《易经》第七卦【师】地水师#

师，指军队，由争讼，用把口来争拗，至到大打出手，单对单唔掂，跟住班马，聚集成众，初初就乱打乱劈，后来越搅越大，人越多，规模越大，发展到军队，一场大规模的战争往往都系由好小 的事引发，或者因小小事「借D椅」所以师之前系讼，唔好以为小小争讼既问题，其实可以发展到好大件事，师的卦形下卦坎，系险同水，上卦坤系顺，系地，古代军农合一， 无仗打的时候耕田，无田耕即系农闲的时候就接受军训，打仗的时候就应召入伍，以前好多场出名 的战役都系在将近农忙的时候发动的，无论输赢都要对方无时间耕田，所以古代打完一场旷日持久的仗之后多数都赤地千里，饿殍处处，因为耕田的人就算唔死都好唔得闲，但系D君主，帝皇系唔会理会D平民百姓的死活，最紧要自己个位稳阵，国土不断扩张， 好似中国要统一台湾可能系果几个领导人想名留青史，实际上中国人民或者台湾人民未必咁钟意统一，如果因为咁样而致自己人打自己人，呢D真系廿一世纪最悲哀的师，但系战争的发生通常都系领导人的一念之间，人民完全无得话打定唔打的选择。 所以孙武话兵系一凶器，非不得已系唔用的，但系师卦并唔系全部负面的，由另一方面来睇，师卦上卦系坤，为地，下卦系坎，为水，即系地下有水，水无流出来，表示系一种包容，容纳一个领袖或者一个机构的主管要有包容性，要睇得开，尤其是系越大的机构，甚至争一个国家的领导人，必须要公正，好似卦里面活要纪律严明，赏罚分明，系卦中爻辞系倾向赏多过罚， 因为呢一卦系话集体去一齐完成一件事，因为在一个集团里面，罚一个可以警戒一百个，一个人受罚就可以令其他人有警惕性，但系如果净系赏一个，就绝对唔会令到其他人心服，好似上六的象词，孔子话：必乱邦也，呢D就赏要多，罚要少。

师：贞，丈人，吉无咎。

师：系军队同军队编制单位。

丈人：古时对有才能，有谋略，大家都尊敬的人的尊称。

师，贞：维护正义，顺应天命就叫师贞。

首先要知道呢个师在周朝的解释，周朝时代的编兵制度，系以五百人为一旅，二千五佰人为一师，一万二千五百人为一军，呢个卦唔用五百人的旅，亦唔用一万二千五百人的军，而用二千五百人的师做主题，就系配合卦里面所讲的管人与被管的师长，并唔系咁轻松自在，每日要对上对下，古时的官场，一定要买上，因为手握兵权在外面，皇帝好惊佢领兵作反， 如果再有D小人在皇帝身边煽风点火，咁呢个带兵官就好容易家属不保，甚至人头不保，所以买上系紧要的，但系买下同样重要，因为打仗净系靠自己简直系笑话，所以买下系一件紧要事，引伸到现在商业组织的领导人，每日面对市场，面对顾客，呢D先至系最大的老细，但系另一方面伙记系帮自己搵钱的，所以就要赏罚明，卦辞所讲的丈人系老成持重的人，有声望的人， 呢个丈人一定要贞，呢个贞系处事方式，就系要维护正义，符合民心，以有正义的性格，中庸的处事方式，面面俱圆的人事关系的人作为统帅，先至会大吉大利，可以避过好多不必要的麻烦，真正的战场上面，一将功成万骨枯，并唔系个个将领都咁醒，所以要有一个丈人来带领先至无咎，古人一早已经注意到「名正言顺」呢样野，除左真才实学之外，领导人的资历， 威望都好紧要。

彖曰：师，众也，贞，正也，能以众正，可以王矣，刚中而应，行险而顺，以此

毒天下，而民从之，吉又何咎矣。 以系用，或者系左右解。

毒：灾害。 呢度的前一段，师众也，贞，正也，能以众正，可以王矣，意思系：师系面对一大班人，如果你可以用一个口号，用一种理想，可以左右到佢地，你就可以为王，就系呢一班人的领袖，好似共产党的口号系打倒地主，分左佢地D土地财产，好啱听，提出呢个口号的人就做左王者，可以王矣。 后面呢句刚中而应，指九二同六五阴阳相应，又九二阳爻刚中，象征师的统帅，六五阴爻柔中，象征师的君主，阴阳相应，象征个统帅得到君王的信任，才干得以发挥，可以照自己的主意去做。 行险而顺，下卦系坎，坎即系险，上卦坤，坤的卦象系顺系正，象征以正义的行为而得民心，坎险象征兵凶战危，所以就系险，就系行险而顺。 跟住后面一句，以此毒天下，而民从之，兴师动众，一定毒害天下，但系呢一卦系险而顺，系为人民而打的，为你地解除苦难，唔使俾地主欺压，所以D人系欢迎的，所以话民从之，既然下面D人愿意跟你，自然系吉，无咎吉祥，而无灾祸，呢度系话，做非常之事，要用非常的手段，得到大老细的支持，自然乜野问题都无。

