《易经》第三十一卦【咸】泽山咸#

咸，就系感的意思，系交感的感，感情的感，感应的感，有人话咸系无心的感，亦都岩，呢个心可视之为机心，麻木不仁的心，咸又有皆的意思，人与人之间皆有感受，人与大自然皆有感应，咸字亦解为至诚，如果无诚意的诚，亦唔可能同人产生感应，更加唔好指意同大自然产生感应，缺乏左最主要的诚意，就剩番虚伪同麻木。

易经分开上经同下经，上经30，下经34，好多人都觉得点解唔系上下经都32卦呢，其实上下经都系平均的，因为上下经都系由18卦所组成的，所以唔存在上经少而下经多的问题。

讲番呢个咸卦系讲究对人的态度，点样面对他人，点样同人地沟通，包括左上下点样沟通，男与女的沟通，呢d就系「二气相感而相与」如果人与人之间无左感呢，就好似一个人在旺角行街，周围迫满人，但系举目无亲，实际上一个人都唔识，唔单止唔认识，重要大家充满敌意的，有个人迫埋d，就即刻竖起晒d保护网，系唔系想打荷包呢，尤其是在大陆，有陌生人同系讲野，你答一句就即刻迷迷糊糊俾晒d野佢，越多出现呢d野，人与人就越疏离，除左外在的疏离之外。

外在的疏离有个名就系箭猪，每个人都变左箭猪，无人可以埋身，呢件箭猪衫未必系锻炼得黎的，有好多系父母俾我地的，自细就教定佢向钱看，有利益先至来往，久而久之就缺乏左真诚的交感同一种无疑心的沟通。 除左真诚的沟通之外，咸卦亦都系一个婚姻的卦，点解系婚姻呢，因为呢个系少女少男的卦，兑为少女，艮为少男，所以风水秘笈里面有泽山为咸，少男之情属少女，所以个卦词话：

咸，亨，利贞，取女吉。 呢段系讲婚姻的，上面讲过易经系分开上下经的，上经的开天用乾坤两卦，就系以天地黎生化万物，到左下经就用咸，恒两卦黎开始，因为咸，恒两卦都系婚姻之象，所以就用男女黎做生化万物的代表，咸卦的卦形系 三个阴爻包住三个阳爻，同恒卦一样，不过方式唔同，咸卦的卦主系九五，最重要的就系第五爻，睇番个卦辞，亨，利贞，取女吉，要睇清楚唔系元亨，利贞， 而系亨，利贞，亨就系亨通，亨通就可以从事一样野，同元亨唔同，元亨代表本体系好的，呢件事的本质系好的，但系呢度无讲到佢的本质系好的，点解呢，因为天地的化生就讲本质，人与人之间的交往或者姻缘就唔系讲本质，系讲缘，缘系虚无的，系感性的，所以唔系实际有一样野存在的，所以呢度无讲元亨，利贞，系讲亨，利贞，跟住取女吉，呢个取其实系嫁娶个娶字， 即系话利于婚姻咁解，睇埋个彖词。

彖曰：咸，感也，柔上而刚下，二气感应以相与，止而说，男下女，是以亨利贞，取女吉也，天地感而万物化生，圣人感人心而天下和平，观其所感，而天地万物之情可见矣。

呢度话咸，感也，即系咸卦代表感应的感，柔上而刚下呢个柔上，系讲上六，刚下系讲上六下面三个都系阳爻，所以话柔上而刚下。 二气感应以相与，二气即系阴阳之气，相与即系相处相交，阴阳之气和平相处，止而说，说即系悦，如果一直动，处系动的状态，就唔能够产生感应，一直动住的气就感应唔到，所以就要停止，静止 先至可以感应，点解止而说呢，因为说就系悦，悦就系兑，兑卦的卦象就系悦，系欢悦，止而说系静态的感应，男下女，是以亨，利贞，男下女系乜，呢一卦系讲男仔追求女仔的， 追求的过程中将女仔捧到高高，好刻意咁样做D野去取悦女仔，呢D系恋爱中人常见的现象，孟子睇左呢一卦之后，话呢一卦系慕少艾，个个年青男女都经过呢个阶段，所以利贞，保持得到呢种态度就好，取女吉在呢种情况下结婚就好的。

天地感而万物化生，圣人感人心而天下和平，天地交感就产生万物，圣人系有德行的人，有权力的人，能够用一种了解一般人的态度，即系佢高高在上，但系都知道普通人想的野就天下和平，观其所感，天地万物之情可见，呢句仍然讲D有权势的人，或者领导人，你睇下领导人的思想方向，就知道佢所治下的地方的人民生活程度好定唔好，尤其是中国，因为无制衡制度， 人民系完全睇个领导人的思想取向，如果佢的思想开明，人民就有好日子过，呢D就系观其所感。

