《易经》第三十二卦【恒】雷风恒#

风同雷系天地间的自然现象，商周时代的人民，开始由狩猎过渡到务农为生，风雨对佢地系有益的，但系遇到风雨，绝对唔系过瘾的事，但系中国人善于与大自然搏斗，随机应变，同时亦惯于苦中作乐，因为要生活，要倚靠大自然生活，就要依循大自然的法规利用风同雨，要长时间观察风雨的走向，掌握住大自然恒久不变的定律，使到五谷丰收，在夏朝的时候，即系商朝之前，就已经观察到日蚀就一定系初一，月蚀就一定系十五，在咁多千年以来，月蚀在农历十六的都只不过系试过两三次，唔单止系天象系咁恒久不变，就算系动物都有个恒的象，例如公鸡，在立春果日一定啼三次，平日最多系啼两次，在立春果日就唔同勒，呢D亦都系恒的一种，古人观察到呢D恒象，反观人类无边样系恒久不变的，人事不断变迁，甚至乎国运亦不断变更， 唯有夫妇之情系恒久不变。 序卦传话：夫妇之道，不可以不久也，故受之以恒。 可能以前未有离婚呢种东西，而只有休妻呢种行为，所以古人睇到咁的天象，掉转头睇番自己，无边样可以恒，唯一系拎夫妇之道来挥过，夫妇之道讲究白头偕老，恒久不变，但系一路发展落来，人类连呢样的恒都无埋，呢D情况有个好好的借口，系文明的通病，但系文明的通病绝对唔止咁少，最常见的就系将人的关系变成短暂化，讲究以快餐式的交往，视久恒长情为呆居， 以重视友谊为傻瓜，更视大仲马所写的双城记为天方夜谭，代之而来的系尔虞我诈，无人再同你讲长久，亦都无真诚沟通呢回事，因为每一个人都怕蚀底，将个底线订得高一高，边个得闲同你恒。 对事，对人，对自己，系有分别，对事我地可以半途而废，一件未完可以再做第二件，对人我地可以忘恩负义，可以利用完之后唔记得佢，但系对自己就唔得，点解呢，因为有一句好流行的说话，就系小人常立志，君子志立常，D意志唔够坚定，无大志的人，日日都话一日之计在于晨，日日都立志，今日做乜乜，年年立春果日都立志今年要做乜，日日立志，年年立志， 结果志愿立左唔少，完成到的有几多，或者有无一两个可以完成的就真系连自己都唔知，但系D有大志的人就唔同，立定一个志向，定左一个目标就不达到目的誓不罢休，呢D就系对自己的恒。

恒，亨，无咎，利贞，利有攸往。

恒：系永久，经常。

咸卦之后系恒卦，咸卦系讲少男少女一见钟情，系讲短暂的，随时会完的，恒卦系讲已经过左一时冲动的激情，讲究长久相处，所以恒卦亦都系夫妇恒久相处的卦，由卦形睇，下卦巽，象征长女，上卦震象征长男 ，巽系静，震系动，巽在内震在外，代表男主外女主内，六爻亦全部阴阳相应，代表左呢个卦合得来又长久，上震下巽代表左夫唱妇随，咸卦系一见钟情， 恒卦系白头偕老，系婚姻之道，未结婚的时候男方就苦苦追求，女方就好似王帝女，呢D系咸卦的情况，结左婚之后长男居上长女居下，同未结婚的时候情况大异，好多女人条气都好唔顺，大叹婚前同婚后的待遇大不相同，但系可能系男女之间的恒常惯性，就算唔顺都要接受，所以卦辞话恒久必然亨通，内顺外动，又三阴三阳都相应，所以无咎，按照正道来进行，所以就利贞，符合呢D条件就可以继续落去，就正系利有攸往。

彖曰：恒，久也，刚上而柔下，雷风相与，巽而动，刚柔皆应，恒，恒亨无咎，利贞，久于其道也，天地之道，恒久而不己也，利有攸往，终则有始也，日月得天而久照，四时变化而能久成，圣人久于其道而天下化成，观其所恒，天地之情可见矣。 好长的彖词。

