《易经》第四卦【蒙】山水蒙#

屯卦之后就系蒙卦，点解要跟住屯卦之后呢？ 睇吓序卦传点样讲：「屯者，物之始生也，物生必蒙，故受之以蒙，蒙者蒙也，物之稚也」。 照上面讲，万物初生之后，必处于稚小的状态，幼稚的状态，凡幼稚的特点就系童蒙未曾启发，智慧未曾开，蒙就系蒙昧，昧就系不明，唔系物的本体不明，而系由于受到D唔知乜野的掩敝而造成一种不明的状态，好似一面镜，有D尘遮住，或者眼镜有D水气，甚至乎眼睛有白内瘴，远山的景物一片迷糊就叫蒙，因为无论镜，眼镜，眼睛或者景物，佢地的本身系旡蒙的， 因为有某样野在度掩盖住佢，先至产生蒙的感觉。 蒙卦的主旨系讲点样启蒙，点样将D蒙住佢的野揭开，系教育，或者再教育，唔单系初生事物要教育，就算进入一个新环境亦需要接受教育，或者去到一个新的阶段又要接受教育，又或者要进入一个新的阶段之前亦要接受教育。 呢度的教育并唔系一定到时到候返学的教育，而可以系俾少少指引，或者系点番两度，或者系小小提示，可以睇成经验的传授。 例如蒸蛋，酒楼蒸蛋就唔黏底的，你在屋企蒸就一定黏底的，又或者人地蒸出黎好平滑，而你蒸出黎的蛋面好似火山口咁样凹凸不平的，个师傅将D经验传授俾你，就即刻得心应手，呢D就系启蒙。 启某一件事的蒙，所以呢个蒙，唔代表系乜野都唔识，而系对某一样事物，或者去到某一个环境，有D野解决唔到，需要一个有用的意见，或者实际的帮助，并唔系理解与同情咁虚无飘渺的安慰。

由个卦形来睇，坎下艮上，坎为水，象征有险，艮系山，向前有阻，显示一件事或者事业的发展有问题，呢D问题包括资源不足，同埋有好大阻力，唔知点做。 在有问题唔知处理边样先，呢种情形就系蒙，古人话「蒙者稚也」，意思系指人幼稚，无处事能力，所以需要学习，所以呢一个系一个学习的卦，亦都系一个教育的卦。 人要进步绝不容易，好似前面有个大山阻住，要出好多力先至可以爬过去，但系如果有个名师指点，将D窍门点俾你就走少好多冤枉路，所以蒙的开发，或者启发，就要靠老师，即系无论天才或庸才，都要靠后天的教育先至可以成长。 点解易经要将蒙排在屯卦之后，因为乾坤代表父母，屯卦系万物始生，之后就需要学习成长，所以受教育系好紧要，人无论在乜野年纪都唔可以停留在果一个阶段，其实无分年纪的，只要你唔进步，你停留在呢度，就系蒙昧，唔进步就系在蒙昧的阶段。 唔好以为我够食就算，唔进步都无所谓啦，其实唔进步就等于退步，因为世界系唔会等你的，要脱离蒙昧的阶段，除咗自己肯努力之外，重要有一个好的老师，所以古人话天地君亲师，绝对唔系迷信，封建，而系话由父母处得到生命，但系无师则不能成长，所以中国人一向尊师重道，因为生我者父母，亦都系赐我蒙者，但系启我蒙者就系老师，睇吓个卦辞点样讲。