象曰：山上有泽，咸，君子以虚受人。

山上有泽，即系山泽通气，互相交流，交感，互相接受，但点样先至可以俾人接受呢，就系要谦虚，虚心先至可以俾人接受，受人即系俾人接受，呢个系一个倒置词，在易经里面好多呢一种咁的行文格式，同时要了解孔子的讲野习惯，对易经的象辞就好容易了解。

占到呢一卦问前程：以诚待人就一定会有回报，唔应该用怀疑的态度。

問婚姻：就係一個好卦，但係有條件的，就係要男追女，如果女追男就同呢個卦義不符。

問事業：如果失業想搵工，占到呢一卦就會失望，因為呢一卦係講究感應，唔係實質的野，做生意合資就好，係一個適宜合資的卦。

初六：咸其拇。

呢个惕手边的挴同足字边的踇系一样的，踇趾即系脚趾公，咸其拇即系感应到左脚趾公，即系由下一直向上，脚趾公动，即系感其挴，无话好定唔好，无吉凶注脚，睇埋个象辞。

象曰：咸其拇，志在外也。

你的脚趾头郁，就系想有所郁动，即系想行勒，想去街，到时到候就想出街，可能系电灯着。

占到呢一爻问前程：无论问卦者年纪有几，大都系表示岩岩开始，唔好心急。

问婚姻：重未时候。

问事业：宜静不宜动。

六二：咸其腓，凶，居吉。

腓系乜，就系脚瓜啷，即系小腿的部份，咸其腓同咸其拇唔同，因为咸其腓就系脚动，等于只脚瓜系度跳，所象征的野系唔好的，不过居就吉，你唔出动，你唔郁就好勒，你唔出外就好，所以呢 一爻虽然有动象，不过不宜动，点解呢，因为成个卦一开头就讲止而悦，止先至能够互相感应，动就唔能够感应，呢度由脚趾郁到脚瓜，郁脚趾未曾行得郁，但系郁脚瓜呢就表示行得勒，行得就系动，动就唔系止，唔静止就唔能够互相感应，所以就凶，因此居就吉，居就系唔郁。

象曰：虽凶，居吉，顺不害也。

虽然系凶象，不过唔郁就吉，亦即系顺乎自然的感应就无碍，所以要记住以静为相感，唔系以动为相感的，亦即系无声胜有声，真正两情相悦，唔系靠把口，更加唔系靠动作，而系讲究心灵互相沟通。

问前程：唔好舍近求远，移民就一定唔好，因为只系适宜郁小小，不宜大动。

问婚姻：结婚就好，离婚就不宜。

问事业：不宜合作，打工就不宜转工。

九三：咸其股，执其随，往吝。

股，大家都知道边个部份，咁随又系边度呢，原来随就系大脾，股之下，膝之上就系随，膝之下就系腓，膝头哥对落就系腓，膝头哥对上就系随，咸其股，即系郁勒，不过又禁住大髀，咁即系点呢，即系进退失据，又想去，又捉住大脾唔俾佢郁，又想行，又想唔行，查唔定主意，所以往吝，始终系唔主张郁，呢度要好留意，有乜野动作都唔岩，有乜野改变都唔岩，就系往吝， 亦即系所进行的野都有问题。

象曰：咸其股，亦不处也，志在随人，所执下也。

咸其股，就系股动，既然已经动，所以亦不处也，唔想处，呢个处就系居，居即系停，既然股想动，亦即系唔想静止，亦不处也，志在随人，所执下也，为乜野大脾叫做随呢，原来古人对步伐好有研究，如果我地主动咁步行，你谂下自己行的时候，系先郁边个部份，先郁脚，如果唔系主动咁行，即系人行我又行，咁的情形下就会先郁个随的部份，唔信可以自己试下就知， 如果漫无无目的咁行，就唔系脚先郁而系大脾，咁样无目的行法系特别容易疲倦的，所以人行你又行呢种步伐叫做随，膝之下郁动系主动的，膝之上，大脾郁系被动的，如果我地自己想去的时候，就脚先踢出，就开始行勒，但系人地行而自己又跟住行的时候主动的部份就系随，所以志在随人，所执下也，你即使禁住，禁住就系使到佢唔郁，禁住个大脾，系用手禁住， 就系所执在下，系用手，唔系用脑，用手去禁住的就系被动的，用脑控制先至系主动的，现在唔系主动，而系被动，呢度的志在随人，执其随，唔郁，我地要知道佢的唔郁系被动的唔郁，唔系主动的唔郁，所以就往吝，往就系去，吝就系差，去又差，唔去又差，因为系被动的唔去，唔系主动的唔去。