恒，久也，刚上而柔下雷风相与，巽而动，刚柔皆应，恒，呢一段系解释个卦名的，恒系乜野，恒就系长久，刚上而柔下，刚上系指九四，柔下系指初六，刚在上卦，柔在下卦，刚上柔下代表左正常的名份，正常系就恒久的意思，雷风相与系从卦象来睇，有雷就有风，雷动风生，互相助势，呢个与唔系给与，而系相处，应该系广东话的相与，唔系普通话的相与， 所以读易经识广东话就着数好多。 巽而动，下卦巽，巽的本体系顺，上卦震，震的本体系动，巽而动即系顺而动，系正常长久之道，刚柔皆应，恒，呢一卦的六爻都系阴阳相应，又属于正常之道，刚上柔下，雷风相与，巽而动，刚柔皆应，呢四方面都有恒常的意义，所以卦名就叫做恒。

恒亨无咎，利贞，久于其道也，天地之道，恒久而不己也，利有攸往，终则有始也，亨而无咎的恒，系无条件的，只有系出于真心，唔附有任何目的，先至可以长久的，就系利贞，久于其道，天地之道，恒久而不己也，大自然的规律，一直以来都无变过，夏天一定热，冬天一定冻，只有热的时候更加热，冻的时候更加冻，一定唔会热变冻，无论你钟唔钟意，都唔会改变的， 呢D就系恒久而不己。

利有攸往，终则有始也，呢度再补充话任何事物绝对唔系一成不变就叫做恒，因为世上无不动不变的野，完全不动不变根本亦都唔系恒，万事万物都不断变，变系通达，通就可以恒久，以水为例，有野阻住佢，就一定会转换方向，不断有野阻，水亦都不断变更方向，但系向下流的原则系绝对无变的，终则有始就系变化。 日月得天而久照，四时变化而能久成，圣人久于其道而天下化成，四季不断变换，日月的位置亦都不断改变，但系到时到候出现就恒久都唔会改变，圣人有德行的人，有权力的人利用呢种形式来管制人民，因为商周年代都仲系奴隶制而且系世袭的，管治，钳制的制度无变，但系其中会有好多小恩小惠，例如俾佢地自由恋爱，俾佢地升职，但系做奴隶的身份永远都唔会变。

观其所恒，天地万物之情可见矣，仍然系讲观日月，观四时，日月依循大自然的法则，运行不停，所以能够长久照耀，天地万物之情就表示系事情的准则，周围点变都好，呢件事的准则无变。

象曰：雷风恒，君子以立不易方。

在表面上来睇，雷动风生，变化无常，但系睇真D原来根本无变，打风落雨呢D野年年都发生的，水灾旱灾年年都有的，只不过地方唔同啫，君子，有能力的人仿傚雷风的动作，除左自己所定的原则之外，手段，形式可以不断咁变，万事万物都处于不断变化的环境中，但系变化之中一定要有D野系唔变的，只要立定决心的野就唔好变，好似要污染地球，我地唔好改， 要继续将地球污染到唔适合人类居住为止，唔理呢件事系好定坏，决定左做就一定要做到底。

占到呢一卦问前程：表示来问卦的人都未决定做乜野，就建议佢先谂住做乜，先定左目标，然后勇往直前。

问婚姻：系一段美满的姻缘，但系如果无传统思想的就会好多拗撬，问结婚就好快成功，问离婚就唔系呢一卦所主张的，呢一卦的卦义系天变地变情不变，所以呢一卦问离婚就唔岩。

问事业：创业同合作创业都系好的，因为呢一卦三阴爻三阳爻都相合，所以合作系好的，打工就唔主张转工，因为继续留在原位重有得发挥自己的才干。

初六：浚恒，贞凶，无攸利。

竣：进音，挖深。 竣恒：挖完又塌。 咁下定决心要做一件事，要做好一件事，要做成功一件事，系要放弃好多野，甚至乎要忍受好多痛苦，恒就梗系好，系成功的基本条件，但系呢度浚恒自己无恒心去做一样野，但系不断为自己搵借口，自己为自己辨护，放纵自己最常见的事就系减肥，食埋呢餐先至减，结果不断俾机会自己，好似孟子话一曝十寒，无论你所立的志愿系乜都系凶的， 越系对自己俾多D机会就越系凶，所以无攸利。

