《易经》第二十八卦【大过】泽风大过#

大过：栋桡，利有攸往，亨。

呢个卦两个阴爻包住两个阳爻，等如两边好弱，中间坚实，卦辞话大过栋挠，利有攸往，亨，栋挠系乜，栋挠就系条柱「恋」左，条柱不胜负荷「恋」左就叫栋挠，梁就系横的，栋就系直的，亦都叫做柱，栋系要承爱压力的，好似911的世贸大厦. 就系D柱承受唔起咁大的压力. 呢个栋字直到现在的广州音重用紧的，栋起佢就系呢个栋，栋梁个栋，本嚟系名词，现在好多时都将佢当左动词嚟用，呢度的栋，栋起嚟，栋挠，条柱曲左，点解 曲左呢，因为两头弱，所以就「恋」左，就要走人啦，所以利有攸往如果条柱「恋」左重唔走就有问题嘞，走就系利有攸往，呢度表示变动就好，守就唔好，保守就唔好，条柱「恋」左所以呢度的利同埋亨唔系好的， 唔系吉的，系因为条柱「恋」左，个个鸡飞狗走咁解，条柱承受唔起D压力，要倒塌勒，重唔走，所以呢度的利有攸往，亨千祈唔好当系吉咁解，更加唔好见到利呀，吉呀就当好，所以要分清楚先至好，挠即系「恋」咁解，呢个卦系好象形的，睇埋个彖辞。

彖曰：大过，大者过也。 栋桡，本未弱也。 刚过而中，巽而说行，利有攸往，乃亨。

大过之时义大矣哉。 个彖词我地一向都唔多重视，不过呢度佢又讲得几好，话大过，大者过也，栋挠本末弱也，乜野叫大过，就系大的部份大到过笼，一头一尾弱，本末弱，所以就会「恋」，呢度的恋左系话出左问题，凡一件事过笼，过份，过头，例如将一件事夸大到过晒龙，对人或者事挑剔得过份，或者太过谦虚，太过作大都系本末弱，即系过犹不及，一定会出问题。 刚过而中，系刚过咗龙，刚即系阳，阳的力量过咗龙，中间四个阳爻在个卦的中间，就系刚过而中，巽而说行，利有攸往，乃孚，巽而说即系 巽而兑，巽系风，兑系泽，呢个卦本末都系弱的，承担太过，就唔能够再承担，超出左自己的能力，过就系超出，超过自己的能力就要离开，夹死顶就唔好，离开就好，就利，同埋亨。 大过之时，大矣哉。 大过，大问题，出现左大问题，一定要用非常的手段，或者有大过之人，大能力之人，嚟处理呢D事，或者有大事出现，而呢D大事肯定超出自己的能力。

象曰：泽灭木，大过; 君子以独立不惧，遯世无闷。

泽灭木，山泽盖过左D树，因为呢个卦系泽风大过，风就系木，点解风系用木代表呢，因为以前无风速计，所以要知道有无风或者D风有几大，就要睇D树郁的程度，所以巽为风，但系用 木嚟做代表，因为无木无树林系显示唔到D风力的，例如在森林里面，小小风就好似打风咁样，唔似在城市，好大风都唔觉有风，所以木同风就同埋一个象，泽灭木，个水泽盖住个木， 咁样就太过，D木生在水泽下面，如果水的份量适当，D木就会生长得好好，就无过，现在过左笼的水盖过晒的木，就叫大过，就叫泽灭木。

君子独立不惧，遁世无闷自己独立，处世，或者自己孤军作战，就叫君子独立不惧，发挥唔到自己的才干，都唔会气馁，更加唔会自暴自弃，就叫遁世无闷，有D人遇到小小挫折就成个人谢晒，或者对自己诸多作贱，最常见的就系狂饮酒，其实实就系惧的一种，发挥唔到自己的才能，就要等待时机，长养以待时，就系无闷，即系好安闲咁样等时机， 有D人一遇到前景未明的时候，扎扎跳，心浮气燥，就系唔得安闲，长养以待时的作用就系加强个本同未，培养承担的能力，呢个卦主要就头尾唔够力，就要充实自己，令到自己独立不惧，遁世无闷，充实自己，咁样就唔会有大过，亦都唔会有大的部份过左龙，如果唔用呢种态度，而急于求成就有站立不稳之象，就会跌低，因为呢一卦系话根基未稳，本与末都未得， 同时亦都代表咗时机出现得唔洽当，要充实自己，先要遁世，仲要忍得。