蒙：亨，匪我求童蒙，童蒙求我，初筮告，再三渎，渎则不告，利贞。

呢一段卦辞未必咁容易明白，蒙昧，幼稚，点解又会亨通呢？ 原来呢度的解释系只要肯学，人就会前景光明，亦即系话肯定咗人有学习的能力。 其实人学野系主动性的，系有求知欲的，跟住呢句系指出人系主动想去成长的。 匪我求蒙童，蒙童求我。 匪即系非字，呢度系企在老师的立场，表明咗要学生主动黎学，学生如果唔主动，唔想学，个老师好叻，好肯教，学生都系学唔到野。 以前D教育方式系学生黎咗，老师就要教到你识，唔识就打到识。 而家D教育方法太过迁就D学生，同时亦都太过纵容D学生，结果就系师道荡然无存。 好似欧美国家，D学生古灵精怪，色暴力乜都有发生，而家D教育制度采用咗西方的模式，连理论都唔系土产的，教育的出发点同我地都大有不同，佢地采取放任的态度，顺其本性，重鼓励D学生想点就点，正式系唔知乜野系啱，乜野系错，加上幼稚的自我欲望，如果唔加以管教，唔俾一个正确的方向佢，反而鼓励佢地乱咁黎，纵容佢地想点就点，长大之后就会好难同人相处。 自我中心太强，无抑制，无容忍能力，一有小小压力就承受唔住，所以心理医生大行其道。 喺卦辞里面的我表示「硬净」唔动摇，好有信心，亦都系老师的代表。 在六爻里面，呢个我系指九二，九二系启蒙者。 蒙童系指六五，启蒙者同蒙者的关系，亦即系教育者与受教育者的关系。 卦辞强调童蒙求我，等于话教育的成功与否，最紧要系睇吓受教育的人的主动性，积极性。 初筮告，再之渎，渎则不告，利贞。 学生黎求学，必须有诚意，好似问卜一样，面对神灵的时候一定要摒除杂念，唔可以用玩耍的态度黎求取指引，呢种诚恳的态度就系初筮告。 若果再三占问，就系未经思考，或者随意咁问，又或者系贪过瘾，系对神灵的唔信任同唔尊重，呢D就系渎，跟住就系则不告，唔会俾个正确的信息你。 成段卦辞的解释就系话学习要有诚意，同时要用一种负责的态度的提出问题，同时要坚持到底，所以利贞，学习学野系人生旅程的第一关。

彖曰：蒙，山下有险，险而止。 蒙：蒙亨，以亨时中也。 「匪我求童蒙，童蒙求我」，志应也。 「初筮告」，以刚中也，「再三渎，渎则不告」，渎蒙也，蒙以养正，圣功也。

蒙，山下有险，险而止蒙，呢几句系用卦象解释个卦名，内卦系坎，坎为险，险的地方唔可以逗留。 外卦系艮，艮为山为止，止就唔适宜再前进，呢种唔适宜前进，又唔适宜逗留唔知点做，有昏蒙的意思，所以取卦名为蒙。 跟住话蒙，亨，以亨行时中也。 因为蒙卦的处境系山下有险，令人有进退维谷的感觉，但系唔使惊，只要肯学就亨，在恶劣的环境之中搵到出路。 顺势而行，就系时中，即系要睇时机，掌时机好重要，主要系及时学习。 古时六岁入学，先学进退，应对，十五岁入大学，古代教育的精义，不在于语言，而在于规范，有咗方向，就一生都有轨道。 匪我求童蒙，童蒙求我，志应也，呢度系指理想的教育，教同学双方能够相应，能够交流，就系志应。 求童蒙，与蒙童求，就系黎学的有诚意，老师又有料，气度宽宏，显示出老师的标准，呢D表现就系刚中，在爻位黎讲就系九二，阳居阴位，表示为人师表要有宽严并济的手段，以身作则。 初筮告，以刚中也，表示学生初次黎求，好有诚意，点解咁有诚意呢？ 因为个老师好有料。 以刚中也，在佢果度补习，个个都攞几个A架，再三渎，渎则不告，渎蒙也。 渎系严肃的反面，一方面唔相信个老师，或者睇唔起个老师，但系又要老师教佢。 渎则不告：唔应该教佢。 呢度话无诚意的问卜，神系唔会俾提示佢的，呢几句野系引伸到学习无诚意，就唔好教，如果教呢D学生，就系渎蒙也，简直侮辱自己。 呢个画面系一个暴发户请西宾，但系撞啱个要颈唔要钱的卜卜斋，对佢个东翁话，你呢个二世祖搵第二个教啦。 蒙以养正，圣功也。 蒙要养，要培养，人在幼稚阶段，要学习，要吸取知识资源，叫做启蒙。 以前D人对自己的权利懵然不知，只会听君主的话，后来多得西方国家，原来自己应该有咁样咁样的权利，呢D又系启蒙，正系代表正道。 圣功也，所采用的方法都系以前D人传落黎的，都系圣人的功劳。

象曰：山下出泉，蒙，君子以果行育德。

果行：坚定实践。

上艮下坎组成山下出泉水的画面，其实系用另一个角度黎睇蒙卦。 初初系好细的流水，涓滴而出，就算有座大山在前面都唔可以阻止D水向前流，表示人的求知欲系唔可以阻止的。 君子以果行育德，在学习的过程中的坚持系好紧要的，好多人学野都系三分钟热度，或者跟唔上就半途放弃，最常见的系学习跳舞或者五术，呢度的君子系讲有智慧的人。 呢段象词系话要学野一定要坚持，其实无秘诀，最大的秘诀就系摆时间落去浸。