象曰：浚恒之凶，始求深也。

要做一件事，无论系大事或小事都唔可以一蹴而就，一定要循序渐进，呢一爻的凶，凶在太心急，一开始就要达到目的，好多人将个标准定得太高，一日要减几多寸腰，到唔得的时候，又不断咁搵理由为自己解释，应该将目标定得低D，一步一步来，好似戒烟咁，由四十支减为三十支，再减为二十支，一步步就可以成功，但系呢度目标定得太高，但系做唔到，所以就凶， 呢个卦辞解话一锄就要锄出一条坑渠，梗系唔得啦。

占到呢一爻问前程：表示来问卦的人一定志大才疏，成日想做大事，话俾佢听现在未系时候，要做大投资迟D先啦。

问婚姻：呢一爻表示擒擒六，一拖手仔就想做乜乜，问结婚就好难成功，问离婚就拿拿林，因为就算你俾机会佢都唔会改的，所以赞成离婚。

问事业：创业系唔会成功，合作亦无乜可能，因为所做的野利润唔理想，所以创业就收入与付出唔成正比，合作就无意见，打工就搵定新工。

九二：悔亡。

悔系懊悔，悔恨。 亡系失去，悔亡：系后悔的情绪消失。

自己的能力不足，但系要做超出自己能力的事，做唔到就觉得自己好无用。 象曰：九二悔亡，能久中也。

呢D野唔应该系自己做的，所以做唔成功都唔使唔开心，能久中也因为系好心者，所以无问题。

占到呢一爻问前程：无论做乜野都好，一定要动机纯正，因为九二居中，本来系唔岩位，因为阳居阴位，但系居中，居中表示本体系好的，所做的野系有益于正道就无问题，例如卖翻版碟就系有乖正道。

问婚姻：认定个对象就唔好放弃，唔好理人地话相唔相配，问结婚就好，问离婚就唔符合爻义，因为爻意话无做错野，能久中，居中系代表自己的行为无唔岩。

问事业：创业同合作初期就无乜成绩，但系唔使心急，慢慢就有好转，打工就唔好转工。

九三：不恒其德，或承之羞，贞吝。

德：系德行。 或：系有。

承：系受，接受。 羞：耻。

孔子的学生将呢段爻辞原封不动收入左去论语里面，做野三心两意，订立左的目标，完全唔照住来做，原因系不满现状，将个目标越订越高，但系无一样做得成，呢D人唔好「痴」佢，分分钟会俾佢累埋，或承之羞话你唔听就只有更加衰，贞咎。

