《易经》第二十九卦【水】坎为水#

坎：习坎，有孚，维心亨，行有尚。 （尚读赏音）

坎卦同离卦系上经的晢理，上经一开头讲乾坤两卦，将呢两个卦的中爻换一换，就变成坎同离，乾坤互换中爻就变成坎离，呢一个一定要记住，到左下经 乾坤又再变成既济，未济，易经的主要意义就系要动，动就系变，在日常生活，我地只不过系一个普通人，天地对我地的作用唔系咁大，但系水火对我对我地的作用就好大，水火就系由乾坤而黎的，讲番呢个坎卦，九五系卦主，习坎，习坎系乜，重复就系习，重复一件事，学习一件事，呢个习就系做完再做，复习，即系温习，练习，就叫做习，坎，坎就系险，一个阳爻在两个阴爻中间，在地的中间就叫险，呢个险 唔止一次，就叫习坎，坎卦系八纯卦之一，易经讲其余的七个卦都系俾一个字佢，例如：乾，坤，艮，震，巽，离，兑，唯独是坎就加个习，意思系险上加险，凡亲学习都系重复的， 所以我地知道好少人学野系一次过就识，包括左风水命理，所以好多人都学完一个阶段，再学多一次，第一次唔入脑，或者掌握唔到个窍门，当你再重复学习第二次的时候就觉得好容易，以前谂唔通的野，到左习的时候，就豁然贯通，呢D系常见的现象，所以重复学习系好的，有孚，维心，有孚就系信念，维心就系在心里，在心里面有自己的信念，有自己的主意，信心， 咁样就亨，亨通，虽然险境唔止一个，或者唔止一次，但系都有信心。 行有赏，呢个尚系赏，赏唔系话有人奖D野俾你，唔系有奖赏你，而系面对困难有信心，唔会退缩，就一定有回报，因为好多人面对困景，信心动摇，放弃自己最初的信念，甚至乎出卖自己的尊严，所以呢度的维心，就系信念的维系，唔好放弃，就一定有回报。

彖曰：习坎，重险也。 水流而不盈，行险而不失其信。 维心亨，乃以刚中也。

行有尚，往有功也。 天险不可升也，地险山川丘陵也，王公设险以守其国，坎之时用大矣哉。

习坎，重险也，即系两重险，在易经里面所有有关数目的字眼都唔系肯定的，例如三岁不兴，七日来复，先甲三日，后甲三日，或者先庚三日后庚三日等等，都唔系指定个数目的，所以呢度的重险，就只系解成唔止一次，唔止一度的险境，水流而不盈，行险而不失其信，呢度话水向低流，满左唔再流就叫盈，不盈就系未满，未满就要不断注入，一直到满为止， 孟子话：原原混混不舍画夜，盈科而后进，呢D系水的特性，人都系一样遇险而不失其自信，流同盈系相反的，流系水不断动，盈系不动，我地知道水系不断要流动先至好的，所谓流水不腐，行险唔系行险侥幸，唔系靠博，而系行到险之中，身在险中，而不失其信，在唔好的环境里面都坚持自己的信念，维心亨，乃以刚中也，维心就系坚持，只要坚持就可以亨通， 点解一次又一次的险都可以坚持呢，因为乃以刚中也，刚中就系九二同九五，阳爻在中间，就叫刚中，刚中就系唔会动摇，行有尚，往有功也，点解有赏呢，点解会有回报呢，往有功，因为无停低，无放弃，天险不可胜也「音升」地险山川丘陵也，险本来系唔好的，不过分开天险同地险，天险就唔系人力所能抵抗，例如天灾，突发性的灾难，非人力所能抗衡，但系地险就唔同，孔字写呢个彖辞的时候，将呢个坎分成天险同地险，佢话地险只不过系山川丘陵。 地险系可以睇到的，既然可以睇到，就唔使惊，重可以利用添，就系王公设险以守其国，险之时义大矣哉，险唔系净系衰的，王公，即系领导人，D领导人用险黎做守卫，拣D一夫当关，万夫莫敌的地方黎做居所，或者搵D易守难攻的地方黎做国都，所以话险的作用系好大的。

象曰：水洊至，习坎; 君子以常德行，习教事。 洊. 战，水再来。

水洊至，的水不断咁流过黎，一重一重咁流过黎，习坎，D危险好似水咁样一重重「扲」埋黎，君子以常德行，习教事，常德就系固定的标准，常就系固定，固定的道德标准，黎进行习教，教的时候一次又一次咁教，都系拎住同一样的原则黎教，就好似D水，水的方向永远都系一样，好似我地拎住一个不变的标准，不断咁去教人。

