《易经》第二十二卦【贲】山火贲#

贲：亨，小利有所往。

贲，呢个字有两个音，一个读比，一个读宾，大概在汉代以后就读比，汉代以前就读宾，呢个宾系装饰咁解，不过就唔系好花巧的装饰，而系大纹大路的装饰，山下有火，点解山下有火就叫宾呢，一定有人在黑夜上山，以火黎照明，有火照明，就见到山路，同时亦在山壁上见到自己的影，另一个更贴切的解释，山下有火，就成为日落余晖，将自己的影照在山壁上， 或者将D景物映照在山壁上，变成好靓的图案，我本人较倾向太阳在山下将D景物映出变成好靓的图案，呢度卦词话贲，亨，小利有攸往，系好的，有攸往，即系有需要去地方，小利，唔系得到大利 ，因为唔系去装饰，只系D光照出黎，睇到好靓的野，呢度表示有因人成事的意思在内，即系话有D好的景物都要有光照着先至睇到，所以话有咁啱得咁乔，贲亦系表面咁解， 所以亦带有粉饰的意思，表面的背后就系实质，实质同表面系对立的，质系主要的，基本的，质又良好，而又有好的装饰，即系质地又好包装又好，就真系好勒，所以话贲，亨，应当可以利有攸往，可以去想去的地方，呢度咗个小字，小的意思系包装唔可以太过，包装唔可以胜过质地。

彖曰：贲，亨，柔来而文刚，故亨。 分刚上而文柔，故小利有攸往。 天文也，文明以止，人文也。 观乎天文，以察时变，观乎人文，以化成天下。

贲亨的亨字系衍文，即系多余的，主要系后面果句，柔来而文刚，故亨，呢一句系解释个卦名的，所以开始的贲亨系唔应该有个亨字。 柔来而文刚，故亨，贲卦系由噬嗑而来，柔来即系噬嗑的离卦转来，上卦之阴柔，下卦之艮刚，只系三四的阴阳爻互换，分刚上而文柔，柔来跟住刚上，离卦 在内，所以话柔来，民在上，所以话刚上，柔来而文刚在卦里面系乜野意思，刚系质，柔系文，柔来文刚，系质地好，而又有好的包装，阴阳相济，所以话亨，分刚上而文柔的意思，系有好的质地都未够，重要有好的外表，上面两句的后面一句文刚一句文柔，系话有好的内容就一定要有好的外表，有好的外表就一定要有好的内容，先至乎合贲卦卦辞话小利有攸往。 每一样野太过都有问题，所以利有攸往前面有个小字，三四爻刚柔互换，刚柔卦交错，表里相当，所以后面话天文也，即系自然之理，在64卦里面三阴三阳的卦共有十八卦，取刚柔相易者有六卦。

1. 蛊卦的刚上而柔下。

2. 贲卦柔来而文刚，分刚上而文柔。

3. 咸卦的柔上而刚下。

4. 恒卦的刚上而柔下。

5. 损卦的损下益上。

6. 益卦的损上益下。

呢D系题外话，不过顺便话埋俾你地知，将来有时间再细讲变卦或者卦变的问题。

文明以止系从个卦的形体黎解释个卦辞，卦的内卦系离，离为火，为明，有文明的象征，外卦系艮，艮为山为止，有止的意义，止包括有节制，有限度的意思，文明以止，文明都要有节制，有限度，呢个节制，限度要靠人去把握，把握得好就一路发展顺利，把握得唔好，事情发展就唔顺利，究竟好定唔好就要睇人点样，系决定在人为的，所以跟住话人文也。 观乎天文，以察时变，观天文亦都系观天象，又系观卦象，从卦象黎睇，刚柔交错，表里相当，系正常的，但有时会有过龙，要随时观察而加以纠正。 观乎人文，以化成天下，观天文就系睇世局，时局的变化，观人文就系睇人民的意向，文明以止随时要节制，唔好俾佢过龙，一发觉有过龙就要以教化天下，即刻订立一种制度出黎，要人民遵守，美其名曰：教化天下。

