，系完全唔需要摆放古灵精怪的风水化煞物品。