《易经》第十卦【履】天泽履#

履，履虎尾，不咥人，亨

履卦就系天泽履，天之下有个水泽，就系履卦，履虎尾不咥人，亨，履虎尾，踏住条老虎尾，只老虎冇咬你，咁你就畅通勒，就无阻，履虎尾不咥人，亨，一向咁解，解 到好顺好顺，但系在长沙马王堆汉墓所出土的汉帛书就引左一个问题出黎，佢唔系解不咥人，系不真人，真假个真，就俾D人解成履虎尾不真，踏着条老虎尾，条老尾尾系假的， 踏到条老虎尾，条虎尾不真，系假的，咁个人就亨勒，咁样的解释就唔系好贴切，因为冇乜可能有条假的老虎尾，所以呢个解释实在唔啱，因为我认为咥人同真人应该系同埋一样先至岩，唔去咬你同唔对住你发恶，系同一样意思，所以认为依照古时的解释就系条老虎尾，而只老虎冇咬你，冇对你发恶咁就亨勒，亨即畅通无阻。

彖曰：柔履刚也，说而应呼干，是以履虎尾，不咥人享刚中正也，履帝位而疚，光明也。

要清楚履，乜野踏乜野，呢度系柔履刚，系柔去踏两个刚，千祈唔好反驳，点解柔可以踏两个刚呢，因为呢个柔系卦主，刚唔系卦主，六三系卦主，点解唔系刚去踏个柔，就系因为刚唔系卦主 ，现在系讲卦主，呢个柔系卦主，现在系照个卦主黎讲，即系六三踏住初九同九二，占到呢一卦就要明白系柔履刚，唔系刚履柔，反为有大势力，或者强者去欺压弱者就唔啱， 大虾细就唔啱，细虾下就反而啱，所以你可以发围，由细发展到大，呢个说字读悦字，变成悦而应乎干，悦系乜野的卦象，就系兑卦的卦象，兑就系悦，下面系兑卦，就系悦，悦而应乎干，上卦就系干。

续彖曰：是以履虎尾，不咥人. 亨，因为佢能够同刚相应，所以佢踏虎尾都唔去咬佢，或者唔去对佢发恶，刚中正，履帝位而不疚，光明也，乜野叫做刚中止，九五系刚爻，阳爻在中正个位，在易经的范围凡亲见阳爻在五位就系刚中正，九五系至尊的位，即系黄帝的位，履帝位而不疚，因为佢刚中正位置又啱，而又不偏不倚，刚即系不偏不倚，中正就系出发点正确，所以坐在帝位而无内疚，因为内心光明，内心光明正大所以坐在帝位亦唔觉得有唔妥，就系履帝位而不疚。

象曰：上天下泽，履，君子以辨上下，定民志。

上天，上面系天，即系乾卦，下泽，即系兑卦，咁系乜野，就系君子辨上下定民志，民志就一般老佰姓的意思，定民志就系睇老伯姓的意思，点样黎定老伯姓的意见，下就体察民情，上就系睇吓那班大人诸侯，睇吓呢班诸侯的行为系点样，呢班诸侯，佢地的见地系唔系尊重老伯姓的意思，抑或违反老伯姓的，呢班诸侯系贪官污吏，抑或系爱民如子， 辨上，辨完上就要辨下，咁就知道D人民的取向，老伯姓的共同愿望系乜，咁就系履，履者即系实践，引伸作为实践，所以在易卦里面好多意义系咁，都系引伸出黎的，你要履帝位，实践呢个帝皇的职责，就要咁做，即系要睇匀上下的环境先至决定。

占到呢一卦问前程就一定因难重重.

问婚姻表示急唔黎.

问事业可以创业。

初九：素履往，无咎。

素履，着住对净色的鞋，古代的制度，天子那一对鞋，（群）红色边，红色梁，所谓赤梁，红边，黄鞋，中间一条直条红色就系天子的鞋，诸侯的鞋就唔可以着黄色鞋，但系要着绣花，什彩色的鞋，绣晒彩色的鞋，咁先至符合礼节，亦都系礼服的一种，素屐呢，就系平民老佰姓著的，冇装饰的，冇色彩更加无绣花，所以叫做素，着对咁样的鞋去，就无事，点解会无事，即系话平民老伯姓去对果D大人或者去见D大人，果D大人都无籍口揪抨佢，就会听佢讲野，因为呢一卦的重点好紧要，就系柔履刚，系个柔讲D野俾个刚听。

