《易经》第十一卦【泰】天地泰#

泰：小往大来，吉亨。

呢个卦的卦词就系小往大来，我地最紧要留意，在易经里面讲好多先后，小大，来往，返复呢类的字眼，千祈米睇小或者忽略呢类字眼，因为呢一类字眼系好重要的。 泰就系地天泰，呢个泰，如果照孔子的思想，就认为系一个非常好的卦，因为儒家最主张的就系中和，中庸之道，平衡，呢个卦就平衡到极，三个阴爻，三个阳爻，阴上阳下，平衡之中点解地在上而天在下呢 ，正常应该天在上，地在下先至啱的，点解咁得意呢，照儒家解释就系阳气在下面遂爻遂爻咁样升上去，即系话个阳气重有发展的余地，因为卦爻系由下开始向上数的， 现在个阳气升到第三爻，佢重有机会升到上去第四爻，第五爻，甚至上爻位都得的，儒家的中庸之道就唔钟意一升就升到尽，一跳跳到尽就唔得中和，因此就留有发展的余地，所以唔系睇 卦象，系睇个爻的阴阳，爻的阴阳就叫消息，息就系生长，消就系收藏，现在呢一个阳爻一路路生长，个阴爻就一路消，个阳爻重有息的机会，个阴就一路消， 因此儒家就认为呢个系一个好的卦，平衡得黎有前途，所以呢个泰卦就小往大来，乜野系小往大来，支出去的小，番黎的多，就叫小往大来，能够小往大来，能够小往大来就因为个阳一路息，一路生上去，当阳息阴消的时候，会有小小的损失，但系总括黎讲系有着数的，就小往大来，你占到泰卦无论系边一爻都要留意小往大来，呢个系泰卦的纲领， 每一个卦你一定要知道佢的纲领系边一度，个卦主就系九二，呢个九二虽然在低位，但系同六五应，阳同阴相应，虽然阳爻唔得位，因为阳性上升，所以同六五阴相应，阴阳相交万物生，所以吉亨。

彖曰：泰. 小往大来. 吉亨. 则是天地交，而万物通也; 上下交，而其志同也。 内阳而外阴，内健而外顺，内君子而外小人. 君子道长，小人道消也。

同否卦相反，否系负面的，所以天地不交，大往小来，无利可图，但泰就相反，泰系正面的，小往大来，付出小小而收获多多，一间铺头有泰卦出现就会出现D无用的人离开，让的有用的人入黎，即系清除D淤血，所以吉，前途无阻，就亨，天地交，即阴阳调和，万物通，上下交，而其志同也，即系和气，上下一条心，就系其志同，以卦象黎睇上坤为阴，下乾为阳，阴气下降，而阳气上升达到阴阳调和目的，就系上下一心，就系志同，内阳而外阴，内健而外顺，表示和而不同，即系你的意见我唔反对，但我唔同意，亦即系包容不同的意见，即系容纳，呢度唔系表示奸，并唔系表面同意，内心反对，亦唔系阳奉阴违，因为内阳，内心正当，内健而外顺，乾代表健，坤代表顺，乾代表君子，坤代表小人，君子道长，小人道消，乾卦阳爻一路路向上升，不断膨胀，将坤卦小人迫离自己的范围，所以道长。

象曰：天地交. 泰. 后以财成天地之道. 辅相天地之宜，以左右民。

天地交，唔同意见的人消除左D岐见，唔使面左左，大家都好舒服，就泰. 后，呢个后唔系先后个后，而系领导人咁解，财即系栽，大家无晒不同的意见，就由领导人重新分配工作，以前大家意见多多，你唔妥我而我又唔妥你，但系现在唔同勒，大家无晒歧见，所以由呢一个后，领袖重新分配职位，辅相天地之宜，以左右民，天地之宜，有D系好大件事，所以要搵D叻的人，以左右民，系一班人中拣D好的出黎。

占到呢一卦，问前程：就表示一路路好，但系有风唔好驶到尽，要保持中庸之道，唔好急进.

问婚姻：就唔会一帆风顺，只可以慢慢来，急唔黎.

