《易经》第三十卦【火】离为火#

64卦分开上经同下经、上经三十卦、下经三十四卦、离卦就在上经的第三十，在坎卦之后，坎者险陷，即系危险而陷落，既然陷落就一定要有D嘢「窊住」，抓住D嘢以求脱险，必需有所附丽，等待救援，而呢个附丽就系离，所以离系解「痴住」D嘢，或者拉住D嘢。 可以有D安全感，在上经三十卦来睇，坎离两卦处于最后，但系在六十四卦来睇，则处于上下经卦的中位，呢种卦象的编排设置初睇以为求其摆落去，但系睇落原来乏有道理的，睇吓坎的卦形 又睇吓离的卦形

坎离两卦系阴阳完全相反的，佢地系由纯阳卦乾同纯阴卦坤呢两卦变化而嚟的，乾坤两卦中爻互接就变成坎离两卦，而64卦的最后两卦系既济同未济，既济系下离上 坎坎，而未济就下坎上离，呢一两卦都系都系由坎离互相变化而来的，所以睇晒成本易经，头两卦系乾坤，而中间系坎离，到最后就系既济同未济，在64卦来睇，乾坤、坎离、既未呢六卦分开三组， 而前中后三组系有佢的联系性的，首先乾坤讲开天辟地，阴阳相交，达到生化万物的自然现象。 中间的坎离由乾坤的二、五两个中爻变化而成，坎为水而主宰寒冷，离为火主宰暑热，坎为月亮主宰黑夜，离为日主宰白昼，天地万物在一个大的天地之中系唔可以脱离日、月、水、火、昼、夜、寒、暑的转移，而独立生存，而中国的医生亦将人体比喻为一个小天地，将内脏器官分五行配置，肾脏属水，心脏属火，肝脏属木，脾脏属土，肺部属金， 但系偏偏世上有D人大言不惭话（自己脱出五行之外，真系唔识就俾佢吓死识就俾佢笑死）。 而五行中又以水火最为重要，所以64卦的既未系由坎离而来的，而坎离就由乾坤而来的，表达出64卦的首尾相应，而靠中气连贯，而坎离两卦亦都系一个小乾坤。

因为在先天八卦之中，排到次序系乾南坤北，一路发展到后天八卦图就变成离南坎北，由呢样野睇就知道坎离的重要性，离的卦形系上离下离，象征附丽同光明，同坎为水为月亮黑夜相反，离的自然现象系火，系光明，亦即系日，亦即系现在的太阳，离卦的卦形系两离重叠，即系好光明的意思，但系光明系点来的呢，因为光系一种虚有的嘢，并唔系一种实质的嘢， 就一定要依附在一种嘢上面先至可以发出，或者要由一D嘢来发出光明，所以就有离者丽也，离为火，而火系无一种固定形态，一定要用一种对象俾火附住，呢种嘢就系薪，所以后世有薪火相传呢句话，一般人只知道水有源头，而唔知道火的源头更重要，但系水就算离开咗源头都可以继续存在，但系火一离开咗个源头就即刻熄灭，所以火唔可以独立存在，一定要「痴住」D嘢，所以离就解附丽。

离：利贞，亨。

畜牧牛，吉。 牝=群音雌性。

离即系丽、附丽的意思，亦系明的意思，呢一卦系坤的二、五爻降到去乾的二、五爻而成，为火炎猛烈之象，火性炎上而光明，两离相叠，方向作用一样，又以柔居中位，所以利 贞，火性光明正大，照耀四方，绝无闪闪缩缩，照得到的，一定照，绝无偏心，所以除左利贞重亨通，因为文明之象，由燧人氏发明钻木取火之后，人类就脱离左茹毛饮血的野蛮生涯， 所以古人用火来代表文明进步，就证明古人的智慧唔简单，对火运用得越好就代表咗嗰个社会，嗰个民族越进步，因为所有动力都系靠火的，由最初的蒸气、煤、柴油、汽油、电力、至到现在最先进的核能，由在地球游荡而至到飞上去月球又呆居居飞返来，又由天冷的暖炉至到热天的冷气机，无不由一个火字开始，好耐之前重听到D人讲呢D系物质的文明啫， 我地追求的系思想上的文明。 但系唔知几时开始佢地亦都加入埋呢D追求物质文明的行列，所以火的发现或者发明系人类文明的开始就无得争议的，畜牝牛吉，呢一卦系以坤改变乾卦的，坤代表牝牛，而乾为马，点解话畜牝牛呢因为畜就一 定在里面的，一定在自己的范围里面先至叫畜，两个阳爻畜住一个阴爻所以叫畜，而呢个阴爻系由坤而来的，所以叫畜牝牛，因为牝牛的性格柔顺而居中，所以吉。