续初九：即系话平民老伯姓讲D野D大人听，而D大人亦都会接受，所以素履往就无咎，平民老佰姓，去见D大官都冇事，素履住即系低调处事，唔好争锋。

象曰：素履之往，独行愿也。

点解个平民老佰姓自己愿去，独行愿也，自己去讲佢自己的愿望。

用平素的態度去表達自己的心願，唔須要執到好正，唔須要用特別的衣著，似平時的生活，又唔使一大班人去壯膽，就可以去表達自己的意願，表示呢個上係好和善，如果唔好相與就一定唔可以素履之往，唔可以好隨便咁樣去，更加唔可以獨行，一定要成班人去先至夠膽，呢度係講發覺有唔妥的野，就即刻去講出黎，係一件好平凡好正常的事，

占到呢一爻問前程一定會遇到Ｄ好好的人，好公正．

問婚姻就表示要誠懇，不浮誇，就會成功．

問事業一定要下情上達，唔使注重門面功夫。

九二：履道坦坦，幽人貞吉。

行緊條路，好平坦，行一條好平坦的路，幽人貞吉，幽人就係被囚禁的人，被囚禁的人占到呢一爻就好，因為當時俾人囚禁起黎的人唔係好似現在咁樣，要去做工，當時，輕微的事就劃地為牢，在地上劃一個圈，犯人就企入個圈裏面，等Ｄ人羞下你，對你指指點點，下次你就唔敢再犯，呢Ｄ通常唔超過三日，在當時係好有效的刑罰，但現在就損害人權，如果現家實行劃地為牢的話，罪案一定少好多，如果犯中形罪行，就叢棘為牢，用的有針剌的樹枝圍住你，等你走又走唔出，跳又跳唔到，如果係大罪就一樣要你去做野，如果走到去山頂斬柴搬石就崎嶇勒。

續九二：上山下海，梗係辛苦啦，但係現在唔係，現在條路好平坦，幽人貞吉，所以佢地占到呢一爻就好勒，雖然囚禁住，但係都好舒服，要去做苦工，但係過程都係好舒服的。

象曰：幽人貞吉，中不自亂也。

呢個係九二，九二係下卦的中位，個中冇亂到，本來會亂的，因為呢個唔係陽爻的位，呢個二應該係陰爻的位，陽爻坐左陰爻的位，本來會自亂的，但係佢比（比和）得好，同個卦主比得好，所謂比得好就係自己係陽爻，但係唔得位，就要搵個陰爻黎相比，因為呢個陰爻咁啱係卦主，所以話比得好。

占到呢一爻如果問前程，表示主動權不在自己度，但係千祈唔好放棄自己的宗旨．

問婚姻表示一生都會做奴隸，但係你係開心的．

問事業就會做得好辛苦，但係唔好放棄，唔好中途退出，因為孔子話：中不自亂也。

六三：眇能視，跛能履，履虎尾，咥人凶，武人為於大君。

六三呢個卦主弱到不得了，三係陽位定陰位呢，我地都知道呢個三係陽位，現俾個陰爻坐左，而且用一個陰爻去領導五個陽爻，又失位，咁所以呢個六三陰爻係一個好弱的環境，同時自己的勢力又好弱，在咁樣的情況下重要去領導五個陽爻，辛苦的情況可想而知，在咁的情形之下要用乜野態度呢，咁就要用懷柔政策先至得，現在唔係，你如果想用武力就唔掂勒，就等於單左隻眼的人，重要話自己的視力好好，能以視為能，呢個能唔係解能夠，係解本領，以視力做自己的本領，單左隻眼重猛咁話自己的眼力好。

續六三：重要誇耀自己的眼力，跛能履呢度個跛字應該讀做（幣）字音，但現在個個都讀跛，就跛都無所謂，呢度話（幣）左隻腳重要以行路黎做自己的本領，咁即係不自量力，咁樣就等於踩到條老虎尾，隻老虎就咬你，隻老虎就算唔咬你都對你發惡，呢一爻在漢帛中亦係寫個嗔字，呢個嗔字即係嬲咁解，所以呢度話履虎尾，嗔，就人凶，屐虎尾不嗔就無事，呢一爻係講隻老虎咬人，咁又點呢，武人為於大君，本來就係俾你帶Ｄ兵啫，帶Ｄ軍隊但係你居居然對個大君有所不順，有所做作，即係睇個上司唔順眼，呢度的大君係君主的意思，即係睇個君主唔順眼，亦即係想作反咁滯，咁就凶啦，自不量力，等於單左眼就話自己睇野睇得叻，（**幣）**左腳重話自己行路行得快，咁就係不量力勒，其實呢一爻話俾我地聽要量力，唔好超出能力範圍，千祈唔好勉強而為。