问事业：就要同D唔同意见的人合作，就会成功，同一口径或同一专长就会很辛苦，因为呢度阴阳交，要唔同的专长溶合埋一齐就会成功。

初九：拔茅茹，以其汇，征吉。

呢个汇应读猬，剌猬个猬，古人一直将呢个字读做猬，证实系有根据的，因为马王堆出土的汉帛书都注明系读猬。 乜野系拔茅茹，茹就系草根，现在重有的，在中药铺D竹茹，就系竹根，嫩竹的根，茅茹就系茅的根，抆条茅草连根都抆起，果D根松起晒，好似只剌猬咁样，所以就话拔其茅茹，以其猬，以：似，好似只剌猬，直情系拮手的。 征吉，出行就吉勒，成句的解释就话改变环境就吉勒，点解改变环境就吉呢，因为连根都抆起，所有关系都离开晒，去一个新的环境，因为呢卦的要意义系小往大来，初初系有所损失，但系慢慢就有大收获，呢个系成个卦的纲领，有的书解做抆起D茅草的根，又将佢分类，系唔啱的。 又有D书解做D茅草的根相互纠缠，抆起一条根就连带周围果D都抆起晒，咁样就团结一齐去安邦救国，简直搅笑，本本书都将每一卦每一爻都解成忠君爱国，点样保护国君，唔疲倦吗？ 唔觉得闷咩，所以尽信书不如无书，睇下个象词。

象曰：拔茅征吉，志在外也。

睇埋呢个象解己经好清楚，征吉就要拔茅茹，点解佢要离开就好，因为志在外也，呢度成个卦系讲阴阳交替，改变就系好的。

占到呢一爻问前程：

问婚姻：

问事业：

九二：包荒，用冯河，不遐遗，朋亡，得尚于中行。

包：刨。 冯：凭，凭河. 后世有凭河之勇，即系就咁就过河，完全旡装备，靠一股蛮劲。 遐：战马。

呢度有两个读法，一个就系头先的读法，另一个就系：包荒用冯河，不遐遗，朋亡，得尚中行。 呢个包字读刨音，但系呢，就有人读抱音，刨同抱音呢个争论由明朝初己经一路有争论，究竟读刨或抱呢，就全靠D出土文物，结束左呢个争论，马王堆出土的汉帛书就写呢个木字边个包，就系枹字 ，就变成左枹荒，经过印证之后，应读系枹荒，音就不妨读刨，但系解释就绝对唔系包，有D书解释为包就系包容，荒就系荒废之物，即系污秽之物，变成包容D唔干净的事， 如果系73年以前写的书，就情有可原，但系曲解就罪无可恕，但系那些90年代之后所写的书仍然用番旧有字眼或读音，而不加注明，简宜就系抵死，证实真系天下文章一大抄，真系无讲错，一味因循苟且，唔去接收新的信息，亦都唔肯改变自己旧有观念，更加唔肯认自己有错。 讲番呢个包字，刨或者枹用国语黎读就好接近，刨荒，刨就系抱，后来先至发展到剔手边，乜野系荒，荒即系一堆草，重要系乱草，即系一堆乱草就叫荒，一般叫荒原就系长满乱草的荒野，话呢个地方好荒芜，就系呢个地方或者呢个花园长满乱草，用凭河就系咁样靠佢过河，无过河的工具，以前过河就系揽住一个大的壼芦瓜过河的，但系现在连瓜都无，就只有揽住D草都好啦，因为D草有浮力，而且浮力好好，如果唔系就点会有一苇渡江呢个名词，刨荒用凭河就系揽住一扎茅草过河，不遐遗，遐系乜，好靓的战马就叫遐，系要黎打仗的战马，不遐遗，无遗失果只战马，成个画面就系一手揽住一扎芧草，一手拉住只战马过河。 朋亡，同你一齐过河的战友就做唔到勒，佢地遗失左只战马，得尚于中行，呢一个尚就系赏，即系奖赏，因为你刨荒用凭河，不遐遗，所以就得尚于中行，就得到中行的将赏，乜野叫 中行，呢度就要明白古代的兵法制度，古代行军就分三行，左中右，右左两行系马车，中间系骑兵，中行，复卦里有中行独复之句，现在呢度得尚于中行，点解要中行的赏呢，因为中间系最大的， 左右都系战车，保护中间的中行，受保謢的通常系最大的，你用凭河不遐遗，所以得到最大果个的奖赏，但系朋亡，同你一齐过河的战友就唔得勒，佢地就失左只战马。

象曰：包荒. 得尚于中行. 以光大也。

经过咁艰难的过程，抱住的茅草黎过河，而无损失，得到上头的赞赏，周围讲俾人听，好开心。

占到呢一爻问前程：就唔好以为好顺利，进行事情你就知道刨荒用凭河，你过河过得好辛苦，不过就无唔见左只马，无损失，所以就得赏，每完成一件事都要经过艰难，不断咁接受挑战，表示前程系好多荆棘的，所以一定要识解个爻词先至可以占卦占得准的.