占到呢一爻问前程：就唔好埋堆，一定要有自主权，如果唔可以自主就宁愿唔做呢件。

问婚姻：就一定要小心选择，唔好抱住年晚煎堆的心态。

问事业：做生意就一定要独资，如果打工就千祈唔好拍马屁。

九四：贞吉悔亡，憧憧往来，朋从尔思。

贞吉，呢件事系好的，悔亡，即系无问题，成件事只要佢的本体系好的就无问题，乜野系憧憧，就系好多人的意思，见到人来人往就叫憧憧往来，朋从尔思，个思字系助语词，无意思的，即系朋从尔咁解，成班人跟住你，要做的野可以做到。

象曰：贞吉悔亡，未感害也，憧憧往来，未光大也。

只要呢件事系好的就无问题，未感害也无觉得唔妥，成班人来来往往系成班人跟住你，所以呢一个系一个动象，上边二爻叫你唔好郁，要停止，呢度就叫你郁动，呢个动系未动感害也 ，未觉得有乜唔妥，但系最后佢话未光大也，虽然有成班人跟住你，个个来来往往，重未有一个最后的目的决定点样做，呢度话虽然朋从尔，但系你重在度犹疑不决，但系果班朋系等紧你的决定， 但系你仍然未光大也。

占到呢一爻问前程：就系唔好靠人，一定要靠自己，呢一爻系人地跟随自己的，唔系自己去依附人地。

问婚姻：女人问就唔好，因为犹疑不决，唔知点做，男人问就无问题，唔使咁快决定住。

问事业：就一定要当机立断，如果无决断力，就成班跟住你的人都行行企企，如果打工唔好跳槽。

九五：咸其脢，无悔。

脢系乜野，背脊果两条肉就叫做脢，现场我地讲食脢肉，即系柳脢，相信其他地方已经无讲柳脢呢个名词，只有广州话先至保留柳 脢呢个名词，咸其胫，就系郁背脊，无悔即系无坏，为乜，因为郁背脊就唔系有重大的行动，并唔系话想去边度，如果想去边度就郁脚，现场只系郁背脊，无目的的。

象曰：咸其脢，志末也。

郁背脊究竟想点呢，就系想松下条尾龙骨者，尾龙骨就叫做末，所以唔系走，亦唔系郁，脢系生在背上的，在心脏的后面，我地的手脚同口部都会依照脑袋的命令而郁动，只有呢两条柳脢唔会照脑部的指挥去做，唔会受外来的引诱，亦无特别的反应，用冷漠，麻木的态度，唔单止咁，重要用背脊背向世界，充分表现出事不关己，己不劳心的态度。

占到呢一爻问前程：表示暂时都未有发展机会，要等。

问婚姻：问离婚就好，因为呢一爻充分表现出人性的疏离，冷漠，所以呢一爻问结婚就系一个凶卦。

问事业：就千祈唔好合作，因为目标唔明确，合作系无好结果的。

上六：咸其辅，颊，舌。

〈苦合舌〉动边个部位，动果个辅颊舌，边个部位系辅呢，贴住牙床果层皮就叫做辅，颊就系两个面珠，又叫车辅，点解呢，因为好似车咁样在两边郁动，颊就系面珠，舌就系脷，呢一爻唔系郁乜野，而系讲野，就叫咸其辅颊舌，咸其辅颊舌就系在度讲野，呢度所指的就系用说话黎点「碎」人地，系碎人地做乜做乜，唔系带人做野，而系碎人做野。

象曰：咸其辅颊舌，滕口说也。

滕即系腾，同飞腾的腾一样意思，腾口说也，即系一味落咀头，一味用牙较搭够，一味碎人，一味靠「坤」结果就会惹祸上身，所以呢个爻词虽然无讲吉凶，但系都可以睇到凶象，因为一味用咀头去点人地郁，而自己就唔郁，自己唔敢去就叫人地先去，结果对自己无乜好处，所以历史上战国时代的苏秦，张仪都系靠把口去坤人，所以呢两个人都无好下场， 在六国大封相里而最威的就系苏秦，但系最后佢俾五马分尸而死，又叫车裂，所以凡用口「碎」人地的，个级数都系低D的，因为滕口说也就一定要揣摩人地的意思，即系话要擦鞋，先至有人听你讲，所以就见人讲人诘，见鬼讲鬼话，初初就好掂，整整下就唔掂，所以呢个滕口说也系呢一卦之中最凶的一爻。

占到呢一爻问前程：就要以实际的行动，千祈唔好得把口。

问婚姻：呢段婚姻就一定靠唔住，因为得把口。

问事业：就唔好合作，因为靠唔住。

综观成个咸卦有一个好奇特的表象，你地自己去谂。