《易经》第二十一卦【噬嗑】火雷噬嗑#

噬嗑：亨，利用狱。

卦名的意思系咬合，咬住唔放，咬断，象征纪律，以至刑罚，在个口里面有D野，跟住一合，合埋个口，就系噬嗑，点解火雷会系噬嗑呢，下便系雷，火在上面，雷会起火，就一定系劈中D野，触电就会出火，噬嗑就系好强硬咁样及住D野，好似雷咁样好强硬咁劈中D野，所以噬嗑表示好强硬的意思，卦词话：噬嗑亨，利用狱。 噬嗑都好的，点样会好呢，利用狱，审案就好，要黎审案就好，审案点解会好呢，等于雷厉风行，霹雳手段，好明快咁样决定，咁样就啱勒，好似个雷劈落黎，快如雷闪，边个啱，边个唔啱，好快趣判断，所以叫做利用狱，将D长期官司解决左佢，官司最怕长，一般老百姓最官司纒绵，但系有D官最钟意，所以可以同埋愿意将D官司好快咁样了断，就可以表示呢个官好叻， 同埋一定系一个清官，所以呢个爻词表示处理事情一定要明快果断，千祈唔好拖泥带水，咁就系噬嗑，一啖咬落去，一昅昅到实。 噬为咬之意思，嗑系上颛与下颛吻合的意思，咬合，将口里面含住D野咬碎，上下颛合埋， 卦形与 颐相类似，颐卦的上下两个阳爻代表上颛同下颛，中间阴爻部份代表个咀张到好大，个卦名亦都名符其实的系颐卦，呢个 同个 相比中间多左一个阳爻阻住，要将呢个阳爻咬碎之后，上下题先至可以合埋，亨，就系亨通，如果将阻碍消除就必定亨通，利用狱，用刑法， 用明快的手段处事。

彖曰：颐中有物，曰噬嗑，噬嗑而亨。 刚柔分，动而明，雷电合而章。 柔得中而

上行，虽不当位，利用狱也。

口里面有野将佢咬碎就叫噬嗑，鸟食就叫啄，鱼食就叫做唼，鼠食就叫做唯（叶）细碎的咬野声，老虎食野就叫做噬嗑，噬嗑而亨就系将D野咬碎就好勒，刚柔分，呢一卦的阴阳爻各一半，象征左刚柔相济， 离卦同震卦一个阳卦，一个阴卦，亦代表刚柔的分别，动而明，雷电合而章，下卦震卦为动，为雷，上卦离卦系明，系电，火，象征行动有力，明察是非，雷电相合， 产生震撼力同埋好光亮，在呢度系象征左刑罚，威吓同埋明察，明辨，柔得中而上行，噬嗑卦系由风雷益而黎的，益卦的六四向上行，占据左五爻呢个中位，而五本来的阳爻下落到四位，即系四五互换，就系柔得中而上行，变成左噬嗑的六五阴爻在阳位，所以就位不当，但系虽不当位，利用狱也，都系占左至尊的位置，可以运用自己的权力，排除阻碍，将D障碍消除， 自己唔系刚中正，只系阴爻居阳位，所以要运用D手段，重要用雷霆万钧的手段，利用狱包括左用严刑峻法黎保障自己，呢种行为有一个好靓的名，就系现在的法治，利用狱包括左使用刑法，因为要雷厉风行。 利用狱亦包括左使用严刑峻法系有利的，因为呢一个卦的背景系啱啱统一左，将纣王打败，好多贵族都唔向佢臣服，初初起义的时候，个个都满匡热血，唔计较利益，但系到得左天下之后，就唔同晒勒，就要讲利益勒，所以呢个卦系由益卦变出黎的，好似共产党咁样，初初话解放D人民于水深火热中，但系得天下之后，就用高压手段黎管治人民。

象曰：雷电噬嗑，先王以明罚敕法。 敕 戚音：古代王帝的诏书，命令。

上卦系雷，下卦系电，雷电交合，所以叫噬嗑，雷有威吓力，电产生光明，古代的王帝，利用呢D自然现象，制订D好明确的法律，用好有效力的刑罚，例如划地为牢，冇晒人权。 刺青，等你一世都留有疤痕，就算系改过自身，都洗唔甩的，认为呢D就系法治，其实就系用严刑峻法黎统治，但系孔子又话刑不上大夫。