象曰：山下有火，贲，君子以明庶政，无敢折狱。

易经里面论及刑法或用刑罚的问题，就系噬嗑，雷火丰，火山旅，山火贲呢四卦，噬嗑同丰卦以火雷同雷火交互为体，系讲刑法的威势同明辨两方面，旅卦同贲卦以火山同山火交互为体，系讲刑法的明辨同谨慎两方面，旅卦火在山上，系止而明的意思，判断及时，不留狱。 贲卦火在山下，火为明，即明在内，止在外，明而止，则辨案，判决都要谨慎，唔可以草率从事，即系呢度的无敢折狱。 折狱，判断快就要了解实情，但系贲卦系讲文饰，装饰，表面的，啱啱同折狱快趣判断相反，所以孔子话：君子以明庶政，庶系最低层的，一定要深入到最低层，有咁清楚搅到咁清楚，去除一切 烦文褥节，本来要好多规距的，例如要见官，要一个月之前申请，要即刻见都得，就击鼓，击完鼓之后就要训钉床，训完钉床之后你唔死就证实你真系有寃情，就可以见到官的面， 呢度话明庶政，无敢折狱，即系话已经清楚晒成件事，关系到D最无力的人，所以就唔好乱咁判，唔好贪快，呢度系反对快刀斩乱麻手法，所以话无敢折狱。

占到呢一卦问前程：就要将自己装饰得光鲜D，一定要明白呢个世界系先敬罗衣后敬人，一定要将自己包装得似样D。

问婚姻：就唔好睇表面，一定要内涵，如果净系睇表面就容易错误。

问事业：就一定要亲力亲为，明庶政，由上至下都要理解，问合资就好，独资就有问题。

初九：贲其趾，舍车而徒。

舍即舍，贲其趾系乜野，将只脚趾甲揸靓佢，要人地见到佢只靓脚趾，就舍车而徙，即系有车都唔坐，宁愿行路，行路先至见到只脚，成个爻词即系话，为咗小小野，贪小小风头，就攞黎辛苦，如果贪出小小风头，就连车都唔坐，究竟值唔值呢。 我地知道呢个卦系讲外表的工夫，同实质的内涵，呢度修饰咗只脚趾，估计系脚趾公，重系脚趾公的脚甲，呢个人修饰咗只脚趾甲，就急不及待咁样要威俾人睇，连车都唔坐，可想而知呢个人好浅溢，点解话佢浅溥呢，因为脚趾公系最低最小的部位，小小野已经笕得不可一世，咁样呢个人重唔系浅溥，例如有小小威野就不停咁宣扬，时时拿出黎展示一番。

象曰：舍车而徒，义弗乘也。

有车唔搭，义弗乘，因为乜野而唔搭车呢，要展示果小小野，所以话义弗乘也，根本就唔啱，D书话乘在上面承就在下面，因为初爻系最低果一爻，佢下面无野承 位佢，所以叫做弗乘也，贲卦的历史背景系武王发做军服，有个名的，叫虎贲，系一件可能系用老虎皮做的衫，佢着住呢件衫，在校场展示佢的威势，但系唔记得着鞋。

占到呢一爻问前程：表示样样都讲表面的，唔需要有真材实料，但做野就要小心，好容易会招致损失。

问婚姻：结婚就要小心，有外无内，表面好好，实在无乜料的，问离婚就好，因为只得表面风光，所以无好过有。

问事业：创业就唔好，因为无实质的野，唔好再继续。

六二：贲其须。

须系胡须，装饰果D胡须，整到好多欵式，好得戚，好轻松，胡须的用途主系装饰面部，使面部美观，佢唔可以单独存在，必须要依附在面上面，即系颐位，如果颐位唔存在，胡须亦不能立足，所谓皮之不存，毛将焉附呢，六二୬无应爻，因为六五又系阴爻，成敌应之势，但六二系贲卦的卦主，贲卦的基本意义可由呢一爻睇出，外表系要由内涵黎决定的，里面越有内涵， 就越要包装，但系外表系绝对唔可以改变内涵的，但系外表系由佢的地黎决定的，好似呢一爻修饰果D胡须，完全无实质作用，，初九话贲其趾，修饰只脚趾甲，已经觉得表面化，无实质作用，呢一爻更离谱，除咗系表面好睇之外，就系要黎掩饰内部的问题，呢一爻甚至乎呢一卦都包含有表里不一的意思。

