《易经》第十二卦【否】地天否#

否. 否之匪人

否之匪人，呢个否字，有好多争论，现在通常都将D唔好的野就叫做否，D好的野就叫做泰，点解呢个否俾人当做唔好的野呢，因为匪就系垃圾，就算唔理古代的解释，就现代的都好多解法，但最正确的解法就系垃圾，渣滓，呢D就系否，你地D女性使嬲，最初的时候呢个否字即系妇字，系由商民族一路传落黎，商民族系一个极度大男人主义的民族，你地睇下朝鲜民族就知， 所以商民族捉咗俘虏，有男有女，D女人就叫做否勒，因为D女人做唔到野，所以就「劈」鬼左佢就算，捉到D男人就做到野，因为可以做畜牧的重工作，但系女人就无用勒，所以呢个否就系可弃之物 ，就谓之否，証明果阵时的女人系垃圾，应该「劈」左佢，呢D野唔系乱讲的，根据马王堆出土果本易经，呢个否卦当时系妇卦，即系「劈」得的，否之匪人，「劈」错左野呀， 「劈」错左D女人，但有另一个解释，就更伤心，否之匪人解女人唔系人，照商代传落黎果本易经，就真系写妇之匪人，女人唔系人黎的，但系到周代的解释己经和缓好多，就掉转咗解，你「劈」错咗野，点解周民族对女性会好好多呢，呢度就要多谢周文王另外一个大太太，同佢生好多仔的大老婆，相传文王有百子，其实唔系，只系得十个啫。 生左十个，十个都系仔，十个都本事的，个大仔就死左，其中有一个最出名就系周公，你地晚晚都去搵的周公，个名叫做周公旦，第二仔就系武王发，由细佬亚旦做军师，两兄弟一个郁手，一个用脑，一文一武 打嬴左纡王，不过呢D系后话，呢个亚妈就叻勒，生左个开国皇帝，唔单止咁，由佢推广呢个纺织业，咁果D女俘虏就唔使「劈」左佢，叫佢地织布啦，补衫啦， 咁D女人就有番D地位勒，如果唔系佢推行纺织业，D女俘虏就难逃被「揼」的命运。

否：否之匪人，不利君子贞，大往小来。

否系否定咁解，否系垃圾，否系闭塞不通，否系不通心情，呢度解D有用的人俾人当做垃圾，否就己经系低级的，但系都唔系完全无用的，点解呢，因为呢度的否以前系指女人，因为由商朝开始就夏民族的母系社会转变成父系社会，将女性的地位大大踩低，呢度的否包括左俘虏返黎的女人，将佢地当垃圾，但系佢地系有用的，因为当时己经发明左织布， 所以的女人就唔系完全无用，可以俾佢地织布，做衫，当时的纺织业令到女人的地位提高番D，成句否之匪人解否定错左，但系呢种情形唔系我地的错，系社会的错，系君子的错，即系订立呢D规距的人的错，呢度应该站在否的立场上睇，即系话俾人当作垃圾，俾人否定左自己的材干，呢D系无奈，因为主动权唔系在自己手上，孔子在呢度话「不知命无以为君子」， 即系话在呢种情况下一定要忍，点解呢，因为大往小来，大的去，小的来，就系损失，卦象系（）阳爻为大，阴爻为小，阳爻在外走，阴爻内，所以说大 的要去小的要来，所以系一种损失，因乾卦代表上升，称为大往，坤卦代表落下称为小来，这一卦坤卦在内，代表将小人在位，将君子驱遂出外，因为乾系君子，坤系小人，即系话小人得道，君子失势，所以不利君子贞，点解，因为大往小来。

彖曰：否之匪人，不利君子贞，大往小来，则是天地不交，而万物不通也，上下不交，而天下无邦也，内阴而外阳，内柔而外刚，内小人而外君子，小人道长，君子道消也。

否系闭塞，否之匪人，不利君子贞，大往小来，都系因为否，因为天地不交，而万物不通，天地不通者，乾卦在上，向外，坤卦在下，向内，变成阴阳不相交，阴阳不相交就万物不生，亦不通。 上下不沟通，点解有用的人会俾人当垃圾呢，因为阴阳无序，地天泰就叫叫阴阳有序，现在系内阴外阳，系小人将的君子赶出外边，就系小人道长，上面话万物不通，不通即系腐败，腐败的势力抬头，就系小人道长，正义进取的势力就被压低，就系君子道消，而天下无邦就系己经无晒法纪，无晒秩序，就系无邦，点解，就系因为万物不通，而致阴阳不交，至到君子道消， 呢个消即系退，退即系退缩，退让，但并唔系代表投降，更加唔系代表变节，因为有上面的种种原因包括左小人当道，恶势力抬头，所以就要忍。

