剥：不利有攸往。

乜野叫做剥，个阴气一路向上扩展，扩展到剩番一个阳爻，即系阴气一路剥夺阳的地盘，剥即系剥削，剥夺，将个阳气一路剥，剥到剩番最高一点，咁样就叫做剥，在卦象黎讲就叫做 山地剥，呢一卦的卦主就系上九，所以成个卦象就整体黎讲系唔好的，成个卦象表示咗小人道长，君子道消，阴爻代表小人，阳爻代表君子，小人一路一路得势， 相对黎讲个君子的力量就一路一路削弱，所以呢个剥卦的总的大纲就系咁样，剥的卦辞就系剥不利有攸往，不利有攸往就系话，唔好有所改变，唔好去第二度，点解唔好有所改变呢，因为凡有改变，个卦象就动，凡占卦重要计埋动静，宜动或宜静，动静系好紧要的，在君子道消，小人道长的情形下，就不宜动勒，一郁亲就会俾个反面，负面的力量对你起作用，所以不利有攸往，即系不宜有所动作，成个卦象系五阴剥蚀一阳，使到阳的根基尽失，岌岌可危，因为剩番最顶果一爻，个卦辞话不利有攸往，好明确，完全无第二种意思，好清淅咁话唔适宜有积极行动，但系个卦象话俾 我地听佢系一直动紧的，点解呢，因为D阴爻一直将个阳爻剥夺紧的，所以呢度话唔行动并唔系静止的，系持沉着的智慧，点解会咁样解呢，睇埋个彖词就明白。

彖曰：剥，剥也，柔变刚也。 不利有攸往，小人长也。 顺而止之，观象也。 君子尚消息盈虚，天行也。

好长，剥，剥也，即系话剥，剥夺，剥削，阳被阴剥，阴渐长而阳渐剥落，柔变刚也，并唔系解阴爻变左阳爻，唔系柔变成左刚，而系柔改变左个刚，亦可以讲刚俾柔所改变，俾柔所取代 ，阴系一步一步将阳气取代，剥夺，原本系六个阳爻的纯阳乾卦，一变而成天风姤，一阴在下，五阳在上，二变而为天山遁，两阴柔在下，四刚阳在上，三变而成天地否，三阴柔在下， 三阳刚在上，四变而成为风地观，四阴柔在下，两刚阳在上，五变而成为山地剥，五阴柔在下，一刚阳在上，刚阳几乎被阴柔改变尽，阴柔不断壮大，而阳不断被剥蚀，所以呢一卦叫做剥。 夬卦同剥卦相反，五阳在下，一阴在上，夬卦的彖词话，刚决柔，剥卦同夬卦系相对的，但系剥卦唔话柔决刚，而话柔决刚，原因系在于易为君子谋而不为小人谋，君子去剥夺，解决小人，越快越好，所以称决而唔称为变，因为决系即刻，但系剥卦系小人剥落君子，系一个缓慢的过程，所以称为变而唔系决。

不利有攸往，小人长也，系话君子处在不利的情况下，要避免有所动作，要待时始动，呢度就系飞星赋话「吉凶原堪自主，君子待时始动」的道理，原因系时机未到，小人道长，小人得势，除左系待时之外，无其他选择，上面话过不利有攸往，并唔系静止的，就系跟住呢一句，顺而止之，观象也，坤在内，无停咁样向上剥夺个阳气，亦都代表咗斗争系无停的，观象也， 就系留意卦象的变化，君子尚消息盈虚，天行也，尚系尊奉的意思，消息盈虚，系自然界变化的规律，世间的人事变化同自然界的变化一样有规律的，等于人运及地运，不断转移的，呢D就系消息盈虚，人事运气不断重复，好似历史一样，不断重复，所以天行也，唔会变的。