占到呢一卦问前程：开始的时候唔系咁理想，好似在迷雾中摸索，但系渐渐会好转。

问婚姻：就要慢慢黎，唔好急，因为对方的意图未清淅，唔知系想玩吓呢还是长久，结婚或者离婚都唔好即刻决定。

问事业：在事业的层面，就唔主张创业，因为卦象幽暗不明，但并不表示无希望，只不过系付出与收入唔相称。 打工就主张转工，因为既然系蒙昧不明，不如早走早着。

初六：发蒙，利用刑人，用说桎梏，以往吝。

刑人：监犯。 说：脱。 桎梏：手铐，脚镣。 用说桎梏：脱去刑具。

初六系阴爻，居于最初的位置，所以呢度所谓发蒙，可以形容为社会的群众，而且系低下阶层的群众，启低下阶层的蒙。 要启蒙就一定要有一个标准，利用刑人就系制定一个法规，使到佢地唔会越轨，唔会恣肆妄为，然后先至慢慢教化佢地。 用说桎梏，如果唔采取刑人，即系规范，一早就放任。 说桎梏，唔管佢，就以往吝，以系继续，往吝去衰，如果唔管佢，佢地就作反。

象曰：利用刑人，以正法也。

原来孔夫子系赞成体罚的，利用刑人所有规则都系要用法黎执行，可以用适当的刑罚黎显示行为的标准，边D可以做，边D唔可以做，就系以正法。

占到呢一爻问前程：暂时未有发展的机会，都系要等吓先。

问婚姻：呢段婚姻会身不由主，起码唔系自愿的。 问结婚就好，问离婚就唔符合爻义。

问事业：创业就要经过一段好长的时间，打工就唔好跳槽。

九二：包蒙吉，纳妇吉，子克家。

克：承担。 呢一爻系利用家庭亲子关系黎说明教育的立足点，在爻位黎睇，九二刚中，代表咗启蒙者的形象，严肃认真，因为系阳爻，但系又有宽柔的态度，因为阴位，有恶的面孔，但系有软的心肠。 包：包容。 D女人好唔识野，好无知识，但系唔紧要，可以容忍佢地。 子克家：儿子可以承担责任。 D屋企人好唔生性，全靠个仔支撑呢头家，呢一卦六五系卦主，但系五位系阴爻，第五爻不足以承担，所以要呢个仔负起晒个责任，就系克家。 唔单止要承担，重要包容其他的家庭成员，呢一爻系讲教育同亲情一样，都系出自对对方的关怀。

象曰：子克家，刚柔接也。

之所以可以承担责任，因为刚柔接，有五爻同佢相应，呢度所指的二同五，实际系父同子的关系，二爻系仔，五爻系父。 刚柔接，老豆俾晒D权力佢，绝对相信佢。

占到呢一爻问前程：就系话个负担好沉重，但系就好得长辈的信任，可以放心去做。

问婚姻：就自己可以揸晒主意，结婚就好，离婚就唔符合个爻义，因为呢一爻系讲承担责任的，如果离婚就系唔再负责，所以唔赞成。

问事业：可以合作，但系会有好多争拗，打工唔赞成跳槽。

六三：勿用娶女，见金夫，不有躬，无攸利。 有躬：尊严。

在蒙卦里面，阳爻属于启蒙者，阴爻属于蒙者，六三系阴爻，在蒙里面系一个蒙者，四阴爻的蒙系有分别，初爻系未受教育而蒙，四爻因唔学习而蒙，五爻因主意揸唔定而蒙，呢一爻因为自身不正而蒙。 呢一爻话娶妻求淑女，原来拜金主义唔系新鲜产物，在呢一爻已经充份显示出女人系贪钱的。 用白话文黎解就系唔好娶呢个女人，点解呀？ 呢个女人贪你D钱架咋，只要有钱佢就钟意勒，无晒尊严，唔会有好结果的。

象曰：勿用娶女，行不顺也。

呢条女行为不端，无守，唔可以娶佢做老婆。 行不顺，佢的品行唔好。 呢一爻借拜金之女黎比喻学生品行唔好，无定力，无意志力，一定读书唔成，你花时间去教佢就只有令自己失望。 呢度孔子有好大的偏见，佢话拜金的系女人，另一方面佢话训晏觉唔啱。 佢有个学生叫做宰予读书读得疲倦过头，瞌着咗，孔子即刻指住佢个头话「朽木不可雕也」，话佢自暴自弃。