彖曰：离，丽也; 日月丽乎天，百谷草木丽乎土，重明以丽乎正，乃化成天下。 柔丽乎中正，故亨; 是以畜牝牛吉也。

重=虫音

离系附丽的意思，附丽就系依附住在某一个物体上面，当然系要正而唔偏钏，先至可以附得稳固，好似在一个机构里面，要靠自己的真材实料先至可以企得稳，企得长久，如果靠吹托，拍马屁或者人事关系就好难长久，所以上面的卦辞话利贞，而呢度话丽乎天的系日月，并唔代表日月「痴住」在个天上，而系话日月自己有真材实料，你唔少得佢，跟住话百谷草木丽乎土， 百谷草木系包含咗天地万物，万事万物都系依附在土地而生长，天有日月而觉得佢光明，地可以畜养万物而觉得佢伟大。 重明以丽乎正，卦象两个离，离为明，所以系重明，以系助语词，丽乎正即系丽于正，（正）系代表卦的中爻，系讲六五，六二两个中爻，因为六二柔得中，以阴居中得正，系成卦之主，代表所依附的系正的人，或者正的事，物系正的物，而道亦系正的道。 乃化成天下包括咗广照大地的榜样，译做现代语言就系（识我的都希望佢好），柔丽乎中正，故亨，是以畜牝牛吉，呢段系解释卦辞讲亨，是以畜牝牛吉，系因为六二同六五两个阴爻，都系在中位，柔丽系讲离卦的本质。 中正系指柔爻在中位，所以亨通，是以畜牝牛吉，呢度的牝牛系代表坤的德性，坤的性格，坤的性格系柔顺而有包容性，即系话呢一卦里面有坤卦的优点。

表面上好猛烈，重離，雙重的離卦，在離卦的中心縕藏咗坤卦的特點，所以卦辭話畜牝牛，而呢度結尾亦強調畜牝牛，一再提到包容性。

象曰：明兩作離，大人以繼明照于四方。

作＝即興起，明兩作＝日，月。

同一個明出現兩次，兩作，連續性，兩作離連續性的麗，同坎卦的習坎的習係一樣解釋，明兩作唔係明完就算，唔係求其光明一陣就算，係連續性的，大人有能力的人，受到啟示，明照就一定係指太陽，但係太陽必定要在天空照射先至顯出佢的價值，而亦表示出要在適當的位置先至可以照于四方，在適當的位置就可以發揮佢的作用，大人按照日月運行的規則，做番自己應做的野，就已經係好嘞，好似現在的特區政府官員，做番自己份內的事就已經好嘞，但係現在Ｄ官根本達唔到我地的要求，好似阿松咁，連自己買車都攪到一穫泡，幾十萬一個月，唔可以照于四方，根本唔可以發揮作用。

占到呢一卦問前程：表示來問卦的人正在行運，因為佢人緣好，如果做Ｄ嘢偏向於公眾的行業就有發揮機會，如果手藝性或者匿埋在室內做嘢就無乜前途。

問婚姻：係一段好和諧的姻緣，問結婚就好快成功，但係要著緊Ｄ，千祈唔好以為打風都打唔甩，因為卦義係有情緒化的變動，所有要快趣決定，問離婚就機會好微。

问事业：合作就比独资好，因为有互相包容的气量，独资就因情绪问题无人商量而决定错误，打工就唔使转工。

初九：履错然，敬之无咎。

履=即系鞋，错然=系装饰。

履即系鞋，错然并唔系着错鞋，错系装饰，错然系有装饰，唔单止有鞋着，重有装饰添，装饰得好靓，本来鞋唔使装饰，但系呢个人对鞋装饰得好靓，唔使讲呢个人一定系有地位的，敬之无咎，对佢恭恭敬敬就一定唔会有错，因为履错然在古代唔系咁多人有履着的，多数都系着草鞋，着履就一定系有番咁上下，着履而又有装饰就更加唔简单，唔单止有番咁上下直头系有地位， 而且系高嗰只，见到个有地位的人敬吓佢无蚀底的，唔单止以前系咁，一直到现在都系咁，以前D女仔相睇的时候，第一件事就系睇吓个男仔对鞋，如果对鞋好多泥尘，擦得唔够「拎」，就第一个印象打晒折扣，就算现在无咗相睇呢样咁浪漫的嘢，履呢种东西一样系身份，场合的象征，尤其是去见工，如果着住对懒佬鞋，都唔使慌有机会，所以多数人都有二三十对鞋的， 我地去睇风水就知，最多款式种类的除咗衫之外就系鞋，睇吓D鞋铺好少执笠的就知道，将履作为错然的心理，即系装饰，炫耀的心理，一直无改变过。