象曰：山附于地，剥，上以厚下安宅。

呢度就可以解释不利有攸往，剥上以厚下，阴爻一路向上剥，侵食，阳一路俾佢剥削，但系从另一方面黎睇个阴就一路厚，点解叫做厚，因为系土地，地就一路厚，地气一路厚，所以就有安 宅之象，剥上以安下，所以就要安宅，安宅就系住稳在呢度，住定在呢度就安全，无事，所以呢个卦系静的卦，开头点解话君子道消，小人道长，个象词话剥上以厚下，呢个唔系茅盾， 系一件事，任何一件事都有正面，有负面的，在正面黎睇就小人的力量一路大，但系从另一个角度黎睇，小人的力量一路提升（小人并唔系现在的小人），但系如果我地唔郁的时候，就变成厚下，基础始终系稳固的，因为坤为地，象征个地一路厚，所以叫做厚下，所以从两个观点黎睇，爻词唔系一面倒的，占到某一卦或某一爻，绝对唔系话吉就吉，利就一定系利， 重要从卦象同埋其他各方面去判断，山本来系高于地的，所以话附于地，剥，剥落，山越剥落地就越厚，隐藏左个意思，就系剥上厚下，剥系剥君子，厚系厚小人，有能力的可以受得起剥，无能力的就要帮，所以话厚下，都唔止，重要安宅，即系话要令到佢地安居。

占到呢一卦问程：就要睇下自己的实力，要清楚了解自己的能力，要能屈能伸，唔好死牛一面颈，因为呢度系代表未曾得志的时候。

问婚姻：如果未结婚，拍紧拖就容易被小人破坏，如果问离婚就好，结婚就唔好，因为由安宅至剥庐，中间无好过。

问事业：创业就尚未系时候，因为成个卦系不宜有所行动，更不宜积极行动，问结业就好，即系结束行动。

初六：剥床以足，蔑贞凶。 觅音

剥床以足系乜，剥即系剥喙，乜野叫做剥喙，最多出现剥喙呢个名词就系聊斋，敲门声就叫剥喙，咯咯咯，半夜有呢D声都几恐布，现在剥床以足就系用只脚黎「 」下张床，氹氹氹，用脚猛氹张床，点解要氹张床呢，当然系有唔妥先至会氹张床，例如肚痛，就会氹吓张床，蔑贞凶，乜野叫做蔑贞凶，唔去俾心机从事一样野，唔去专心从事一样事情，如果好专心， 好有心机咁样去专注一样野就叫贞，现在蔑贞即系做野的时候唔专心，唔专注，就凶啦，呢度就同个卦辞相呼应，不利有攸往，唔好有所动作，唔好去第二度，呢度要贞，唔得贞就凶勒。

象曰：剝床以足，以滅下也。

點解要 張呢，就係以滅下也，因為個陽爻一路滅緊，用腳氹張床，唔係減輕痛苦，而係痛苦啱啱開始啫，痛苦重會斷續來，所以爻詞話蔑貞凶，因為處事唔專心。

占到呢一爻問前程：就唔好諗住倚靠人地，一定要自己幫自己，就算有人幫都會被人破壞。

問婚姻：無論拍緊拖或者已經結左婚，都會俾人破壞，唔好聽閒言閒語。

問事業：就處於開始辛苦的階段，係無人幫的。

六二：剝床以辨，蔑貞凶。

辨係乜野，小腿的部位就叫辨，我地個「腳瓜朗」就叫辨，現在唔止用隻腳去氹張床，係用埋個小腿去氹，成隻腳去氹，唔單止淨係用腳踭去氹張床，要咁樣氹法，唔單止肚痛咁簡單，係更加痛苦的表現，氹到彭彭聲，用同樣的推斷，亦係覓貞凶，唔實際咁樣去進行一件事。

象曰：剝床以辨，未有與也。

用埋小腿去氹張床，未有與也，未曾有野俾到佢，所求不得，呢度話無論用腳踭黎氹，抑或用成隻腳黎氹，代表個陰氣一路一路增加，所以氹床越氹越大力都係無用的，未有與也，點解未有與也，因為六二陰居陰位，本來係好的，得中，但係衰在無應爻，陰爻居中得正，條件係好好的，但係第五爻唔係陽，所以無應爻。

占到呢一爻問前程：就係無論你做得點好都好啦，都唔會有人賞識，同時一定要低調處理，唔好叻唔切咁樣領功，因自己雖然好有條件，但係無一個好的靠山。

問婚姻：亦表示唔樂觀，問離婚就好，問結婚就唔好。

問事業：就一定唔可以合作，因為陰爻得中，自己有能力，但係上下兩爻都係敵比，五爻亦係敵應，所以合作就一定無好結果。

六三：剝之，無咎。

呢度剝之無咎，敲响佢，有咁大聲敲到咁大聲，無乜唔妥，點解黎到六三又會剝之無咎呢，前面兩爻就蔑貞凶，到左六三爻就變成剝之無咎呢，因為呢個六三係三與上應，正應，成個剝卦除左六三之外，通通無應的，亦都無比，比就係離果兩爻，呢Ｄ比就叫做敵比，陰與陰比，陽與陽比就叫敵比，敵人個敵，係呢一爻同個上九的陽爻相應，因為佢得應，所以比下面果兩爻好Ｄ，所以就剝之無咎。