象曰：地中有水，师，君子以容民畜众。

师卦的卦形系地下有水，水唔流出地外，水系险，系军队，地系群众，以农民为代表，即系军队隐藏在农民之中，唔系军队匿理在农家中，而系农民另一个身份系军人，君子领导人，容民畜众将自己的力量积畜在民众之中，因为唔打仗的时候就系农民，不停劳动以供养领导人，到有仗打就放低锄头，改而拿刀，为领导人打生打死，所以呢度话君子以容民畜众， 无论系农同埋兵都系自己蓄起来的“糙”埋的，随时拎出来用的.

占到呢一卦問前程：表示來問卦的人一定好叻，有恃才傲物的性格，要有成就一定要培養自己的班底，重要廣結人緣，以求有更大的發展．

問婚姻：如果未結婚的就會好多阻撓，結左婚的就好多拗撬，問結婚就未有咁快成功，問離婚如果有長輩出面斡旋就離唔成．

問事業：呢一卦係接受挑戰，所以可以創業，但係合作就麻煩勒，打工仔就搵定新工好Ｄ。

初六：師出以律，否藏凶。

律：係指軍紀。

否：係不，係惡。

藏：音撞，係善，係美好，例如西藏，係中國西面最好的地方。

否藏：即系不善，化好为衰。

师出系军队出发，以律，必须有严明的纪律，如果唔系明明可以嬴的都变成输，认真凶，出兵打仗，一开始就要强调纪律，如果做唔到呢一点，或者做唔好呢一点，结果一样凶，呢一爻的性质系做 唔到师出以律，因为阴居阳位，又在最初爻，所以要做到好系好难，因此爻辞话否藏凶，点解师出以律，军队出战要靠纪律，唔话吉，而跟住果句否藏就话凶呢，因为师出以律， 只不过系取胜的条件之一，或者系取胜的先决条件，唔系唯一的条件，绝对唔可以因为呢支军队有纪律，就判断呢场仗会嬴，所以无个吉字跟尾，但系如果师出而唔律，系一队无纪律的军队，咁样呢场仗输就系肯定的，所以师出以律，系正常的，系需要的，否藏系唔可以出现的，如果出现左就肯定凶。

象曰：师出以律，失律凶也。

失律就系否藏，军队有纪律，系正常的，系用兵之道的基本。 系胜系败，尚在未知之数，但系如果失律，就一定败，所以凶.

占到呢一爻问前程：做野唔单止对他人有要求，对自己的要求更加高，呢一爻系先要律己，之后律人.

问婚姻：就一定要正式结婚，一定要有正确名份，就可以长久，如果同居根本唔会有好结果，呢一爻问结婚就岩，问离婚就脱脽左常轨，所以唔赞成.

问事业：创业同合作都赞成，因为系讲遵守游戏规则，所以创业可以，合作只要师出以律，有制度分工就无问题。 打工就唔主张转工应该留番在原位较好。

九二：在师中，吉无咎，王三锡命。

锡：即赐

在军队之中，同下属的关系打得好好，将士个个都肯为自己卖命，所以吉，王三锡命，得到三五次赏赐，在周朝三锡命系最高的奖赏，第一系受爵，第二系受服，第三系受车马，呢一爻系讲点样做一个好的统帅，呢塨系卦主，系卦中的唯一阳爻，有统领各阴爻的能力，亦都同六五阴爻正应，六五系君位，九二系臣位，亦都代表左君臣之间互相信任，在师中重包括左另一意思， 中系中道，在军队之中，唔专制就唔可以执行命令，过度专制就变成暴，在师而得中道，即系好得下属拥戴，所以吉而无咎，自古以来，将军在外面带兵打仗，立下汗马功劳，但系结局就有天壤之别，能够得到吉的都系全靠有一个好的上司，或者有一个好的王帝，对佢无条件信任，重要呢个王帝身边无奸人先至得，好似呀飞哥咁，佢够忠心又打得，又得手下爱戴， 又得王帝信任，但系最伤就系王帝身边有个秦先生，所以飞哥就算在师中吉无咎重有埋王三锡命添，送左十二个金牌俾佢，卒之都要死于非命。

象曰：在师中吉，承天宠也，王三锡命，怀万邦也。

将帅统兵在外，之所以能够做到师中吉系因为得到王帝的信任，支持，呢个王帝之所以信任一个手握重兵，拥兵在外的人，重要对佢加以赏赐，系有目的的，跟住果句系怀万邦也，系为左做俾人睇，所谓行仁政于天下。

占到呢一爻问前程：要做任何事之前一定要取得双方的信任，如果互相唔信任，就做乜都系多余的.