象曰：不恒其德，无所容也。

做下呢样又做下个样，结果无一样做得成功，无所容，唔单止人地睇系唔起，连自己都觉得自己衰。

占到呢一爻问前程：来问卦的系一个志大才疏的人，好似好叻，但系一事无成，应该重头开始，亦都表示现在做紧的野无乜前景，要考虑转舦。

问婚姻：就要考虑清楚，因为对方系一个唔守信用的人，讲野唔算数，所以要认真谂过先，问离婚就好快成功。

问事业：创业就屡试失败，所以独资做系无乜可能，合作亦制唔过，因为无口齿，合作亦系多余的，打工就一定要转工，因为留低都无意思。

九四：田无禽。 田系打猎，禽系鸟兽的总称。

呢度以打猎来比喻，好有心机去做一样野，但系都唔成功，好有诚意去做一样野，呢件事一定好的，但系有时你好有诚意，果件事未必好。

象曰：久非其位，安得禽也。

要做任何一样事，都要天时，地利，人和先至可以成功的，呢度话唔成功的原因系唔岩时唔岩地，安得禽点会有收获呢。

占到呢一爻问前程：现在做任何事都未系时候，更加唔好夹硬去做，一定要忍，忍得就无问题。

问婚姻：系一段唔理想的姻缘，问结婚就唔符合爻义，因为就算好有诚意成功的机会都好微，问离婚就快快进行。

问事业：创业同合作都唔使慌会有收获，好有心机做，但系都无乜成功机会，打工就要快D转工。

六五：恒其得贞，妇人吉，夫子凶。

恒其得贞就系从一而终，有恒为成功之本，认定左一个标准，择善固执，终身奉行，呢度所讲的系女人应该从一而终，女人咁样就系美德，系应该的，但系男人就唔系勒，所以话夫子凶。

象曰：妇人贞吉，从一而终也，夫子制义，从妇凶也。

孔子话女人应该要听丈夫的话，乘乘地，从一而终就好勒，男人系话事的，如果处处都听老婆话梗系衰啦，所以话从妇凶，但系我地的意思同佢唔同，妇人的立场同男人的立场唔同，男主外，女主内，女人可以样样都唔使出主意，因为佢有得赖，有得依靠，但系男人就唔同，样样都要自己决定，如果男人在出面做野样样都要问人，样样都无主意就想唔凶都唔得， 呢度的所谓从妇系问人征询的意思。

占到呢一爻问前程：所要进行的事如果系自己可以话事的就可以做，如果样样都要睇人面色，就要话俾佢听，呢件事一定无乜前途的。

问婚姻：并唔系一段好的姻缘，因为地位唔平等，如果女人问忍得就好，男人问到呢一爻表示佢要承担好重的责任，问结婚系好的，问离婚就唔符合爻义，呢一爻只不过话立场唔同而产生问题，共唔系感情的问题，所以主张暂时忍让，就会有转机。

问事业：可以独资创业，因为样样自己话事，唔需要征询其他人的意见，因为立场唔同，意向无可能一致的，所以呢一爻合作就无咁好，打工如果有意图转工就要当机立断，唔好犹疑。

上六振恒，凶。

振：系震动。 振恒：系经常有动摇。

上六阴居阴位宜静不宜动，但系呢一爻实际系恒的极位，又在震卦的尽头，静极就唔可以再静，呢度唔单止唔可以静，重动到唔可以节制，所以系凶。

象曰：振恒在上，大无功也。

摇摆不定，恒的原意系坚定不移，呢度所讲的系反复无常，一味想做大事，应该做完一件先至再做第二件，但系振恒唔肯好好地去逐件事完成，所以唔单止无功，重大无功添。

占到呢一爻问前程：表示有好多计划，个个计划都系好的，都唔知做边个好，亦都表示呢个人好多人「漏」邀请佢做野，好多好好的条件，但系应该细心分析，千祈唔好冲动应承，只要分析清楚D就知道无一件系好的，即系所有野都系表面好，系虚象而已。

问婚姻：就唔系一段好的姻缘，动荡不安，如果未结婚就要考虑清楚，问结婚就唔赞成，因为无乜安全感，都系离婚好过。

问事业：创业同合作都唔赞成，因为无诚意的合作梗系唔好，无耐性的创业成功的机会都好微。

睇晒成个恒卦，同咸卦一样，卦辞好好，但系爻义无一爻好的，初六立定主意做一样野，但系做唔到重不断为自己开脱。

九二悔亡系全卦最好的爻辞，在其他卦的悔亡系解都唔好的，但系马马虎虎算啦，但系在呢度已经系六爻之中最好的，无乜过错。 九三唔知道自己的能力，以为自己好叻。

九四好想做好一件事，但系呢个世界唔就你呢。

六五同人就唔同命，人地样样有得依靠，你就样样都要靠自己几惨。

上六应该专心的环境就反而唔专心，就变成一事无成。

咸同恒两卦都系较为奇特的二卦，你地将来识野多左的时候再慢慢研究下佢。