即系话呢D严刑峻法只系要黎对庶民的，至于果D有地位的人，刑法系唔啱用的，非常之唔公正。 所以佢有一个学生子路话：「刑罚不能中肯，民将手足不知所措」。 即系话呢D人犯左呢D罪就要罚，果D人犯左罪就唔使罚，即系话呢D法制系唔公平的，所以后来孔子好风光咁样返去鲁国的时候，列队入城时将呢个子路排到最后尾。

噬嗑卦系主要认为刑罚的原则应该明快，唔好拖，处理一D事情一定要用快刀斩乱麻的手法，有罪恶必须及时阻止，以防止蔓延，赞成用严刑，睇吓跟住黎的爻词就知。

占到呢一卦问前程就一片光明，火雷都系光明之象，但其中必有障碍，就要强硬对付，唔可以用软弱的态度，主要系唔好妥协，问婚姻就唔系咁好，因为婚姻系牵涉感情的事，感情边有好似法律咁样，公正严明架，一定系一个蚀底D，一个着数D的，问结婚就好「拿拿林」搅掂佢，问离婚就即离，唔好拖泥带水。

问事业：独资做生意就好，如果合作就多问题，搅到要用法律解决，用强硬手段，所以合作就无乜好结果。

初九：履校灭趾，无咎。

应该系屨校灭趾，着住对校，校系乜，校就系脚镣，个脚镣好大，大到点呢，大到遮住晒D脚趾，咁样就叫屨校灭趾，着住对脚镣，个脚镣好 大，遮住D脚趾，点解会无咎呢，唔行就无咎，行就有咎，在果种咁恶劣的环境下面，只要你唔郁就无问题，企定就无事，一行亲就有问题勒，所以屨校灭趾，无咎就系教你唔好郁，企定，处于困苦困难的境地，唔郁就无事，唔好惊， 俾咁大只脚镣锁住，都唔好惊，唔郁就得勒，所以呢个无咎唔系真的无咎，系叫你无所动作，迍来顺受就无咎，以前的屨校系造成一只大脚的样，用木黎造成一只大大的鞋，你着 住佢拖住几十斤重，走都走唔郁，呢个屨校其实就系一只大木鞋，现在重流传在西南方云南广西一带，以前有过一套电影都拍过呢只大鞋，所以呢一爻话灭趾，着住佢根本就睇唔到D脚趾的， 点解话唔就无咎呢，又或者无所动作就无咎呢，即系话及制止，唔俾你继续就无事。

象曰：履校灭趾，不行也。

着住呢只大木鞋，跟本就行唔郁，通过呢种刑罚，阻止呢个人继续犯罪，通过一种手段阻止某一种自己唔钟意的事发生。

占到呢一爻问前程，表示你想做野，或者发展，但系有野阻止，有D事拖累你做唔到，只有停低慢慢再等机会。

问婚姻：表示有好沉重的负担，问结婚就唔好，离婚就好，因为离婚系代表终止合约，即系唔继续。

问事业：就表示要用非常手段阻止唔合自己心意的事或者人继续。

六二：噬肤灭鼻，无咎。

揸住旧肉黎食，果旧肉太大遮住个鼻，无咎，点解果旧肉大度遮个鼻又无咎呢，因为点唔好都最少有一旧肉食，呢度就叫你慢慢食，唔好咁大啖大啖咁快趣食，唔好因为遮住个鼻 就大啖咬，由得佢遮住个鼻，细细啖慢慢食，噬肤灭鼻唔好喉擒，唔好因为佢灭鼻就擒擒青，唔好因为灭趾周身唔安乐，呢度就比上面个灭趾好好多，呢个肤就系连皮净肉，可以乱咁噬， 有咁大啖得咁大啖，呢个肤亦有另一个解释，在卦里面，相邻的就叫肤，肤即系相连。 呢度系话净肉，好易食，呢一爻六二得位，阴爻阴位，佢处理的事好容易，所以无咎，判断呢D是非食菜咁食。

象曰：噬肤灭鼻，乘刚也。

六二以阴爻居于初九之上，所以话乘刚也，佢自己系阴爻，但系所用的系强硬的手段，表面上系好人，但系借用初爻的刚强，黎达到目的，自己唔出面，利用D丑人，一个用口，一个用手。