象曰：履错之敬，以辟咎也。 辟=避字解亦读避音。

点解见到佢只鞋靓就要敬下佢呢，就系为左避咎，为左免麻烦，因为着得呢D鞋就算唔系官，都系猛人之类，最好就系唔好惹佢，所以要避嘞，亦即系话呢个人有炫耀之心，唔多谦厚，小心呀，唔好得罪佢呀，如果唔系就有麻烦嘞，（古时一直去到汉代，一般人都系着麻鞋，普通人只系用麻线来织鞋着，履就完全唔同，系用牛皮来造的，即系我地现在的靴，一路去到晋朝， 即系司马家族开始有履着，即系现在日本人着嗰种，用脚趾夹实条带嗰种，其实唔系时麾，更加唔系来路野，系中国固有的嘢来的，但系现在D中国人唔重视传统，重专登去日本买对屐番嚟威，以为好过瘾）。 麻的价值同牛皮的价值相差好远，所以可以着得起履的就一定有番咁上下社会地位，因为着履就一定有着袜，但系古人系讲究扑实无华的，虽然有钱有地位，但系都唔会过份，过份装饰就变成花巧，钟意花巧的人一定性格轻浮，旡容人之量，自以为高人等，遇到D等级低过自己的人，认为对方唔够尊敬，就容易有冲突，所以唔想有麻烦的人就主动避开佢， 唔系怕佢而系避免麻烦。

占到呢一爻问前程：呢个人正在行紧运，但系做野都要做D面对公众的好D，唔好匿埋对住四幅墙就较有发展机会。

问婚姻：系一段要忍让的婚姻，男人问就男人忍，女人开就女人要忍，开结婚就唔好急，慢慢考虑，问离婚就要快D决定。

问事业：合作就无咁好，因为双方都唔够实际，所以合作无乜好结果，独资就无问题，打工就要快D转工。

六二：黄离，吉元。

黄离系乜呢，黄系代表土地，离系代表「痴住」「痴住」的土，「痴住」D土地，有土地俾你痴住就大吉嘞，元系本体，元吉就系基本体的吉，本质系吉，有土地俾我地「痴住」就代表左脚踏实地，呢一卦系以畜牝牛吉系内在的包容性，而呢一爻系卦主，所以一定以实际无花巧，脚踏实地，先至可以发挥个包容性，所以元吉。

象曰：黄离元吉，得中道也。

点解脚踏实地系吉呢，因为得中道也，六二柔得中，在64卦，六二无唔好的，阴柔处在中位，唔过份，亦都系中正文明的基础。

占到呢一爻问前程：来问卦的人开始行运，因为有靠山，只要坚持现在做紧的嘢就一定成功。

问婚姻：系一段好稳阵的姻缘，问结婚就好快成功，问离婚就唔符合爻义，因为呢一爻系自己唔会偏离正道，所以离婚系唔啱的。

问事业：合作同独资都系好的，打工就唔使转工，留低仲有前途。

九三：日昃之离，不鼓缶而歌，则大耋之嗟，凶。

日昃=日蚀。

鼓缶=用罐戴住唔同份量的水，作为乐器一路击，一路唱歌，大耋，音秩=七十叫耋，八十叫大耋。 古时的乐器种类无现在咁多，但系都已经有吹的乐器，同鼔击乐，而呢一个缶就系击乐，古时对天系存有一种畏惧的心态，例如无端端行雷，又惊一餐，日蚀就 更加唔使讲啦，因为天狗蚀日所以一定要鼓缶而歌，打锣打鼓唱歌，并唔系庆祝，而系赶走只天狗，天狗蚀日有乜野唔好呢，原来天狗蚀日系影响老人家的寿命，呢个传统一直流传到现在， 在中国的西南方小数民族重有呢D习惯，但系就由赶天狗的原意而变成为老人家求寿，所以呢度话不鼓缶而歌，则大耋之嗟，日蚀的时候唔打锣打鼓唱歌，赶走天狗，D老人家就有问题嘞，所以就凶，古时死左一个人叫嘥咗，无意识话人老就要死，好似关德兴生前话，旧年嘥左个女人，嗰D后生女记者搅左好耐搅唔清楚佢嗡乜。 当时天狗蚀日如果D后生唔鼓缶而歌，D老人家就有灾难，就凶。