占到呢卦问前程：呢一卦有寒木生花之象，但系本末俱弱，好运嚟得太迟，夕阳无限好，只是近黄昏，呢一卦问前程就真系唔乐观，会有好人好事出现，但系好迟，例如姜子牙八十岁先至俾文王睇起。

问婚姻：有不平衡之象，年龄相差好大，思想有距离，包括左期望过高，系一段唔长久的婚姻，问结婚就唔好，问离婚就速速，因为系一段无根基的婚姻。

问事业：合作或者创业都系唔好的，如果打工仔就表示上司或者老板就会越嚟越挑剔，会有一种好失落的感觉，觉得以前尽心尽力为公司的努力白费晒，所以要采取遁世无闷的态度，就令到自己开心D，其实系一种等待时机的态度。

初六：借用白茅，无咎。

白茅，白色的茅草，點解茅草會係白的呢，原來係茅草的芯，將嫩的茅芯抽咗出嚟，以前的祭祀，係用白茅嚟「煎」住Ｄ三牲祭品，就唔係用碟的，因為以前係用大的三牲嚟祭天，全豬，全羊，全牛，唔係好似現在咁寒酸，求其殺隻雞，搵舊燒肉就叫做三牲祭品，全牛，全羊咁大就唔可以用碟，就要用茅草嚟到煎底，用白茅織成的蓆嚟到＜煎＞，所以呢度話藉用白茅，呢個藉就係＜煎底＞咁解，用白茅織成的蓆嚟＜煎底＞，所以無咎，茅草係好柔弱的，茅草條芯就更加弱，都無咎，點解無咎，就係利用個弱，肯＜煎底＞就得啦，起碼都乾淨企理，肯做到最低，最卑微就唔會有問題，如果唔肯＜煎底＞，要蓋面就好易俾人一手就撥開，因為未到露在面的時候，變成無用的茅草，現在肯＜煎底＞就無事，所以弱有弱的用處，呢度話弱的時候一定要低調Ｄ，唔好嫌棄位置低，呢一爻的意思話弱都有弱的用處。

象曰：借用白茅，柔在下也。

藉用白茅系乜，就系柔弱的野在底，柔在下也，因为本末弱，就唔好强出头，唔好夹硬嚟，呢度的藉用白芧只不过系举一个例，时机未到就要企番在适当的位置。

占到呢一爻问前程：就要低调，唔好强出头，要进行的事未到时候，不妨低声下气等待时机。

问婚姻：表示有问题出现，但系要低调忍让，发现老公有问题，就千祈唔好大吵大闹，要用柔和的手段去处理。 问结婚就好，离婚就唔好，因为唔系用强硬手段，所以离婚就唔符合爻义。

问事业：表示嚟问卦者一定系处在弱势，无论系打工或者做生意都系主张采取守势，唔适宜扩张，或者跳槽，因为呢一爻的处境系弱的，只要系忍得就无咎。

九二：枯杨生稊，老夫得其女妻，无不利。

九二系刚中，唔系刚中正，梯系乜，枯杨生梯，就系嫩芽，树的嫩芽，严格嚟讲系杨柳先至有的，柳树的梯可以发成树枝，见到杨柳树一枝一枝垂落嚟的就系梯，由嫩芽长成的，杨 树的梯唔单止长叶，重长埋枝的，枯杨生梯，己经枯咗的杨树，居然发出D嫩嫩的芽，就等于一个老夫娶到一个后生女做太太，女妻就系后生的太太，无不利，无乜嘢唔妥，九二开始入到个强的爻， 呢个卦初爻又弱，上爻又弱，中间就强，呢一爻就系强的开始，但系只系初初强，唔系太强，等于一个男人，唔系太强的男人而系一个老年人，唔系后生仔，得其女妻，女妻就即系年轻的妻子，年龄唔相配的妻子，点解无咎呢，枯杨生梯，有绝处逢生之象，老根长出新芽，所以无不利。 一件事进行得好唔顺利，睇白唔得，但系又柳暗花明，突然间又有番D希望。

象曰：老夫女妻，过以相与也。

老夫少妻，过以相与，就系能够刚柔相济，虽然有过，一个强的阳，过得嚟刚柔相济，相济就系以有易无，大家沟通就叫做相济，在呢度叫做相与，强弱的势力唔均等，就叫做过，虽然有过，不过，过得有相与，呢个与如果用普通话解就有排解，但系如果用广州话嚟解就解得好明白，所以识广州话对于学易经诗经系着数好多的，呢一爻就系话老夫少妻虽然唔系咁理想， 但系都可以相与，或者容易相与。 呢度系讲其中一方肯退让，就可以相与。