象曰：眇能視，不足以有明也，跛能履不足以與行也，咥人之凶，位不當也，武人為於大君，志剛也。

單左隻眼重要話自己的視力好，就唔見得你有眼光，有明即係前面的野睇得好清楚，即係現在的好有眼光解，不足以有明，也即係先天性有缺點，又點會係一個有眼光的人呢。

跛能履，不足以与行也，你自己跛左只脚重话行得好叻，唔等于同你一齐可以行路，跛左都可以行，但系唔可以同我一齐行得咁快。

**咥人之凶，位不当也，**点解会咥人，即系咬人，因为你个位唔适当。 武人为于大君，志刚也，武人居然对于大君有所做作。 由于志刚，即系个内心，太刚，刚愎自用，以为自己好有宝，好有威，明明系单眼跛脚，重以为自己睇得好准。

续六三彖：明明自己系无咁的才干，但一定要自己去做去理，呢度包括有过份自信，呢一爻系阴居阳位，成不中不正，就会做左D自己能力以外的事.

占到呢一爻问前程就多荆棘勒，会因为太勇于进取而得罪人，而且系得罪D恶人.

问婚姻就未系时候，因为对方未同意，你就谂住对方会点点点，其实唔系，对方同你所想的完全唔同.

问事业就好容易因为睇唔到或跟唔贴而俾人走数或者俾伙记作反。

六四：履虎尾，愬愬终吉。 音诉，即系好惊。

踩住条老虎尾，好惊，但你都吉，点解吉呢，因为你识惊，踩落去的时候唔吉，但系终吉，就系识得惊，识得惊就自然谨慎，但系要踩到老虎条尾先至识得谨慎，先至醒觉，即系后知后觉，但系终吉，即系好过不知不觉。

象曰：愬愬终吉，志行也。

点解惊就会吉呢，你内心唔系刚，内心系柔的，刚就死一牛一边颈，明明系踩到老虎，明明系碰到危险，困难都唔肯转湾，就叫刚，但系呢度话志行也，点叫行呢，顺时应势就谓之行，适应环境就谓之行，因为系识得睇风头火势，所以遇到危险或困难就识惊，知道要转湾，唔好死牛一边颈，一定要重新计划，所以话踩到老虎条尾，都会吉， 就唔关系只老虎有无发恶，完全系自己内心的意态问题，行就好，刚就唔好.

占到呢一爻问前程，就一定先难后易，小心唔好得罪人，一定要谨慎行事.

问婚姻就会有好多人反对，但系最后都会成功，结局系好的.

问事业就一定有好多问题，但呢D问题一定要自己解决，因为志行也，取决于自己对形势识唔识得掌握。

九五：夬履贞厉：

夬就系破烂咁解，夬即系缺，缺就即系裂，所以现在有决裂，呢个名词，决就即系呢个夬字，着左对裂左的鞋去做野，咁样去做野就有问题勒，有棘手野出现，但呢件事都可以完成，贞厉，厉就系艰难，虽然呢件事会成功，但系要经过好长的艰难，所以贞厉。

象曰：夬履贞厉，位正当也。

点解夬履会贞厉，位又正当呢，着对裂左的鞋去做野，梗系辛苦啦，又位正当呢，因为刚中正也，以前都讲过，九五系阳就叫刚中正，亦即系呢度的位正当也，因为个爻居九五 位，所以就只系厉啫，唔系凶，点解着对裂左的鞋去做野都唔凶，只系贞厉而已，只系艰难啫，本来应该凶的，着对裂左的鞋，对鞋擘大个口点会吉呢，虽然唔吉，但系都未到凶的地步，点会吉呢， 虽然唔吉，但系都未到凶的地步，点解都唔凶呢，因为位正当也。 啱啱坐到个好位，好似一间屋咁，就算自己间房或者办公的地方在成间屋的凶方，例如七运子山午向乾宫位，六运山未向的兑官位诸如此类，凶方位，唔会凶至多都系厉啫，点解呢，就系呢度所讲的位正当也，所以个位正唔正好紧要，呢度唔单止系个位的问题，亦包括左自己所企个位的问题，即系在一间公司或者一个机构甚至官场里面， 呢度的夬履亦都代表左自己的条件唔系咁好，或背景唔够人地咁雄厚，例如朱玲玲事件，又例如钟庭耀事件，如果有强而有力的靠山，就唔会有咁的烦恼，好似何超琼，有强大靠山，老公点做佢又点做，就系因为佢地夬履，同时。