象曰：天地不交，否，君子以俭德辟难，不可荣以禄。

天地不交令到恶人当道，否，即系世界变，唔可以正常的常态黎处事，君子以俭德辟难，辟难即系避难，以俭即系隐藏，收埋咁解，天地不交，否，世界立立乱，君子，有大志，有理智，有才干的人就要忍，即系留得青山在，不可荣以禄，即系无能力去改善唔理想的环境的时候，就唔可以享受高薪厚禄，好似以前房屋署的风波，既然下面班人唔听你话， 你就唔可以留恋果廿几万一个月，只有退隐。

问前程：就一定好荆棘，但唔系绝望，而系要等机会。

问婚姻：就会有突然的变故，通常会在觉得最有把握的时候发生，不分男女。

问事业：就有D唔系你的能力所能够控制的情况出现。

初六：拔茅茹，以其汇，贞吉亨。

汇：人：拉拢关系

抆茅草，连根拔起，唔好放过佢，汇即系顺住一条根连带周围有关系的都抆埋，呢度系讲小人的势力越黎大，或者开始壮大，一路去蚕食的好人，或者一路根据D线索去打击D同 自己对立的人，贞，呢个贞在呢度解系进行紧事情，贞吉亨就解改变事情的性质叫贞吉，本来系死牛一便颈的，但系现在就好灵活咁样转呔，识得转呔，就亨，就亨通。

象曰：拔茅貞吉．志在君也。

呢個拔茅即係殺到埋身因為以其彙，集合埋一齊黎打擊，點解重貞吉，因為志在君也，因為你預先知道有咁的事發生，所以及早轉呔，呢個轉呔只係暫時閃開，唔係放棄原則，所仍然吉，志在君也，即係搵到個替死鬼，呢個君即係比自己大，或者高級過自己，個背脊厚過自己，Ｄ箭射左去佢個度，就無問題，有Ｄ書解釋為你知道小人的勢力壯大，你就要保謢你的頂爺，因為果班人志在君也，想取其位而代之，所以你就要忠君愛國，保護呢個君，我唔同意，因為以周文王咁奸，咁虛偽，佢點會自己去擋的箭呢，只會去搵Ｄ擋箭牌，因為佢連食咗自己個仔Ｄ肉都可以詐唔知，一個咁深沉的人，點肯去捨己為人呢，但係唔知點解本本書都解為忠君愛國，大仁大義，証明本本書都係互相抄襲，總之天下文章一大抄就無錯，我呢本書係講仁義道德，我係教人忠君愛國架，我呢本係一本好書黎架。

占到呢一爻問前程：就好容易出現突發性的麻煩，而且越來越大。

問婚姻：就仍有一段時間，有排都未得，因為現在先至啱啱開始．

問事業：就會有麻煩，因為內部小人多，但唔好旨意有人幫你，你要自己攪掂。

六二：包承．小人吉．大人否亨。

呢度解庖承即廚中有肉；承：肉

呢個包即係庖承即係成隻牛，成隻羊，呢個庖承即係蒸成隻牛，成隻羊，拎去祭祀，就叫承，後來引申到未曾切開的祭品就叫承，不過當時最細果樣祭品都係羊，斷斷唔會求祈搵隻雞仔就叫承，同時呢個庖承就引伸成個蒸字，蒸字上面蓋住的茅草，中間擺左隻野，下面有火，就係蒸字，點解要用Ｄ茅草蓋住，因為舊時無咁大個煲蓋，所以就搵Ｄ茅草蓋住，而呢Ｄ茅草有來歷的，不過現在唔係講呢Ｄ野，呢度蒸係白蒸，係無落味的，呢個承就係成隻蒸左之後就拎去祭天，所以呢度個包字就叫作庖字，庖即係庖廚，在廚房蒸成隻牛，或者成隻豬，羊，小人吉，大人否，享，呢度的小人並唔係壞人，更加唔係篤背脊果Ｄ所謂小人，呢度的解釋係低級的人，呢Ｄ野係Ｄ低級的人去做就啱勒，因為在廚房的工作係Ｄ小人去做的，Ｄ大人就唔會入廚房的，所以小人吉，小人去做就吉，大人否就亨，Ｄ大人唔去做就好勒，呢度點解Ｄ大人同小人係絕對唔會撈亂的呢，原因就係由母系社會轉變成父系社會之後，開始有階級觀念，而且越來越根深蒂固，其實封建制度就係由周朝開始的，睇下個象詞。