占到呢一爻问前程：有绝处逢生之象，环境点样恶劣都唔使心灰，虽然仍然处于劣势，但系已经睇到D曙光。

问婚姻：呢一段系唔相配的姻婚，问结婚就唔好，离婚就好，虽然可以相与，但系有过的成份，呢度的过系基于现在的观念。 以前D女人嫁个行将就木的男人，系好正常的事，但系现在就好大问题。

问事业：表示公司需要有新血加入，问合作就好，打工就要跳糟，因为自己已经变成呢间公司的旧血，所以要有心理准备卑人换。

九三：栋桡，凶。

栋恋左就凶，栋即系柱，系支撑成间屋的，三四爻在卦的中间，所以用栋嚟做比喻，九三阳爻阳位，属于过度刚强，过刚就易折，好似干卦咁样，六爻纯阳，就容易有突发的事，呢度的凶系由于过度刚强，刚强亦都演变成过份自信，过于自信，无论在思想或行为上面都会有突然的意外。

象曰：栋桡之凶，可以有辅也。

辅=苦音。 点解会有凶呢，因为无野在侧边傍住，有辅，即系傍住，无野傍住所以就恋勒，在易经里面有一个格式，如果系一个凶卦，咁内卦的凶象一定大过外卦，即系下卦的凶象一定大过上卦，所以三四爻相比，三爻就一定凶过四爻，呢个系易经的通则。 但系如果系好的，吉的，三爻就一定无四爻咁好的，即系下卦的吉就一定唔及上卦，易经的通则就系咁样。 讲番呢爻不可有辅的辅就系同等力量咁解，栋系支持或者支撑一间屋，引伸落嚟支撑一个机构，甚至乎一个国家，本本易经都讲点样去挽救一个国家，点样去帮助个国君去挽救国家，真系唔累的，呢一爻话净系自己刚强，无人帮佢，同时因为自己刚强的关系，因为过于自信，亦都唔想有人帮，所以就有问题。

占到呢一爻问前程：表示会孤军作战，如果想搵人帮忙就一定要放低自尊心，但系江山易改，本性难移，占到呢一爻定自信心爆掤。

问婚姻：如果问离婚就多数成功，结婚就机会微D。

问事业：适宜合作，打工仔问到呢一爻就知道呢个人在呢个机构里面人缘唔系咁好，所以转工好过。

九四：栋隆，吉; 有它吝。

乜野叫做隆，拱起的就叫隆，或者粗壮，壮大就叫隆，又点解会吝呢，有它吝，有D潜在的问题，呢度就要连埋个象词一齐解。

象曰：栋隆之吉，不桡乎下也。

唔系自己的问题，系发生在人地嗰度而牵连到自己，点解人地的问题又会牵涉到自己呢，因为初六弱，点解初爻又会关系到四爻呢，因为初与四应，本来初与四应系好的，但系可惜初爻同四爻都阴阳错位，所以呢一爻絶对唔吉，因为呢一卦的卦义系本宋俱弱。 有它吝即系自己现在无问题，但系有其他的问题，同时嗰D问题一早己经存在的。 所以好多人话用易经嚟占卦好难，就系因为无搅清楚成个卦的意义，只系于某一爻嗰度着眼，所以易经占卦系好难，因为好深。 好似呢一爻话吉，其实绝对唔吉，栋隆，有他吝，自己呢度冇问题，系俾人地累到自己。

占到呢一爻问前程：表示唔系咁乐观，好多小人潜伏，要检讨下以前有无得罪人，以早作预防。

问婚姻：唔赞成离婚，因为有问题都系旧问题，所以唔应该将以前的野「抄」番出嚟。 但系通常发展到呢一个阶段，就一定钟意（抄）番以前D嘢出嚟攻击对方，以达到离婚的目的，虽然爻词唔赞成离婚，但系肯定离得成，问结婚就多阻挠。

问事业：就只宜独资，因为合资就会有潜在问题，其实呢一爻系唔适宜做生意，如果系打工仔就会有好多指背星出现。

九五：枯杨生华，老妇得其士夫，无咎无誉。

华=花音

九五阳爻去到最高个位，再上就系阴爻，呢一爻同九二相应，九二就枯杨生梯，老年得其女妻，呢度就枯杨生花，老妇得其士夫，一个伯爷 婆同一个后生仔结婚，无咎无誉，无好无衰，但系己经去到阳的尽头，再上就系阴爻，所以唔维持得几耐，无话到好定唔好，但系个彖词就唔放过佢。