问婚姻：就唔乐观，因为长辈唔同意，但如果系经过波拆的婚姻或者系第二次就会好的。

问事业：就唔好同人合作，因为得尚于中行，只系一个人的事，主要原因就系朋亡，你的同伴系做唔到你的野，所以合作系无好结果的。

九三：无平不陂，无往不复，艰贞无咎，勿恤其孚，于食有福。

乜野叫做无平不陂，无往不复，无平地就显唔出一个高的山陂，等于广东话重有句俗语保留住，无高山就显唔出平地，呢句广东话唔知你地重有旡讲。 无高山就唔觉得平地相差咁远，呢度就相反，无平地就显唔出高山，无往不复，唔出门就无得返屋企，唔去又边有得返呢，呢两句的意思就系一种比较，任何事都要进行，唔去就无得返，唔进行就无得完成，呢两句的意思就表示唔系太吉利，无平地就显唔到有高山，系相对性，并不是绝对性，因为后面跟往艰贞，事情进行中系好艰难的，但系艰难唔紧要，贞无咎， 艰难的时候好长，但系唔紧要，因为你高山都可以行过，所以你捱得住，就系咁样所以无咎。 勿恤其孚，于食有福，乜野系勿恤其孚，唔好失去你的信心，于食有福，如用广东话黎讲就系好食神，好食神的意思就系去到度度都有得食，亦都代表咗你的人缘好好，所以唔好失去你的信心，因为你有好的食神。 我地现在睇易经，有一样要注意的，就系唔好睇少个食字，唔好将我地呢个年代同古时相比，现在食个汉堡包都话胆固醇过高，苦口苦面，在商周时代食系一件好大的事，民生最大件事就系食，国家领导人最大件事就系打仗，领导人最大件事就系点样去侵占别人的土地或点样，唔俾人侵占自己的土地，因为当时的天然灾难好多，人口或者牲口不断损失，所以亦要不断补充， 呢D就成为领导人的重任，但系人民就唔同，佢地最紧要的事就系食，所以有餐食或者有餐好野食系好难的，唔信可以睇下孟子点样教佢D学生，话你地养父母到佢地70岁，就要俾肉佢地食呀，养 亲70岁先至可以食肉，即系69岁都唔会有肉食，70岁重要老师教先至俾肉个父母食，由此可知食肉真唔容易，现在就唔同，有肉食都嫌三嫌四，所以呢一爻话于食有福， 你好食神架，你唔好失去你的信心，即系话你可以继续进行呢件事。

象曰：无往不复，天地际也。

唔去就唔会返，唔做就点会成功呢，天地际，现在所企的位置系阳的尽头，阴的起点，阴阳的边界，即系过呢一边就阳，过呢边就系阴，即系睇吓你点样决定呢件事。

占到呢一爻问前程：就知道唔系咁顺利，又要上高落低，来来往往，先至可以做成一件事，真辛苦。

问婚姻：就多波折，但系唔好气馁，你始终都会成功的。

问事业：就系多劳少成。

六四：翩翩，不富以其邻，不戒以孚。

以：受到影响。 以其邻：即系受到隔离影响。 孚：诚信。

翩翩即系好好姿势，好有形，好开心的姿态，点解都唔富呢，以其邻，俾隔离邻舍令到你唔富，点解隔离邻舍会令到你唔富呢？ 原来俾人偷晒D野，你搵几多俾隔离偷几多，不戒以孚，因为相信咗隔离，就唔会对隔离有戒心勒，孚就系信，你点解无防备隔邻偷你野，以孚，因为你对人地有信用，以为人地都有信用，以为隔离唔会偷野的，所以就无防备，D野俾人偷晒，行出黎就有型有款，屋企就穷到燶，屋企点解会穷到燶，因为俾隔离偷晒D野。 古代的富系乜野，就系粮食，同埋腊起D野兽的肉，腊起的鱼，系易经里面有讲鱼干的，有鱼干食系好好的，因为打猎唔系次次得手的，所以粮食系当时最大的财富，在周代己经发展到农业，而游牧业同畜牧业，己经渐渐受淘汰，打猎并不是每次都有收获，畜牧业并不是随时劏羊，劏牛，一般都要到有大祭祀的日子先至劏牛，劏羊，所以食一餐肉唔系咁容易， 猎物就系一家人的财富，如果俾人偷左就喊都无谓，咁样就不富，翩翩不富，以其邻，不戒以孚，就系话你信错咗人，正常系可以信的，但系可信的反而变成不可信。