象曰：贲其须，与上兴也。

点解要修饰D胡须，要讨好人地，要讨好乜野人呢，就系叻过佢的人，与上兴也，上系九三，兴系兴起，动作，因为须系依附在颐上面，所以话与上，与上即系依附在有力的人，颐动就须动，颐止就须停，即系完全无自主能力，亦都可以随时唔要，所以又无自主权，地位又唔重要，最主要就系无比无应，只系表面好风光，以为有靠山，但系九三自己都无得应。

所以占到呢一爻问前程：就认真不妙，己的实力又唔够，帮自己的人又无力，所以谋事唔应该抱有太大希望。

问婚姻：就要从长计议，唔好咁快决定，问离婚就好，结婚就麻麻地。

问事业：就一定要将门面装饰得好靓，表面功夫做得好。

九三：贲如濡如，永贞吉。

濡：如：靓衫。 装身，着住件靓衫，靓的裙，经过打扮，着起条靓裙，永贞吉，一路咁从事落去就好勒，即系话你扮开就由得佢一路扮落去，打扮企理就一路企理落去，贲如，梳靓个头，揸靓D粉，全身上下装饰一番，永贞吉，咁样的行为唔系一日的，成日着开就要咁着，系易经里面有「乜如物如」都有犹疑不决，难以断决的意思，呢度话扮得好靓，如果可以永远保持落去就好， 但系知得唔得，点解呢，因为自己的位置系九三，本来阳爻阳位系好的，但系上九系敌应，已经无咗个有力的靠山，而六二同六四吊系阴爻，俾小人包围住，孔子话的唔知可 唔可以坚持，做开D野一做落去，呢一爻话净系睇你的外在表现，例如行为举止，可唔可以成日保持咁好呢，例如讲野好斯文，但系你侧边的人全部都粗口烂舌的，唔知会唔会受佢感染， 永贞吉即系保持得到就吉，呢个永贞吉之间应该有一个豆点的，变成永贞，吉，即系一路咁好就吉勒。

象曰：永贞之吉，终莫之陵也。

陵：凌，凌辱，侮辱的意思，惊住唔可以永远保持良好的形象，卒之会俾人睇唔起，终即系永远咁解，做乜野都好，一定唔好俾人睇穿底。

所以占到呢一爻问前程：就一定要善于利用面具，呢种场合戴呢一个面具，果个场合戴果个面具，只可以俾人睇到自己最好的一面，呢一爻唔讲实力的，只系讲门面。

问婚姻：结婚就好，越铺张越好，离婚就唔好，因为要离婚就已经互相睇穿个底，保持盲目好D。

问事业：合资就好，大家齐齐拎D好野出黎。

六四：贲如皤如，白马翰如，匪寇婚媾。

将一四白马打扮得好靓，挂晒彩，皤如，呢个皤系乜，皤就系白色的一种，即系现在的象牙白，贲如皤如，白马输如，一四象牙白的马打扮得好靓，呢只系象牙白的马，翰如，翰系乜野，系跑得好斯文，好快，将只象牙白色的马打扮得好靓，好斯文咁样行，匪寇婚媾，唔系黎抢野，唔系抢亲，系黎求亲，好靓仔的新郎哥，贲如，呢个新郎扮得好靓，骑住只白马求亲， 呢一爻又系乜如物如，亦都系犹疑的一种，贲如系扮得好靓，皤系素色，白色，扑素，究竟要扮得好靓呢抑或扑素D好呢，睇吓佢做乜野，原来呢一爻系同婚姻有关的，如果佢去抢亲，就皤如，如果佢去求亲就贲如。

象曰：六四，当位疑也，匪寇婚媾，终无尤也。

六四阴爻阴位应无问题，但点解又要疑呢，呢度无关卦爻吉凶，系自己未决定点做啫，但系最后都决定骑住只好靓的白马去求亲，所以象词话终无尤也，即系贲如同皤如之间佢拣咗贲如，乜野导致佢唔用强硬手段而用斯文手段呢，就系因为六四有初九正应，阴阳相合。