象曰：剝之無咎，失上下也。

點樣失上下呢，就係佢的上下都係陰爻，上面又係陰爻，下面又係陰爻，因為唔得比，唔得比就要剝勒，即係同周圍的環境唔夾，就要走啦，因為同周圍唔得比，就係失上下，因為失上下，所以反為利於剝，呢度特別講出得應但係唔得比，由呢一爻可以睇到，唔可以以為初六同六二都係蔑貞凶，黎到呢一爻以為都係一樣，個陰爻一路剝上去，以為梗係唔好的，呢度啱啱相反，反而係不適宜動之中適宜變，適宜靈活處理。

占到呢一爻問前程：唔好信人，好容易俾人出賣，因為無比而有應，六三啱啱係五個陰爻中間，上面兩個陰爻，下面兩個陰爻，成敵比重重，以為都有Ｄ優勢的，因為同上九相應，但係上九同六三都唔啱位，六三係陰居陽位，而上九就陽居陰位，所以自己失位，以為有靠山，但係呢個靠山都係失位，亦都係靠唔住的。

問婚姻：如果係女人就要揀Ｄ無乜長輩的家庭先至好嫁，因為自己唔受重視又無人幫，所以問婚姻就要小心。

問事業：合作一定唔長久，獨資就好。

六四：剝床以膚，凶。

呢個膚就係我地成個背脊，係成個背脊在床上面典來典去，即係典床典蓆，咁樣就叫做剝床以膚，呢個陰爻一路上升，起初剝床以足，跟住剝床以辨，現在剝床以膚，全身在床上典來典去，唔使講都係凶的，因為呢度上到六四，又無比又無應，本來四係與初應，但係現在兩個都係陰爻，無得應，失應，敵比，所以唔止蔑貞，而係在任何情形之下都凶，去到典床典蓆的情形就係剝床以膚。

象曰：剝床以膚，切近災也。

點樣切近災也，全身典床典蓆，當然係Ｄ災難殺到埋身，已經受緊好大的痛苦，切近災也，就係受緊苦，越來越嚴重，已經去到不可收拾的地步，成個卦最唔好的一爻，點解六四得位，陰爻陰位又會唔好呢，因為自己得位，但係上下都無得應，如果自己唔得位呢，就無應係意料中事，但係呢度自己得位，但初爻又係敵應，而五爻中位又係敵應，所以話四面楚歌。

占到呢一爻問前程：就唔使講都唔好。

問婚姻：就離婚好。

問事業：都係以獨資好Ｄ。

六五：貫魚，以宮人寵，無不利。

貫魚係乜，將Ｄ魚穿埋一串，成串咁樣就叫做貫魚，串住佢做乜，就係晒魚乾，即係現在的生晒咸魚，或者醬魚，要一條條串住的，就叫做貫魚，引伸到的人一個跟一個咁行過又叫做貫魚，一隊人順住咁行，所以亦叫魚貫而行，呢度的貫魚同魚貫係一樣的，貫魚，以宮人寵又係乜呢，宮人就係宮女，姬妾逐個輪住黎寵，咁樣就叫做貫魚以宮人寵，即係話唔係淨係鐘意晒一個，輪住黎，公平就無不利，唔係Ｄ注意力淨係隻中晒一個度，點解到六五就變成咁呢，因為呢度成堆都係陰爻，魚貫而上，陰爻係小人，女人，成堆陰爻亦都係代表左宮人，Ｄ陰爻順住咁上，就叫貫魚，咁樣就無不利，所以呢一爻在成個卦裏面就係較為好的。