象曰：大人否亨，不乱群也。

大人否亨，呢个否亨系代表放弃咗自己的身份，去做D低级的野，要一个高级的人去做D唔系自己份内的事，梗系D低级的工作，先至叫做否亨，所以就一定系内部有问题勒，不乱群也，乱群就系职责唔分明，大家都唔知做乜，呢D野又唔知边个负责，就叫乱群，呢度的大人否亨即系D高级的人唔去做果D低级的野，系好的，就唔会乱群，因为职责分明，各司职守， 呢个机构就无问题。

占到呢一爻问前程：就表示会有好的现象，会有人帮，你系小人就有大人帮，你系大人就有小人帮.

问婚姻：如果结婚就好，问离婚就唔好，因为结婚就男主外，女主内，职责分明就吉，如果问离婚就有可能父兼母职或母兼父职，即系职责唔分明，即系乱群也，所以离婚呢一爻就唔吉勒。

问事业：如果合作做生意就好，独资就有问题，因为无人分工合作，所以就不吉。

六三：包羞

呢个包羞应该变成苞羞，羞系乜，羞就系煮餸，羞就系菜，餸菜，爻辞苞羞之后并无俾提示你，无提示吉凶，煮餸，珍羞百味个羞，呢度一样接番上边果爻，苞羞就系煮 餸，煮野就一样系小人吉而大人否，呢度又引伸左另一样野，有餸煮，即系有收获，唔多唔少都有D收成，有野食，因为呢度无提示，所以就要承接番上一爻就系话要切合身份先至去做，虽然系有收获， 但系唔大，点解，睇下象词。

象曰：包羞位不当也。

因为阴居阳位，所以位不当也，虽然有收获，但系唔多，因为位唔啱，好多书解成包容羞耻之事，呢个系错解，因为唔知呢个包系苞字，苞即系苞厨，所以同羞耻之事拉唔上关系，只不过系代表有收获，但系唔系咁多.

占到呢一爻问前程：就表示系好的虽然位不当，但系无表示凶象.

问婚姻：就唔系太好，因为位不当，所以会有阴阳颠倒之象，例如女夺男权，因为位不当，但系呢个位不当系阴爻居阳位，所以女权会高过男权亦唔奇.

问事业：就分工不清，好容易有导致退出之事（因为六三爻变而成遁卦（有退出之象）。

九四：有命无咎，畴离祉。

有命无咎，好简单，就系接到一个命令，无坏。 乜野叫做畴离祉，我的伴侣，我的朋友就叫畴。 现在好少用呢个畴，以前用呢个畴同时代表左井田制，因为周民族，实行井田制，周民族未曾统一天下的时候己经实行呢个井田制，商朝，即系呢一个纣王就实行大镬饭，毛泽东好学唔 学大镬饭，其实毛泽东对易经好熟，唔知点解会搅大镬饭，邓小平就唔同勒，佢学周朝的井田制，即系由做咗系公家的，变成做咗系自己的，呢个畴就系解成你拥有呢一幅田， 佢有侧边个块田，一块田贴住一块田咁就叫畴，其实周民族的经济好过商民族就全靠井田，呢个井田其实一真沿用到今日，但系去到毛泽东就将土地收归国有，因为做到的都系归公家，所以大家都无心机做，做成中国人民在当时系全世界数一数二咁穷，但系邓小平将呢种情况扭转。 所以一个民族的兴衰系同佢的制度大有关系，毛泽东对易经肯定好有研究，但唔明点解会搅人民公社，所以呢个畴离祉就同果阵时的井田制度有关勒，井田就叫畴，离系乜呢，离就系得到，得到 就系叫做离，祉就系福，有命，有个命令落黎，无问题，成班耕田的伴侣，成班畴一齐得到福泽，就系畴离祉，相传呢一个就系公布井田制度的时间，因为有命， 而呢个命令就系领布实行井田制，个个都会系话今次无衰啰，无咎，畴离祉，今次个个都有福啦，咁就可以叫做畴离祉。

象曰：有命无咎. 志行也。

无咎，依照命令行事就无问题，点解无问题呢，因为志行也，即系呢个命令得到大多数人的同意，系可行的，呢一爻的意思就系话，呢一个决定系对大家都有益的，所以执行呢个命令就无咎.

占到呢一爻问前程：就一定唔好盲目附从，要分清是非。

问婚姻：就好难自己作主，要听从上面的意见，所以初时未必咁开心，但系后来就知道好勒，所以问姻缘就先凶后吉.