续九五：位不当也，即系唔知道自己企乜位，所以就会凶，如果知道自己的条件，就要位正当也勒，自己企翻个好位，就虽然系厉，但系都吉的，好多人以为易经只系教人点样谦和，敬天，其实好多系教人点样去卸膞，点样去避人地的暗箭。

占到呢一爻问前程就千祈唔好开口原则，埋口就理想，一定先要明白左自己在乜野位，先至决定采取正或不正的方式.

问婚姻其中一方就一定要忍，至于去唔去到忍气吞声的地步呢，就要睇下位正当也，抑或位不当也，即系你喜欢用乜野态度勒，所以我地成日话命运在自己手上就系咁解。

问事业初初就唔好要求咁高慢慢黎。

上九：视履考祥，其旋元吉。

视履考祥系乜，就系行路的时候望住对鞋，望住自己对鞋黎行路，快定慢呢，咁就一定慢啦，梗系一步一步咁样行啦，能够一步一步睇住自己对鞋黎行，考祥系点呢，即系每一步都搵个好地方先至踩落去，考就系观察，祥就系好的地方，观察到无危险的地方，例如唔系地洞，唔系水氹，更加唔系陷阱，睇住只脚遂步咁踩，其旋元吉，旋即系打圈，咁样遂步遂步打圈就大吉，即系话如果你小心，唔乱咁踩呢就吉勒，其旋元吉的其旋就系返屋企，即系小心慢慢行就可以返到屋企勒，其实呢一爻俾其他书曲解晒，一睇见元吉就话非常好，大吉， 我地一定要知道占周易一定明白千祈唔好见到个吉字就一定吉，见到凶字就一定凶。

好似呢一爻，要望住个地下一步一步，行先至返到屋企，即系要步步为营，你话吉定唔吉，一定唔吉啦，如果妙股或者炒外汇占到呢一爻就死梗，如果见到吉字就叫你落叠就死梗，唔知几时先至望到家乡，因为行错一步都唔掂，所以千祈唔好楂住一个吉字. 凶字. 厉字就判断佢吉或凶，好容易就错，一定要知道成个卦的意思，同埋呢一爻搅乜先至得，呢度全个卦的意思就系要柔黎履刚，以柔黎统领刚，如果自己系强的一面就要接纳柔的意见，如果你系柔的就可以发挥，不过你的发挥唔系乱黎的，唔能够武人为于大君唔能够超越，好似呢爻视履考祥要遂步，考察过无问题先至可以行，先至可以返到屋企，呢一爻其实系一个好形象化的画面，在当时的人以畜牧为主，赶D羊赶D牛去到好远的地方食草，当天黑要返去的时候，又要睇路又要唔好俾D牛羊走失，天色又越黎越黑，果种心急之情唔系我地现在的人所能明白的，好似历史记载汉朝苏武牧羊，每走失一只羊就要打五十鞭，咁你就明白到其旋元吉系几咁重要，几咁值得欢喜，返到屋企而又无损失几咁欢喜，所以古代的社会同现在的社会系完全唔同的，我地现在就好难体会佢地的环境。

象曰：元吉在上，大有庆也。

呢个庆我地以前都解释过，即系有好野咁解，元吉在上，阳爻在上位，本来系唔好的，但系现在佢失位都吉，所以就有庆，呢度话虽然好危险，要步步为营，但系都可以完成一件事，所以系值得开心的。

占到呢一爻问前程，就一定充满艰难，但系在艰难之中又充满希望，令你不断咁觉得有动力，好似买六合彩咁样.

问婚姻，如果你系经历好多波折的，呢段姻婚就系好好的，如果相识冇耐就问婚姻就一定唔好或唔成功。

问事业就要好小心，小心乜野，小心临门一脚，例如做接生意的就要小心，越倾得七七八八就越要小心.

综观成个履卦，都系处系劣势，都系以弱胜强，开始时履虎尾，跟住又辨上下，素履往，先至无咎，跟住又幽人贞吉，跟住又眇又跛，之后愬愬终吉，跟住又夬履，最后重要考祥，先至可以有庆，所以呢个卦系经过好多荆棘先至去到目的。