占到呢一卦问前程：表示身处于困难之中，只要有信心，问题就可以解决，因为呢个困难系无人可以帮你的，只可以靠自己。

问婚姻：就一定要处于中正位，唔好用怀疑的态度，要互相信任，呢一卦唔主张离婚的。

问事业：主张要专心一致，最忌多心，唔主张转行，或转工。

初六：习坎，入于坎窞，凶。 窞：探，深的洞。

开头一个阴爻，呢个本来系阳位，初三五系阳位，现在俾个阴爻占用左，同佢相应的亦都系阴爻，初与四应，呢一爻表示自己初入险境，再上又系险境，所以 就系习坎，两重的险，要经历两重险境，入于坎窞，入左坎窞的地方，等于入左陷阱，入左重重陷阱所以就凶，因为无力出险，同时呢个入于坎窞系不由自主的，睇埋个象词。

象曰：習坎入坎，失道凶也。

入左坎裡面，重要迷失左路，蕩失左，在危險的地方，重要蕩失埋，失道，所以就凶，呢一爻之所以失道，就因為陰爻居陽位，唔岩位，唔循正途解決問題，一味想行險僥倖，所以就習坎入坎，越陷越深。

占到呢一爻問前程：唔使講一定係陷於困境，短期內都唔使指意有轉機，呢個短期係指兩個月內。

問婚姻：係一段唔美滿的婚姻，結婚就唔好，離婚就好，因為入于坎窞，一味想退出，所以離婚係好的。

問事業：唔主張合作，因為合資好容易誤信奸人，打工就主張跳糟，呢一爻係主張改變現狀的。

九二：坎有險，求小得。

呢度陽爻落於兩陰爻之中，身居陰境，雖然剛中，但係呢個位唔係自己的，因為陽爻陰位，自己剛中，有志，但係周圍環境唔配合，有大志，但客觀環境唔就，所以求小得，唔好要求咁多，唔好諗住一味要做大事，食大茶飯，對Ｄ細眉細眼的野睇唔上眼，如果抱住大雞唔食細米的心態就可能連細的都無，呢度話俾我地聽大的收獲係由小的積聚而來的。

象曰：求小得，未出中也。

唔好净系谂住D大茶饭，细都要杀，点解，因为未出中也，未曾离开个险境，重未曾走出个厄运的，所以要面对现实，现在的客观环境系咁，就唔好强求。

占到呢一爻问前程：你会身不由己，属于有志难伸，要抱住大丈夫的心情先至会开心D。

问婚姻：己经结左婚的就表示呢段婚姻唔系好满意，但系慢慢就无问题，呢一爻唔主张离婚，因为仲有修改机会的。

问事业：现在正处于捱苦阶段，要等待好日子来临，打工就主张守旧，暂时唔好跳糟。

六三：来之坎坎，险且枕，入于坎窞，勿用。

来，系黎咁解，之，系去咁解，呢个之系动词，书上面讲之楚，之齐，即系去楚国去齐国咁解。

来之坎坎在六三呢个位，番转头系坎，向前唔使开心，一样系坎，来去都系坎，即系来去皆险，就一定要小心，但系唔到你小心，点解呢，因为险且枕，呢个枕字，如果唔识广东话就有排解，识广州话就好易解，险都唔止，仲要且枕，呢个枕系广州话的枕长个枕，即系枕长系咁的，呢度险且枕，即系呢D麻烦野，呢D对我地无益的野唔系突然间黎的，系一早己经存在的， 系枕长系度的，长时闲有险的意思，入于坎窞，勿用，入左个陷阱，勿用，唔好乱郁，勿用系唔郁的意思，点解唔好郁呢，因为前后都有问题，呢个勿用系出自潜龙勿用，潜龙就系唔好郁，来往都系险，所以宜静不宜动。

象曰：来之坎坎，终无功也。

前后都有危险，往来都有险境，在呢种情形之下，你郁，你动，都系图劳无功的，因为你己经将D时间用晒在D麻烦事上面，都无时间再做D有建设性的野，所以终无功也。

占到呢一爻问前程：表示你现在俾D麻烦包围住，多数都系人事上的麻烦，点解系人事上的麻烦呢，因为一早己经存在，枕长系度的，要解决唔系容易的事，慢慢黎，勿用，唔好冲动。

问婚姻：未结婚就要慢慢考虑，唔好急，己经结在婚的，呢段唔系一段好的婚姻，就算离婚都唔可以解决问题，所以应该慢慢解决，唔好冲动。

问事业：暂时未有机会俾你发挥，会觉得好无前途，好灰，因为进退维谷，同时重有好多小人，令你好似跌左入一个洞咁样，无人帮你，所以呢一爻主张以静制动，做生意以守为主，亦唔主张跳糟。

六四：樽酒簋弍，用缶，纳约自牖，终无咎。

牖：音由. 樽酒，即系俾一瓶酒你，簋即系九大簋的簋，现在系指载餸的碟，但系在商周年代系用竹织成的盘，缶系瓦杯，都系好粗糙，好简朴的食具，约系简约，牖系窗户。

成句的意思系用D好简单的食具由窗口递入去，有酒重有两个小菜，点解会咁样呢，因为你俾人困左在间屋里面，要扲野俾你食，唯有在窗口递入去，虽然俾人困住，但系都重有人拎野俾你食，所以都无咎，唔算太衰。