问婚姻：系一段好姻缘，因为大家都尽左力，问结婚就好因为互相信任，问离婚就唔符合爻义.

问事业：可以合作，亦可以创业，打工就无谓转工，因为得到老细的信任。

六三：师或舆尸，凶。 或系解有。

舆：系车。

尸：系尸体。

舆尸：系一车一车的尸体。

呢一爻系才干的问题，志大才疏，做野就一定失败，等于一个领将，无领军之材，但系性格又刚愎自用，轻举妄动，委托一个咁样的人领军，栈得D军队，一车一车咁运返来，不过返来的系尸体。 呢一爻后世有一个好出名的占卜故事，战国事代赵国要同秦国开战，赵国的猛将赵奢病死，所以赵王打算指派赵奢个仔赵括领兵，谂住佢系名将之后，梗有番咁上下，预备拜赵括为将，统领赵国40 万大军，同秦国开战，赵括就就欢喜到痺，但系佢老母就唔系咁谂，好胆心，因为秦国军队唔讲得笑，呢个赵妈妈就请左当时最出名的阴阳家邹衍来占左一卦，得到师卦六三爻， 呢个邹先生话呢次领军一定大败而回，赵妈妈问点解，邹先话，占到呢一爻系一个志大才疏的人一味想做大事，结果一事无成，赵妈妈苦劝个仔唔好去，但系个仔唔肯听，赵妈妈 重唔死心，佢走去赵王面前叫赵王收回承命，话佢个仔唔系将帅之材，但系赵王为左自己的面子，唔肯认睇错人，所以唔肯另觅名将，一意孤行，其实当时赵国有一个好出名的猛将，姓廉名颇， 但系赵王唔肯改变主意，卒之赵国的40万大军一夜之间俾秦国的猛将白起全部斩杀，令赵国在一夜之间变成战国七雄之中最弱的一国，呢个占例隐喻左几样野，第一：在易经里面系果一种人，就会出到果一种卦俾你，赵括系一个无材干的人。 呢一爻话无能力的人带兵一定死梗，第二就系呢一爻亦讲用人之道，第三就系占卜唔系死板的，占卜只不过俾一个提示，提议结果系可以改变的，上面的例，如果赵王改用廉颇，呢场仗鹿死谁手亦未知，可能统一中国的未必系秦始皇。

象曰：师或舆师，大无功也。 大：系指领导人。

搅到咁的田地，去咁多无咁多，都系错在领导人，在战场之中，就全军覆没，在商场之中，有一句名言，叫担沙塞海，拎咁多出来就无咁多.

占到呢一爻问前程：表示呢一个人唔可以独力承担沉重的责任，一定要倚靠D有力的人。

问婚姻：呢段系好唔开心的婚姻，问结婚未系的时候，问离婚就好快成功.

问事业：独资创业就无乜可能，合资都重可以考虑，打工就主张转工。

六四：师左次，无咎。

呢一爻系讲走位灵活，古代的兵家认为右为前方，左为后方，三军动的时候一定先动右方，左次即系将D军队驻扎在后方，唔郁住就无事，在时机未成熟，未有足够能力的时候唔好轻举妄动，系因时制宜，咁样睇来好似无进展，但系保存实力系最紧要的，唔好因急于求成，而在唔适当的时候做唔适当的野，好似风水的原则：吉凶原堪自主，君子待时始动。 又好似买股票，未到适当时机就要搅住D银纸唔郁，因为D钱系唔会发莓的，如果监硬投资，好似忍唔住手，手痕痕买左只8号仔，就唔知几时番身，咁样唔单止唔系师左次，唔止有咎，重凶添。

象曰：左次无咎，未失常也。

依照常理出师的目的系为左取胜，要取胜就要出击，而且系系主动出击，现在唔单止唔出击，重匿埋添，似乎唔啱常理，但系实际上无错，因为等待时机系一门好高的学问，忍住唔出击就更加唔系普通人可以做到的，战场同商场都系一样，尤其是股票市场，唔忍得就迟早玩完.

占到呢一爻问前程：暂时未有机会，俾多D耐性，缩沙绝对唔系无面的，保存实力先至系呢一爻的主要意义.

问婚姻：未结婚就要小心选择，慢慢拣清楚都唔迟，己经结左婚的就唔赞成离婚，因为爻义系主张暂时停止斗争.