占到呢一爻问前程：话做野唔好挂住眼前的利益，要将眼界放远D。

问婚姻：呢段婚姻有钱就会成功，无钱机会就微D，问离婚就好，因为行为不端，唔正当。

问事业：唔主张合作，因为行为唔正当，思想不正确，打工就主张转工。

六四：困蒙，吝。

呢一爻之所以叫做困嘅原因就系阴爻又俾两个阴爻夹住，远离阳爻，同佢相应嘅初爻又唔系阳爻，无阳爻同佢正应，相比嘅又唔系阳爻，变成敌比敌应，失道，无助。 吝即系不足，呢个不足一半系环境做成，一半系自己做成嘅，有啲人蒙昧嘅程度好深，将自己完全困住，一幅幅垟困住自己，老师或者心理医生，都对佢无从入手，呢种情形就系困蒙，吝。 喺现世中呢种人多的是，最常见嘅就系唔肯面对现实，一生都喺度逃避。 例如读书，读完一个学位又一个学位，一般人以为佢好叻，揹住咁多个学位，其实系唔敢面对外边嘅现实世界，呢啲就真系蒙困。 呢一爻嘅蒙并唔系指蠢人嘅，而系讲聪明人受到蒙困，就吝，呢个吝系人哋觉得好可措。

象曰：困蒙文吝，独远实也。

阴系虚，阳系实，呢一爻话接近唔到好嘅人，点解会咁样呢，因为自己唔肯面对现实，或者成日停留喺某一个阶段，永远唔肯长大，有啲书解释为因为佢遇到一个好老师，以致独学无友。 但系其实就算遇到好老师，咁封闭，最后亦都系放弃学习，喺爻位嚟讲，六四远离两个阳爻，所承所比嘅都系阴爻，即系所结交嘅朋友都唔够班。

占到呢一爻问前程：唔好见到小小利益就满足，呢一爻表示重有更大嘅利益等紧你。

问婚姻：结婚就未必系一段好的姻缘，呢一爻系主张离婚的，因为结婚系被困，要脱困系自然的事。

问事业：唔主张合作，因为你身边无乜好人，打工就主张跳槽。

六五：童蒙，吉。

六五虽然系阴爻，但系柔中又有九二相应，柔居尊位，本身有柔顺嘅特性，九二系主动去教，六五呢一爻表示主动去学，一个肯教，一个肯学，孟子后来喺呢一爻后面加注话：「得天下英才而教育之」，视为最大乐事。 呢度的童蒙同卦辞的童蒙有D唔同，卦辞系讲蒙昧不明的蒙，六五的童蒙系自发性的，卦辞话童蒙唔知点做，六五的童蒙系自发性知点样做，所以全卦净系呢度吉，净系呢度「知定」，其他都唔「知定」。

象曰：童蒙之吉，顺以巽也。

虚心求教，主动求教，所以吉。 在卦象睇阴居尊位，以顺为相应，在卦中爻为巽，巽为风，风者顺也，所以象辞话以巽，即系用巽卦的态度来处理呢一爻的事。

占到呢一爻问前程：表示会有好多有力的人帮你，可以放心去做自己钟意做的野。

问婚姻：呢段婚姻系主动性，如果男人来问表示女方主动追求，如果女性来问，表示男方主动追求，好快就会成功。 如果离婚就唔符合个爻义，因为爻义系讲有共同目标，因为结婚的时候绝对唔会将离婚当系共同目标。

问事业：主张合作，创业，打工表示会得到赏识。

上九：击蒙，不利为寇，利御寇。

御寇：作名词，贼，侵略者。 为寇：动词，有进攻，攻击的意思。

教育工作系开启愚蒙，但系如果教的方法大强硬，猛烈，会引起反效果。 击蒙：用强硬的方法。 不利为寇，如果D学生质素系高的话，就唔使打，如果系顽劣的，你打佢都无用，有D甚至乎唔知为乜野打佢，D醒目的你举起只手佢就知你想点。 好似靓的马，见到条马鞭郁就即刻识跑，但系D劣马要打到飞起先至知道要跑。 呢度话唔可以用粗暴的手法，但系呢爻系上九，象征任教的人地位高而脾气差，自己好叻，但系教D学生好渣。 呢度一爻充份表现出教育工作者的爱心，可以用体罚，但系唔可以大棍<勾>落去，唔可以当贼咁打，译过来白话就系：你咁好打，不如去捉贼啦。

象曰：利用御寇，上下顺也。

对付外敌，上下齐心，就一定可以成功，引伸教育观点，教嘅身份越高，越系要宽容学生，教育唔系攻击，更加唔系疲劳轰炸，在适当的时候都要玩埋一齐。

占到呢爻问前程：一定要用柔和的手段，做野系唔急得的，欲速不达。

问婚姻：结婚就好，因为最后都达到一条心嘅境界，唔主张离婚。

问事业：可以创业，合作，打工就宜静不宜动。

成个蒙卦所讲的系教育的基本原则，卦中的两个阳爻系老师的身份，四个阴爻系学生的身份，初爻用一个标准规范住D学生，二爻有包容有爱心，三爻自己本身有问题而蒙，四爻处境不利而困于蒙，五爻教与被教者有共同目标，上爻就教到发火。