象曰：樽酒簋弍，刚柔际也。

际系边界，呢度解刚柔，刚系上级，柔系下级，呢度樽酒二鬼，即系自己唔掂都有人帮自己，终无咎。

占到呢一爻问前程：表示你在困境之中，但系唔使惊，自然会有人雪中送炭。

问婚姻：表示呢段婚姻，一早就己经有问题，但亦唔赞成离婚。

问事业：如果自己系做老板的话，呢一爻话领导人有问题的时候，有D好忠心的伙记，纳约自牖表示有人在你最失意的时候并无离开你，点解唔系婚姻而系雇佣或者系上下级的关系呢，因为象词话刚柔际也，呢度的刚柔唔系阴阳的刚柔，而系领导同下属，或者领袖同追随者。 如果你系打工的就唔好要求加人工，因为你正处于弱势，所以唔可以有咁多要求。

九五：坎不盈，只既平，无咎。

九五，第五爻系阳爻就叫刚中正，所以九五系最好的，大多数九五的爻词都系好的，坎不盈虽然个险唔系太满，险唔系太利害，袛既平<其>系乜野袛<即系现在的圻字>古代无现在咁多字，所以好多字都系借用的，呢个圻系解河里面或者水中的一个小岛，或者突出水面的礁石，可以俾人企得上去的就叫圻，圻既平，唔系一个岩岩的小岛，如果呢个岛粒凸不平的话， 我地游到水中间己经好疲倦，如果中间有个好平的小岛，我地就可以爬上去抖抖，粒凸不平的就想抖都难，呢个圻，系一个缓冲的地方，呢度话有困难唔紧要，可以有纾缓压力，唔系一直系咁衰落去，所以话无咎，但系千祈唔好误会无咎就系无问题，只不过唔系无继续衰落去。

象曰：坎不盈，中未大也。

中，就系话阳爻居中，阳爻在第五爻就叫刚中正，刚中正系最好的，点解话中未大呢，就系因为坎不盈，个险未曾停止，所以虽然系刚中正都唔好自大自满。

占到呢一爻问前程：黎问卦的人就一定系好有才干，可以判断佢系高级甚至乎系老板级，但都有时不予我之感，千祈唔好持才而不理时势，一定要审时度势先至好行动。

问婚姻：未结婚就要等，如果结左婚就要忍，如果自己提出离婚就唔成功，因为未曾到自己楂主意的时候。

问事业：唔主张合作，亦都唔主张创业，因为衰运未过，再等下，打工亦系宜静不直动。

上六：系用徽缠，置于丛棘，三岁不得，凶。

系：即系绑住。 徽：三股互缠就叫徽。 缠：两股互缠就叫缠。 丛棘：有剌的植物，好似仙人掌，勒杜鹃，柚树，又好似金庸笔下的情花。

呢个丛棘系古代的监仓，徽系粗绳，缠系幼D的绳，现在俾D又粗又幼的绳绑住，重要掟左入去个丛棘里面，以前的监仓就好简单，第一种就系划地为牢，即系在闹市地下划个圈犯人就企在个圈中间，等其他人望下你知道你犯左罪，第二次就唔敢再犯，如果在现世有呢种刑罚呢，就天下太平，但系又有法人权。 重D罪的就用丛棘，即系要困住，唔使人看守的，因为有D剌令到你走唔甩的，唔单止俾人绑住，重掟左入去业棘里面，咁都重未算，竟然三岁不得，即系 话几年都唔放，置于业棘本来系好小事的，但系现在唔知点解「之之坐坐」搅左几年都唔放，呢度的三岁，系几年，绝对唔系实际数字，呢度即系话好多变量的，呢件事搅黎搅去都唔掂，重越搅越涡，本来好小事， 但系拖下耐D，拖下又耐D，唔知为乜手尾越黎越长，所以呢一爻就真系凶。

象曰：上六失道，凶三岁也。

失道系话居两重险之中，唔系过左两重险，而系入左去重重险境之中，唔系衰一阵，而系衰几年，所以呢一爻就真凶。

占到呢一爻问前程：就要小心，一定好容易俾人害，以为有人帮你，实际系害你的。

问婚姻：就无乜好结果，问结婚有排未得，问离婚又未得，总之就系得个拖字，无一个肯定的时间。

问事业：合作做生意就会受人破坏，独资做生意就会有重重因难，打工就俾人笃背脊，都无边样好的。

综观成个坎卦，系自己陷入一个麻烦多而又无助的环境里面，所以就险，呢个卦的历史背景系武主发的军队：佢带住的先头部队去到一个叫做坎窞的地方，现在的山西北邙山的侧边，孟津以南，地 形险要易守难攻，呢度就系地险山川丘陵，王公设险以守其国，越行越入，就险象越深，但武王发在最困难的时候都无放弃佢的信心，继续向前行，维心亨，行有尚，唔气馁，唔停止，呢卦系讲一个领导人遇险的卦。