象曰：翩翩不富，皆失实也，不戒以孚，中心愿也。

点解会不富，因为隔离偷我的野，失实，知人口面不知心，不戒以孚，不戒，有人劝我但系我唔听，中心愿也，我认为自己好啱。 成句就系因住佢会偷你D野呀，佢个老实样系装出黎架咋。 但系你唔信，重认为咁大疑心系唔啱的，佢系好人黎的。

占到呢一爻问前程：就一定要步步为营，不要无条件的相信他人，同时以为最值得相信的人就更要小心.

问婚姻：就一定要接受长辈的意见，唔好死牛一边颈，如果唔听就一定无好结果的。

问事业：就表示内部有问题，即刻就要检讨，或者转呔。

六五：帝乙归妹，以祉元吉。

全个卦最好一爻，帝乙系乜，帝乙系人名，乜野人的名，就系商朝纣王个老豆，即系坦己个老爷，当时的人改名多数都系睇吓在边一年出世，就用果一年的天干做名，呢一种改名 法系商代的习惯，所以商朝有一个王帝叫做武丁，因为佢系丁年出世，武丁就系帝乙的老豆，而帝乙就系纣王的老豆，佢系乙年出世，因为佢系王帝，所以叫做帝乙，商朝去到帝乙手上，国势开始弱， 当时在西方有一个叫做岐的地方，有一个民族兴起，呢个就系周民族，开始唔听话，唔听中央说话，威胁到帝乙，所以帝乙用和婚法，使出一段政治婚姻，将个女嫁俾周文王，周文王个老婆就系帝乙个女，后来周文王去打纣王就系打个大舅，原来大家系亲戚，但系为咗霸权，就唔会理会亲唔亲戚，所以我地读历史，千祈唔好俾D封神榜影响，将纣王当得咁衰， 因为封神榜里面讲到纣王衰到极，周文王就系天下第一好人，其实只不过系两个民族的斗争，根本无所谓好人坏人，纣王未必坏到咁紧要，但系后来D人将D罪名推晒在坦己身上，后来谙真下，一个女人唔似咁叻，就将坦己讲成系狐狸精，有法力，所以先至咁犀利，实在边有咁多精，睇真D其实纣王只不过充其量系一个花花公子，佢老豆留落黎个档摊己经弱晒， 佢就听左当时的所谓忠臣闵太师的说话，衬周文王黎朝见之时，将周文王扣留，扣留咗个妹夫，咁周民族就真系唔敢郁，因为自己个犹长俾人扣留。 后来周武王买通咗纣王身边的奸臣，放左周文王，将个妹夫放番去，纣王一生就做错咗呢一件事，周文王就起兵打纣王，重要联合其他诸侯一齐伐纣，但系纣王重有一个妹夫 ，崇克虎，呢个崇克虎在封神榜里面好有名，呢个崇克虎因为帮纣王，所以就变咗坏人，于是乎就有黄飞虎反五关，讲到纣王不知几坏，其实睇晒成本商周历史，纣王都几可怜，佢只不过系花花公子一名啫，因为帝乙果阵时国势已经开始弱，佢只不过想享下父荫啫，又话佢酒池肉林，穷奢极侈，以前都有讲过呢个酒池，其实当时个个都有个酒池的，绝不豪华，因为当时的酒池要黎藏酒的，如果现在的泳池载酒红酒就可以称豪华，呢度的帝乙归妹，以祉元吉又系乜呢，呢度就广东人先至识解的，好多书都搅笑，写成嫁妹，其实系嫁女，广东人叫自己个女多数都会叫妹， 所以呢度的归妹应读成归妹。 事实系嫁女，唔系嫁妹，以祉元吉，照一般的解释系为因为佢有福气，所以呢段婚姻就大吉勒。