占到呢一爻问前程，就表示有人帮自己就要唔好客气，唔好懒清高，因卦象显示呢D事唔系自己一个人可以得的，就算系好容易的事，都最好搵人帮手。

问婚姻：大家都好容易相与，系少有的一爻。

问事业：就要有D好的帮手，呢D野好容易做，但系有个好帮手就更好。

六三：噬腊肉，遇毒，小吝，无咎。

腊：息音，而家的简笔腊，就系息字音

乜野叫做腊肉，即系现在的隔夜餸，例如隔夜猪肉，现在的雪柜里面的隔夜猪肉，不过旧时无雪柜，噬腊肉，即系食隔夜餸，遇毒，无咎，隔夜餸啫，无乜大问题，至多就肚痛，肚 泻一阵，唔系乜野大件事，虽然唔系大件事，但都系有事，因为小吝，有小小唔妥，但系无咎，都无问题，上面讲噬嗑，系要明快，果断唔好拖泥带水，腊肉就唔明快勒，隔夜餸重话明快？ 倒左佢就明快，放在雪柜里面一段长时间，古时就用D纱网的布做成一个罩盖住佢，但时间长左就会「叔」的，所以咁样做就绝不明快，结果都系要倒的，但系硬系唔舍得倒，留番系度，但系最后都系倒左佢，所以呢度就话唔明快，犹疑，拖泥带水，处事明快就系噬嗑的原则，唔够果断，就有吝勒，但系都唔系咁严重，所以最后都无咎，因为食隔夜餸系自己的问题， 唔会影响到人地的，所以无咎。

象曰：遇毒，位不当也。

六三阴柔不中不正，处事而遇到D陈年烦琐之事，一时难以断理，呢度的处事系刑法之事，唔可以好果断咁样去判决左佢，呢件事落在自己手上令到自己都有问题，因为能力不足，因为位不当，唔系呢种材料去做呢D事，但系最后都无问题，只系拖延，并唔系大问题。

占到呢一爻问前程，无咁大个头就唔好戴咁大顶帽，唔好死顶，因为有小人，好易中毒。

问婚姻：就表示有人破坏，只要忍耐就无问题，

问事业：创业就唔好，因为阻滞多，问结业就好。

九四：噬干胏，得金矢，利艰贞，吉。

胏：齿，有骨头连住的肉，食一旧干的肉，晒干左的肉，连埋骨的，就叫干齿，好似现在的牛肉干，猪肉干，不过现在就唔会连骨的，同时亦唔系一旧，而系一片片，由此可知现在D人的牙力同以前的人一定有段距离，得金矢，发现一个用金造的箭头，点解，因为原来呢只野猪或者野牛系俾人用金箭射中过的，后来支箭干断左，箭头重在D肉里面， 劏的时候唔知道就成旧肉风干，等佢一咬，成个金箭咬左出黎，咬到个金箭头就认真辛苦，就艰，但系都贞，即系话经过一D意外的艰难，但系又得到D意外的收获，咬到个金的箭头，牙系痛D，但系有个金箭头，利艰贞之后吉，即系转忧为喜，开始之时有D唔妥的野，但后来有收获，呢个收获系意外的。

象曰：利艰贞，吉未光也。

利艰贞，要经过好艰难，好多困阻，吉未光，呢度系话D好野未出，唔系负面的，系话要去到吉光，即系话好野出现，就要经过好多艰难，一定要做到艰贞。

问前程，以为好辛苦，无乜希望，但系做落去，原来有意外的收获，先要受挫折，因为得金矢系意外收获，之前要噬干胏，咬到牙都崩，咬紧牙关，要捱一轮，在好失望之时突然间有意外之喜。

问婚姻：好耐都无进展，要好有耐性，问结婚就好，离婚就唔好，因为经过好艰难的过程，要离婚亦表示好难离得成。

问事业：自己创业就好，因为呢一爻系无贵人帮，适宜自己独力经营，利艰贞，最后的收获都系自己的。

六五：噬干肉，得黄金，贞厉，无咎。

同上面的意思一样，食旧干肉，得到黄金，贞厉，又系有D唔妥，无咎，最后当然无问题，呢两爻系同一个意思，但系内容有些少分别，六五阴爻，呢度话黄金藏在肉里面，外面软 里面硬，六五阴居阳位，表面柔但内里刚强，因为金在中间，要应付外边的事好辛苦，贞厉，但系用刚柔相济的手段就无咎，呢个噬嗑成个卦都系讲刑法，手段，点样判案，遇到D好棘手的野， 就要转换另一种方法，唔好用严刑峻法，要表面好柔，内里强硬，经过辛苦的阶段，最后无咎，即系搅掂。