问事业：创业未系时候，合作就要低调，打工就唔主张转工，暂时唔郁就好D。

六五：田有禽，利执言，无咎，长子帅师，弟子舆尸，贞凶。

弟子：手下。 田：己耕种的土地，亦都解打猎。 执：系坚持。 禽：系鸟兽的统称。 执言：系发表意见。 长子：系大仔。

呢一爻系搬弄是非，同争权夺利，田有禽，利执言，同老细大家一齐去打猎，打到好多猎物，老细好高兴，在呢个时候对佢讲D平日佢唔系咁钟意听的野，在高兴的场合就算呢D说话唔系咁啱听，都唔会发火，所以无咎，佢要求系乜呢，原来系要求有话事权，军队之中原本有个主帅话事的，现在加多一个，呢个职位叫做监军，通常监军的才能同元帅系相差好远的， 但系就有同元帅差唔多的权力，样样都对正常行军打仗诸多制肘，长子帅师，唔知边个真正话事，无料的就多意见，有料的就处处受到制肘，D弟子，即系手下想唔一车一车的尸体运返去都唔得，贞凶有排衰。

象曰：长子帅师，以中行也。 弟子舆尸，使不当也。 中行：航音，中间的位置，话事的位置。

呢度话既然俾左一个人话事，点解又要俾二个人来监察住佢呢，用人不疑，疑人不用，以致到呢件事失败左，完全系自己的责任，使不当也，自己处理错误，错在疑心太大，同埋用人不当，在宋朝最多呢D皇帝，将军在出师之前，皇帝就定下好多阵势，俾个将军依往来布阵，如果个将军觉得实际情况，唔可以用皇帝定落来的阵势，自己要变阵的时候， 个监军就会抬皇帝的招牌出来诸多阻挠，所以宋朝对匈奴开战多数输的，就系错在皇帝自己，呢一爻系六五君位，孔子话使不当也，就系讲高位的人都会错的.

占到呢一爻问前程：要做野就一定要职责分明，目标要清晰，唔可以模菱两可。

问婚姻：确定左对象就唔好三心两意，问结婚就要自己确定，唔好俾人地左右自己的决定，问离婚就系决定错误，表示有好多无谓的意见俾你，所以问离婚就唔符合爻义.

问事业：创业与合作都系无乜好结果的，呢一爻包括左判断错误与争权，所以创业同合作都系多余的，打工就唔好乱咁走，留番在原位就好D。

上六：大君有命，开国承家，小人勿用。 大君：国君。 家：大夫的封地。

命：赏赐。 开国：封彊，或者系分封诸侯。

上六系师卦的最后一爻，代表左所有争执都完，仗亦都打完，应该系埋单计数的时候，大君有命，国君论功行赏，发布命令，睇下边D应该封乜或赏赐乜，开国承家，立大功的封个国俾佢，即系封为诸侯，赐以土地，有自己的军队，立细功劳的，封为大夫，大夫以家为封地，家人卦有讲的，但系漏左最低层无得赏赐，小人勿用好多书都将小人解成衰人，坏人， 我地知道在商用时代，君子绝对唔系代表好人，相对小人亦都唔系代表衰人，只不过系无能力，无地位的人，呢度国君分封，赏赐，净系俾D高级的，对于D低级的，无名的，唔系在自己周围时常出现的人，就抛诸脑后，但系呢D前线的人员，佢地所付出先至系最多的，分分钟无命，一将功成就系全靠呢D小人去垫尸底的，好以香港的公务员加薪制度，高级的加几万， 低级的加100，呢D亦都系小人勿用，究竟小人勿用会点呢？ 睇下孔子点讲。

象曰：大君有命，以正功也，小人勿用，必乱邦也。

大家分猪肉的时候，最前线的反而无得分，呢D做成左一种分化，亦都埋下左动乱的根源，因为商周年代重系实行紧奴隶制的，而且系世袭的奴隶制，所以唔公平的分赏制度会做成社会的不安，甚至乱邦都有份.

占到呢一爻问前程：进行的事接近成功的阶段，呢一爻系讲处事要公正，面面俱圆唔好忽略某一方面.

问婚姻：有长辈主持就系一段好的姻缘，问结婚就要快D，唔好犹豫，问离婚就唔会成功，因为呢一爻只系睇到D好的野，睇唔到D衰野，所以唔应该离婚.

问事业：可以创业，因为成功在望，合作亦都系好的，但系打工仔就加辛有份，加薪就无份勒，所以搵定新工就差唔多.

睇晒成个师卦，由出师至到打完仗，由有纪律到唔守纪律至死得人多，到打完仗分功劳。 初初好有理想。 九二争取到上级信任。

六三信错左人，而造成损失。 六四要匿埋，等机会。 六五到有机会但系俾人争权，笃背脊。 上六打完仗，但系又得唔到公平的待遇，成个卦无边个爻系好的。