呢个祉就系福气，但系根据马王堆出土的易经就有另一个解释，佢写成以齿元吉，牙齿的齿，咁样解法就唔同勒，齿系乜野，年齿，以前要知道只马只牛几多岁，就要睇下佢有几多只 牙，就知道几多岁，所以叫做齿，后来D人自谦话自己年纪大而无乜用就话马齿徒增，以齿就系跟住个大细年龄黎嫁，先嫁大女，再嫁二女，三女，咁样就叫以齿，顺次序，照年龄跟住嫁就大吉， 帝乙嫁女，照年龄大小去嫁，元吉，就大吉勒，呢一个解释就啱D，因为同历史吻合，点解呢个解释啱呢，呢一爻话以齿元吉，顺次序就好勒，但系帝乙并无顺住次 序将D女嫁出去，佢将个细女先嫁俾个诸侯崇克虎，之后将个大女嫁俾周文王，以为将两个女嫁晒俾两个大诸侯，以为好稳阵，点知其中一个女婿，周文王唔钟意，呢个女婿就作佢反，佢就错在唔以齿， 帝乙先嫁个细女俾崇克虎，再将个大女嫁俾周文王，周文王就唔高兴，点解，因为系老女，再加上呢个老女嫁入黎之后无仔生，于是乎再娶埋一堆姬妾，个个都有仔生，系佢无得生，点解佢无得生，因为佢老咗，一嫁周文王就唔高兴，但系如果掉转将个大女嫁俾崇克虎，将个细女嫁俾周文王，可能现在成个中国历史改写，就唔会有周文王作佢反，无左呢场战争， 可能我地现在都重系商民族的后代，重用紧商民族的文化，所以呢个世界好“桥”，领导人的一个唔觉意的决定就影响到后世几千年，现在商文化去咗边呢，就系去咗朝鲜，无论服装，大男。

第十三页 第十一 地天泰

人主义都系商朝的翻版，朝鲜人所保留的全部系商民族的文化，见到朝鲜服装就系当时的商朝服装，放眼望其他国家都好重视自己的传统，唔好讲欧洲国家，就讲日本，对佢自己的传统极之重视，但中国人就....

象曰：以祉元吉. 中以行愿也。

呢一卦的互卦系归妹，所以讲到嫁女的时候就取名归妹，有D野系要顺住次序去做，就得到福祉，中以行愿也，希望佢地帮自己，呢个以齿系有目的的，但系元唔元吉就唔知.

占到呢一爻问前程：就表示要做决定之前一定要深思熟虑，唔好错，错亲就影响好大.

问婚姻：就千祈唔好爬头，一定要顺序，家姐唔嫁千祈唔好嫁住.

问事业：就要用手段，亲信反而不足相信。

上六：城后于隍. 勿用师. 自邑告命. 贞吝。

城后于隍，隍系乜，隍就系謢城河，謢一个屋村的河就叫做戍，謢一个城的河就叫隍，所以现在重有个城隍庙，一般人都以为城隍庙果个隍系封咗做皇帝个皇，其实唔系，城 同隍系两样野黎的，城后于隍，道城垟倒塌左落条河度，咁样都唔知道好定唔好，于是乎就点呢，就勿用师，唔好打仗呀，城垟都倒塌左，都无得打啦，自邑告命由朝廷传黎的命令，传乜野命令， 梗系紧急的军事情报啦。 贞咎，贞系长期，咎系错失，所进行紧的事情就好差勒，城垟塌左就唔好打仗，有紧急情报黎，进行事情好艰难，安乐左好耐，样样都无保养，无防备，以致到有出乎意料之外的事情发生，又有命令落黎要进行，所以就好辛苦。 呢度用一个好无用的守城官来做比喻，一有小小事就搅唔掂，因为平时完全无做预备工夫，唔系以前D人先至咁样，现在D骨肉同胞都系完全唔会去保养任何一样野，数千年来人的性格根本无改变过。

象曰：城后于隍，其命乱也。

城垟塌咗己经手忙脚乱，再有命令落黎，己经无能力去完成，其命乱就系兼顾唔到。

占到呢一爻问前程：表示就要小心，居安思危，唔好大安主义.

问婚姻：就要小心有突然的阻挠，呢个阻挠系出自平时最相信的人，例如你认为某人系最唔会反对的，偏偏佢就反对。

问事业：就要防备俾人出卖，之后要应付好多麻烦。