象曰：贞厉无咎，得当也。

呢度话得当也，唔系位得当也，即系重差D，只系办事的方法得当，唔系你的地位得当，你转左用另一种手段去处理的好难的事，所以话手法得当，贞厉，虽然辛苦，都俾你搅掂左，无咎，方法用得啱。

占到呢一爻问前程，就一定要坚持到底，唔好中途放弃，只可以改度，唔可以改变方向，可以达到目的，因为要经过贞厉的阶段。

问婚姻：结婚就好，经过波折之后有所得，问离婚就唔好，因为呢一爻系讲有所得的，唔系讲破坏，唔系有所失，所以离婚系唔好的。

问事业：合作就好，独资就唔好，因为合作就有不同的意见，利于转太，可以随时转换方式，合作就好过独资。

上九：何校灭耳，凶。

何校，校系乜，睇大戏都见过就系枷锁，何，系荷音，即系担住，最初的时候系脚镣，现在系枷锁，系充军形式，个枷锁好大遮住只耳，凶，上面锁住只脚系细罪，现在担枷，就重罪，戴住 脚镣唔郁就无事，但系现在担住个大枷锁，唔郁都有问，古代的刑法，最轻就系划地为牢，唔使坐监的，在大街大巷划个圈，企两三日，再重D就用荆蕀黎做，叫做重棘， 呢个系长期D的监禁，如困再重D罪就用D脚镣锁住，再重D罪就担埋个枷，担住个枷在棘里面，人人都见到的，指指点点，又辛苦，D刑罚一路路重，荷校灭趾就凶，担细D个枷就罪轻D，古时的枷锁最重就系80斤，最轻的系5斤，呢D系俾犯咗罪的官诈诈谛谛担住的。

象曰：何校灭耳，聪不明也。

荷校，罚得好重，担得好重，何读荷音，即系读去声，作动词解，唔系作为疑问的代词，同现在的荷系一样，呢个荷系揹住咁解，第一解系刑罚好重，第二解系俾其他的野朦闭住，灭耳再唔知道第二D事，聪代表耳，聪不明代表咗发挥唔到耳的功能，耳系接收讯息的，有一件事用晒你所有的时间，所有的精力，再兼顾唔到其他的野.

占到呢一爻问前程：就认真多阻滞，上九阳爻居阴位，已经得唔到人和，荷校，又负担重，无选择的条件，一定要低调，要忍辱负重.

问婚姻：小心俾人呃，结婚就唔好，离婚就好，因为呢度负担太重，如果离婚就系脱离负担，所以离婚就好.

问事业：开张就唔好，执笠就好，唔好再支撑勒，揹住重好辛苦。

睇晒成个卦，初爻同上爻系讲刑法的轻重，中间系讲处理的手段，同时亦可以知道孔子的真正意思。 孔子一方面大事鼓吹「道之以德，齐之以礼」，以德服人，以德治国，但系佢的真正思想，系绝对唔反对严刑峻法，佢认为嘁趾，灭耳呢D刑罚无乜唔妥，呢一卦一开始已经话利用狱，即系根本唔反对用暴力，严刑，口中有物，必定要噬之而后嗑，呢一卦系反映咗中国的法律一直都系人治，唔系法治，因为全个卦都无讲到话法例点点点，只系讲用刑， 施行刑法果个人用乜野手法，如果法治就唔会理审案的人点，只会讲佢触犯咗第几条，应得乜野刑罚，所以呢度系反映中国系一个人治的国家，最低限度在当时系咁样，现在就唔知，因为当时所有野都系掌握在小数的识字的人手上，只系识亨啫，并不表示有知识，归根结底就系读书人太少，如果现在都实行唔到法治呢，就表示四千几年来中国人民无进步过，都系果一句， 读书人太少.