象曰：以宮人寵，終無尤也。

無尤，尤就係埋怨，無尤就係唔會俾人埋怨，呢一爻話貫魚與宮人寵，輪住大家有份，就唔會產生尤怨，去到呢一爻，成個卦最尊貴的位，第五爻，就有唔同的解釋，剝卦之所以為剝蝕，由於陰爻一路侵佔陽爻的位置，但係上到五爻，就變成六五統領眾陰，上承於陽，變成帶住成班唔聽話的人，曾經作反的人黎到歸順，所以有貫魚，帶住成班人黎歸附，以宮人寵，就唔會分開邊個又重視Ｄ，呢個又無咁重視，無不利，咁樣的處事方法就無唔妥，象詞話：終無尤也，本來係成班夾埋黎對付我的，現在掉番轉頭黎幫我，所以呢一爻由一路上黎都唔好的而變作好，呢一卦的背景係黃飛虎反五關，周文王家族要離開朝歌的時候，黃飛虎帶領手下將周兵追殺到體無完膚的，但係後來呢個紂王唔識用人，激嬲左老王，老王就帶住成班手下過五關反出朝歌，去歸順武王發。武王發得到呢一班生力軍之就即刻揮軍攻打朝歌，紂王的老家。

占到呢一爻問前程：就表示突然會有人幫自己，點解呢原來係以前播落的種，現在就有收成勒，呢度教我地凡事都唔好做到咁絕，易象係講中庸之道的。

問婚姻：離婚就好，結婚就唔好，因為對方太花心，所以分開好過。

問事業：做生意一定有好的收獲。

上九：碩果不食，君子得輿，小人剝廬。

碩：大，碩果：大的生果，或者係大塊的生果。或者係呢一棵樹就係得呢一個生果。

呢度的君子得輿，君子就係有社會地位的人得到架車，但係小人就剝廬，無社會地位的人，占到呢一爻就連間屋都要俾人拆埋，點解會咁樣呢，因為君子就唔志在個大的生果，小人就好緊張，所以人地俾Ｄ野你，但係Ｄ有社會地位的人就唔貪，咁樣就清高，唔貪小便宜，呢個大小係大的生果同架車比，所以碩果就唔夠架車大，你唔貪小的，將來就會得到Ｄ大的，大到車咁大，車同果相比當然係唔會揀果啦，細的唔要，大的要。但係無社會地位的人就唔係勒，就千祈唔好學人地懶清高，結果就連間屋都無埋，呢一爻係好現實的，大雞就唔好食細米，細雞見到粒大米就要快Ｄ啄，如果唔快手就連粒米都無埋，君子就唔好貪Ｄ小利，貪小就失大，卦象表示呢個陽爻控制住五個陰爻，要睇下自己的社會地位，占卦的人所處的情形係乜野，如果形勢唔係咁好就要小都食，唔好扮清高，有得「腊就腊」，因為呢個卦的本義係陰氣一路上，一路向上侵佔，好容易連呢一個陽爻都會剝埋，但係如果自己係有力量的話，就唔同講法，有力量頂得順五個陰爻的剝奪，咁樣自己就可以有得揀或者可以有Ｄ較長遠的目標，所以到左呢個卦的上九爻就要好靈活咁處理，先要決定自己的社會地位，力量，材幹係點樣，先至決定點樣做。

象曰：君子得輿，民所載也。小人剝廬，終不可用也。

民所載也就係得到人民的擁護，所以君子就得輿，輿就係馬車，後來就轉變左做轎，民所載，得到民望，呢度解的輿就係民望，你所得到的民望好大，好厚，民望的力量好大，好厚，好有力。好大，有力到可以捧起你，好似車咁樣可以載住你，亦都表示眾的力量，你得到群眾的力量，就可以捧起你，好似有車載住咁就係得輿，民所載，呢個輿係民意所組成的，但係如果你無力，無民望，無人幫你，所謂小人勒，就剝廬，更加終不可用也，睇下成個卦都係負面的力量大，無論占到邊一爻，都要記住負面的力量一路增大，所以唔好睇見君子得輿就開心，覺得自己都係君子噃，唔係的，反而要審度個形勢，先至去進行一件事。

占到呢一爻問前程：就一定唔好貪小利，如果貪小利就會因小失大，得不償失。

問婚姻：女的就唔好急住要嫁，因為陰爻勢大，男的就一定要快刀斬亂麻娶左先，因為陽爻勢弱，所以唔好慢慢揀勒。

問事業：就可以創業，因為卦象話得輿，民所載，有人擁護，有群眾愛載，所以創業係好的。

綜觀成個剝卦，陰爻一路擴展，剩番一個陽爻，所以話碩，一般說碩果僅存就係呢度黎，代表剩番最後一個陽爻，能夠支持，因為一開始環境已經衰，支持得到就有好日子，好似現在的時勢，個個負資產，支持得到經濟復甦就有好日子過，所以呢個卦係先衰後好之象。