问事业：就一定要多同人合作，共同做一件事，达到畴离祉的阶段。

九五：休否，大人吉，其亡其亡，系于苞桑。

其亡：走咗. 系：绑住。

否即系垃圾，休否，即系清除垃圾，但系马王堆出土的汉帛书就写成休妇，休妇就系赶个老婆走，休咗个老婆，即系现在的离婚，以前旡离婚的，只有休妻，但系呢度系解揼咗D垃圾，休否呢的事系由乜野人做的呢，系大人抑或小人呢，泰卦同否卦都系一样，要适合身份先至得，大人同小人系有分别的，休否就只能由大人去做，下令将D垃圾清除佢， 下呢个命令一定要大人先至可以，所有唔要的野清晒佢，呢个命令就一定要大人，有地位的人，或一家之主先至可以落的，我地去睇风水周时都遇到一种情况，就系间屋垃圾太多，令到成屋人都无运行，但系要清除呢D废物垃圾并不容易，因为通常要保留呢D什物的都系一家之主或最老果一个，所以D后生的话要清除呢D野系唔得的，通常会得到一句， 你地要掉个D野不如掉埋我啦，所以休否就一定要大人先至吉，如果唔系D有权力或德高望重的人去做D休否就凶，呢两句的解释就系要做一样野一定要符合身份，其亡其亡，系于苞桑，呢两句同诗经 好接近，好有诗意，但内容绝不诗情画意，内容系话走咗啦，逃走咗啦，你绑在苞桑上面D野逃走咗啦，苞桑系乜野，系好矮的树，灌木，唔系乔木，系绑唔实D野的，其亡其亡，即系话走晒啰走晒啰，你绑在矮树上面的牛或者羊走甩咗啦，亦有人解释为绑住D奴隶走甩咗，亦有解释话绑住D女奴隶在D矮树度，俾佢地走甩咗，几种之中以女奴隶就啱D，因为休否，大人吉。 将呢班捉番黎的女俘虏「亚否」休咗佢，唔要佢，即系揼咗D亚否系要大人至得的，有地位的人先至得的，系大人先至可以落呢个命令，不过其亡其亡，系于苞桑，个大人有度失策，唔应该将D亚否绑在矮树上面，绑唔稳俾佢地走晒，所以当时呢个休唔单止系放左佢咁简单，重包括埋虐待或者甚至杀咗佢，所以佢地呢班亚否一有机会就要逃走。

象曰：大人之吉，位正当也。

大人之吉，点做都无问题，因为佢有权力，点解佢有权力做咁多野都吉呢，就系位正当也，因为刚中正，因为呢个卦系否定，系闭塞，系不通，系有用的人俾人当做垃圾，所以呢度九五虽然系刚中正，但仍然系负面的，唔系一般书上解释为乜野忠君爱国，君子重返其位。 简直不知所谓.

占到呢一爻问前程：就要小心，容易做牺牲品，一定要走精便，千祈唔好讲义气，有纠纷千祈唔好跟大队，千祈唔好做亚否.

问婚姻：就成功机会好微，因为唔受重视，所以重未得.

问事业：就唔好同人合作，一定要自己话事，因为错咗都无问题，自己揹晒佢，同时所计划的野未必可以实行。

上九：倾否，先否后喜。

否系垃圾，倾否，倒晒D垃圾，究竟倾乜野否，就系倾个鼎，因为古代用鼎做煮食工具，但系以前的铸造技术就好差，D鼎里面好多隆隆隙隙，就会积埋好多残渣，反转个鼎黎清理，将佢清洁干净，咁就叫做倾否，先否后喜，起初冲出黎果D梗系好污糟，不过冲干净咗之后就喜勒，呢一爻系讲清理的，千祈唔好见到个喜就以为一定好，睇埋个象辞。

象曰：否终则倾，何可长也。

个鼎的渣滓多到唔可以再煮野，就一定要清理，何可长也，即系点可以俾佢继续积聚的垃圾，黎一个大清洗，大反转，即系话呢种情形唔可以再继续，即系革命，点解呢，因上九己经去到极勒，就系否极，但系否极之后只不过系改变啫，未必一定系泰来，所以未曾可以开心.

占到呢一爻问前程：就要检讨以前的处事态度，要改变要重新制订过晒，或者重新学过第二样野.

问婚姻：即系话呢一件唔系咁啱你勒，执到都喊一餐.

问事业：先否后喜，问执笠就好，问开张就唔好，问转行就好，问好唔好继续经营就一定系唔好，点解唔好呀，因为内部问题太多，何可长也，唔可以再继续勒。