象曰：日昃之离，何可久也。

日昃，日抖，之离，痴住个日头，日蚀的时间唔会好耐的，非常的现象，人心惶惶，但系唔使惊，唔维持得好耐的。 可以将D出乎意料之外的嘢作为一种考验。

占到呢一爻问前程：就小心会有突发的事，就算有突发的事，只要应付得法都唔会有凶。

问婚姻：系一段唔稳定的婚姻，问结婚就有排未得，但系问离婚亦唔符合爻义，因为呢一爻话有大麻烦，但系唔使惊，一阵的啫，所以问离婚应该唔成功。

问事业：合作就差D，因为唔齐心，独资就梗系无问题，打工就要转工因为有突变想唔走都唔得。

九四：突如其来如，焚如，死如，弃如。

咁多个如=都系助语词。

呢一爻D书上解到不知所谓，笑料成萝，呢度的豆点一定要清楚，突如，其来如，突系乜呢，突系不孝子咁解，所以有冲突，呢句话就系阻止D不孝的行为，不正义的人就叫突，反对D不正义的事就叫冲突，突如就话呢个忤逆仔呀，其来如呢个忤逆仔来嘞，个不孝子来到就点做呀，就烧左佢，杀左佢，扔左佢，唔好犹疑，唔好婉惜，呢度系好决绝的，讲究当机立断。

象曰：突如其来如，无所容也。

一个不孝子，忤逆仔来咗，无人肯收留佢的，呢一爻的位置阳爻阴位唔啱位，同下面的阳爻敌应，敌比，同初九敌应，所以个个都同佢唔啱，呢个突唔单止话忤逆仔，亦可引伸为唔正当的人，无所容度度都唔肯收留佢。

占到呢一爻问前程：做野就要小心D，因为无人帮，重唔止，因为人缘唔好所以目前所谋的事成功的机会好微。

问婚姻：系一段好唔稳定的婚姻，问结婚就好难成功，因为反对的因素太多，问离婚好快。

问事业：暂时唔主张创业，因为天时地利都唔啱，打工就快D转工。

六五：出涕沱若。 戚嗟若，吉。 涕，沱=都系眼泪口水鼻涕一齐来。

眼泪口水鼻涕「肥呢啡呢」流极都唔干，戚嗟若，长嗟短叹好「闭毅」呢个嗟读车字音，广东话里面的车！ 使乜理佢的车音，就系呢个嗟字，但系现在D报纸都净系用呢个车字，系唔明白广东音系有字的。 呢一度喊到好凄凉，长嗟短叹就咭嘞，点解咁样反而吉呀，因为识得担心，识得忧虑，如果唔识得担心，唔识忧虑就无咁好，咾个吉系有忧患意识。

象曰：六五吉日，离王公也。

六五系高位，之所以吉就系痴住个王公，傍住个有地位的人，既然傍住个有地位的人又点会涕沱若呢，因为知道D内幕消息，而呢D消息系唔好的，例如你傍住董特首，你一早就知道八万五呢个消息，但系唔可以周围讲，所以就戚嗟若，成日长嗟短叹，所以呢个吉唔系正面的吉，而系负面的吉，我地读易经千祈唔好睇见吉就盲目相信吉。

占到呢一爻问前程：做嘢就未系时候，尤其是有重要嘢要决定的就一定唔好即刻决定。

问婚姻：系一段长期唔开心的婚姻，问结婚就有排未得，问离婚就好快。

问事业：创业就未系时候，因为环境未适合，打工就唔使转工，因为离王公也，系傍到个好老细。

上九：王用出征，有嘉折首，获其匪丑，无咎。

王用出征，跟住国君去打仗，有嘉，即系有奖，奖乜呢，折首奖你斩左人地个头，以前的人打仗系以斩左几多个人头来计的，将斩落来的头挂在条腰带度越挂得多就越威，后来觉得挂咁多头在条腰带 度好论尽，就改为割左层头皮连头发绑在条腰带度就好威风嘞，就叫做折首，不过差D因为获匪其丑，系所斩的都唔系嗰个亚头个头，如果呢度你读匪徙个匪就解天光都解唔掂， 其丑就系敌人的亚头，斩佢唔到，不过都无咎，出征的时候已经落左「柯打」斩亚头个头但系斩左好多，无个系，但系都唔紧要啦，无咎，唔追咎。 象曰：王用出征，以正邦也。 正邦=搅掂自己的地方。

呢一次之所以出征，系因为有内乱，所以要平定内乱，所以斩唔到亚头都唔紧要，目的系正邦啫，令个地方平静番啫，唔系侵占其他国家。

占到呢一爻问前程：所做的野表面上好成功，但系都功亏一篑，只系得表面的风光，表示所做的野唔实际。

问婚姻：系一段好姻缘，问结婚就好快成功，问离婚就唔容易达到目的。

问事业：合作就好过独资，打工就唔使转工，因为得到老细重用。

睇完左成个离卦，由自然界，天地的最常见的现象，至到人际间的关系，例如上下阶级，好似初九就系阶级的表现，六二企系最适当的位置，脚踏实地去做野，九三讲人想同大自然搏斗，九四就系讲伦理的关系，六五识得忧患，预早知道有闭毅野，上九就连D反对的力量都清除晒。