象曰：枯杨生华，何可久也。 老妇士夫，亦可丑也。

丑=丑

虽然无乜问题，但系唔持久的，因为枯杨生华，枯左的杨枝会开花，系唔可以持久的，亦可丑也，呢个丑就系有问题，点解九二话无不利，因为老夫女妻，仍然可以有仔生，周时见到D六七十岁的老夫抱住个BB在大陆出嚟领証或者打针，所以九二话无乜好，但系亦无乜唔妥，因为重可以生仔，中国以前的观念系最紧要增加人丁，增加劳动力系头等大事，所以九二系一种错配，但系都无乜问题，不过九五就唔同，点解话可丑呢，其实就系性别歧视，因为士夫有生殖能力，但系老妇就无生产能力，所以当时的社会系反对呢D婚姻的，因为当时无平机会，亦无性别歧视法例，如果有就绝对唔会有呢D爻词，同时相传彖词系孔子写的，孔子系最崇尚男尊女卑的人。

占到呢一爻问前程，表示所谋的事会成功，但系可唔可以长久维持落去呢就唔知。 因为问到呢一爻的人所做的嘢未必为大众所接受，所以要承受好大压力。

问婚姻就表示呢段婚姻有问题，未必可以长久，同时亦会招来好多闲言闲语。

问事业亦唔主张合作，因为合伙人都唔系志同道合，如果打工就主张跳糟。

上六：过涉灭顶，凶，无咎。

过涉即系过河太深勒，所以灭顶，因为浸到顶代表太过，涉水而过，D水太深，浸过头，所以就凶，点解又无咎呢，睇埋个象辞。

象曰：过涉之凶，不可咎也。

不可咎也，就系唔好赖人地，所以呢个无咎，绝对唔系无坏咁解，睇易经一定唔好睇见吉，或无咎就判断系好，所以易经无乜人可以靠睇书而学成易经的，一定要有师承，呢度涉水而过，但系浸过头遇凶险，但系唔好怨人呀，人地叫你过你就过咩，你自己唔审察清楚，就盲目前进，衰咗都系自己攞嚟衰，所以话不可咎，唔可以归咎人地呀，唔好赖人地呀， 以前有个历史间谍故事，项羽对英布，英布系刘邦一员大将，英布据河险守，吕布在山顶攻落嚟，项羽睇见形势唔系几妥，所以揾幕僚占一卦问吓吉凶，占到过涉灭顶，个幕僚认为未 系进攻的时候，其中必有古怪，但系项羽在山上望落去，见到个个都水深到腰，就以为D河水好浅，一声令下冲落去结果就个个都灭顶，原来英布一早命令D士兵用高蹻在河水中行嚟行去， 做成好似好浅水的假象。 呢个系一个出名的过涉灭顶的例，所以呢个灭顶系自己攞嚟的，无咎，不可咎就系咁样嚟的，千祈唔好见到无咎就以为好好，好多书都见到吉就话吉，见到凶就话凶，所以本本书都系抄的。

占到呢一爻问前程，唔好俾眼前的景象蒙骗，一定要详细审察先至好决定，同时最忌耳仔软，尤其系投资策略，股海系好容易灭顶的。

问婚姻表示呢段姻缘有问题，但系D问题系自己的，同外人无关系，所以有问题都可以解决。

问事业唔主张合作，亦唔主张听人地的意见，所以合资就唔系咁好，打工仔就主保持现状，唔主张跳糟的。

综观成个卦，在秋冬的季节树木凋零的时候，再度开花，在意想唔到的时候，又有意外收获，呢一卦的背景系姜太公遇文王，本来系好的，因为得到文王的重用，可以封候拜相，但系可惜姜太公己经80岁，所以虽然好，但 好的野嚟得太迟，所以归根结底呢个唔系一个好的卦，卦象为中间四个阳爻紧密相连，强健过笼，初上两爻虚弱，好唔平衡，两边弱中间负重过龙， 好似彖辞话，大过，大者过也，大过就系阳爻过多，本未弱也，本末就系初六，上六两个阴爻，两端柔弱，象辞话：君子以独立不惧，D伙伴离开晒自己，君子代表 领导人，发生非常之事的时候，就要有非常魄力，去应付面对的问题，大过的卦形在汉朝的时候被视为棺椁的形状，所以在汉朝的时候以大过为死卦，占到呢一卦必有凶象，每一爻都讲明唔系咁好， 所以见到呢一卦就要睇下自己系乜野料，先至做几大件事，但系呢个世界有自知之明的人真系好少，多数都将自己睇得太高。