所以用呢一爻问前程：处事一定要以柔的手段，如果用强硬手去处理事情就一定唔顺利。

问婚姻：结婚就好，有个靓仔新郎哥，楂住架宝马黎接你。

问事业：合作就好，因为阴阳相应，有犹疑的态度，有合作伙伴就唔使自己左唸右唸。

六五：贲于丘园，束帛信戔戔，吝，终吉。

成个山林花园去装饰佢，不过缚的布，装饰花园的在缚D唔缚D，束帛戔戔，唔系全部缚得靓，花园好大，D装饰的 布唔够，吝，就唔好睇，不过终吉，呢件始终唔系坏事，至多唔够完美啫，贲于丘园，装饰个花园就为咗请客，但系又装饰得唔够完美，但系都无问题，始终都系好的，至多俾人话孤寒D。 以前大户人家请客，入席之前有个园游会，张灯结采，呢个束帛就系结采，戔戔就系好少，红楼梦里面形容得好清楚，用上等的丝绸，不同颜色绕住成个花园，丝绸之间点着手臂咁粗的大腊烛，烛光掩影，加上林黛玉的美貌，形容为人间仙境，可以想象佢的奢侈程度。

象曰：六五之吉，有喜也。

六五点解吉呢，因为装饰个园游会用好小的装饰，好悭，由六四开始无咁注重表面，初爻要展示只靓脚趾，专登唔坐车，六二整到D须好靓，呢两爻完全无实质意义的，九二就着到好靓，全身包装好靓，重住长期保持呢种装扮，由六四开始就有贲如，皤如，究竟着靓好呢还是普通好呢，到咗呢一爻六五对装饰已经无咁重视，可以戔戔，好少俾人话吝，但系最终都系好的。

占到呢一爻问前程：就要实际从事，唔好靠表面功夫。

问婚姻：选择的时候就唔好计较孤寒或者阔佬，阔卓果个未必好的，问结婚就好，因为贲于丘园开始请客，离婚就唔好，因为呢一爻系一件事在进行中的，张灯结采当然唔系离婚的格式。

问事业：就先难后易，六五同六二敌应所以合作就唔好。

上九：白贲，无咎。

用白色的野黎装饰，无咎，无问题，白贲的相对就叫做彩贲，彩贲就系五颜六色，白贲唔系白色，只系话好简洁好扑素，好斯文的颜色，唔系令人眼花了乱的颜色，打扮都有素净同抢眼的分别，呢个就系素净。

上到呢一爻已经完全注重内涵，放弃晒果D无谓的表面装饰，由贲，好华丽变成白，好扑素，呢个白唔系无装饰，而系好简洁的装饰，好平实，再唔系靠搽脚甲，腊靓D胡须，着番件靓衫呢D咁表面的野，点解唔使靠呢D野呢，睇埋个象辞。

象曰：白贲无咎，上得志也。

白系内容，实，贲系装饰，黎到上九就唔再靠表面装饰，系用实际野黎装饰，以无饰为饰，如果打功夫就系无招胜有招，做事就系以工作表现黎做装饰，以工作表现作为装饰，上得志也，呢一爻本来系噬嗑的初爻，由最低级一路上到最高级，已经身经百战，唔再系初，二，三果D情形，所以话上志。

问前程：可以有收成，但系要经过好多波折的收成。

问婚姻：年纪大的就好D，后生的就无咁好，问结婚就好，离婚就唔好，因为上得志，即系卒之达到目的，结婚就达到目的，离婚就唔好，因为结婚的目的唔系为离婚。

问事业：就系合资好，独资亦好，对内对外都无问题。

综观成个贲卦，系讲文饰，表面，有表不可无里，但系最初注重表面功夫，觉得佢好浅薄，但系一路路改变，最终放弃晒D无实质作用的嘢，都系实质最紧要，呢一卦讲返扑归真，贲系文，文的背后系质，所以有文质彬彬的语，即系有外表有内涵。